AKRISTIANO maathĩtwo makũngũyagĩre Kĩririkano gĩa gĩkuũ gĩa Kristo. Gĩkũngũĩro kĩu nokĩo gĩĩtagwo “irio cia Mwathani.” (1 Akorintho 11:20) Bata wa kĩo nĩ ũrĩkũ? Gĩkũngũyagĩrũo rĩ na gĩkũngũyagĩrũo na njĩra ĩrĩkũ?

Jesu Kristo aambĩrĩirie gĩkũngũĩro kĩu ũtukũ wa Bathaka ya Kĩyahudi ya mwaka wa 33 M.M. Bathaka yakũngũyagĩrũo rita rĩmwe o mwaka, mũthenya wa 14 wa mweri wa Kĩyahudi wa Nisani. Mweri wa Nisani waambagĩrĩria rĩrĩa mweri woneka thutha wa kiumia kĩa mbere kĩa mweri wa Gatatũ (Machi). Ayahudi maataraga thikũ 14 kuuma hĩndĩ ĩo nĩguo makũngũĩre Bathaka, riũa rĩathũa.

Jesu aakũngũĩire Bathaka e hamwe na atũmwo ake, agĩcoka akĩĩra Judasi Mũisikariota athiĩ, na thutha ũcio akĩambĩrĩria gĩkũngũĩro kĩa Irio cia Mwathani. Gĩkũngũĩro kĩu gĩacokire ithenya rĩa Bathaka ya Ayahudi na kwoguo kĩagĩrĩire gũkũngũĩrũo rita rĩmwe o mwaka.

Injiri ya Mathayo yuugĩte ũũ: “Jesu akĩoya mũgate, akĩrathima, akĩwenyũranga; akĩũne arutwo akiuga, Kai, mũrĩe; ũyũ nĩguo mwĩrĩ wakwa. Agĩcoka akĩoya  gĩkombe, agĩcokeria Ngai ngatho, akĩmane, akĩmera, Nyuanĩrai inyuothe; nĩ gũkorũo ĩno nĩyo thakame yakwa ya kĩrĩkanĩro ĩrĩa ĩitĩirũo andũ aingĩ, ya gũtũma mehia mohanĩrũo.”—Mathayo 26:26-28.

Amwe metĩkĩtie atĩ Jesu aagarũrire mũgate ũgĩtuĩka nyama ya mwĩrĩ wake nayo ndibei ĩgĩtuĩka thakame yake. No rĩrĩ, Jesu aarĩ na mwĩrĩ wake ũrĩ o mũgima rĩrĩa aamaneire mũgate ũcio. Hihi atũmwo a Jesu na ma maarĩaga mwĩrĩ wake na makanyua thakame yake? Aca, tondũ gwĩka ũguo kũngĩarĩ kũrĩa nyama cia mũndũ, na kũu nĩ kuuna watho wa Ngai. (Kĩambĩrĩria 9:3, 4; Maũndũ ma Alawii 17:10) Kũringana na Luka 22:20, Jesu oigire ũũ: Gĩkombe gĩkĩ nĩkĩo gĩa kĩrĩkanĩro kĩrĩa kĩerũ thĩinĩ wa thakame yakwa, o ĩrĩa ĩgũitwo nĩ ũndũ wanyu.” Hihi gĩkombe kĩu gĩatuĩkire biũ “kĩrĩkanĩro kĩrĩa kĩerũ”? Ũcio nĩ ũndũ ũtangĩahotekire tondũ kĩrĩkanĩro nĩ kũiguithanĩria, ti kĩndũ kĩngĩoneka na maitho.

Kwoguo mũgate na ndibei no indo cia kũgerekania tu. Mũgate ũrũgamĩrĩire mwĩrĩ mũkinyanĩru wa Kristo. Jesu aahũthĩrire mũgate ũrĩa watigarĩte kuuma harĩ irio cia Bathaka. Mũgate ũcio ndwarĩ na ndawa ya kũimbia o na hanini. (Thama 12:8) Bibilia ĩhũthagĩra ndawa ya kũimbia ĩrĩ ta rũũri rwa mehia kana ũthũku. Kwoguo mũgate wonanagia mwĩrĩ mũkinyanĩru wa Jesu ũrĩa aarutire. Mwĩrĩ ũcio ndwarĩ na mehia.—Mathayo 16:11, 12; 1 Akorintho 5:6, 7; 1 Petero 2:22; 1 Johana 2:1, 2.

Ndibei ndune yonanagia thakame ya Jesu. Thakame ĩo nĩyo ĩtĩtĩrithagia kĩrĩkanĩro kĩrĩa kĩerũ. Jesu oigire atĩ thakame yake nĩyo yaitirũo “ya gũtũma mehia mohanĩrũo.” Andũ kwoguo no monwo marĩ atheru nĩ Ngai na no maingĩre thĩinĩ wa kĩrĩkanĩro kĩrĩa kĩerũ na Jehova. (Ahibirania 9:14; 10:16, 17) Kĩrĩkanĩro kĩu, gĩtũmaga kũhoteke Akristiano ehokeku 144,000 mathiĩ igũrũ. Magaatuĩka athamaki na athĩnjĩri Ngai na marehere andũ othe irathimo.—Kĩambĩrĩria 22:18; Jeremia 31:31-33; 1 Petero 2:9; Kũguũrĩrio 5:9, 10; 14:1-3.

Nĩa magĩrĩirũo kũrĩa mũgate na kũnyua ndibei ĩo? Nĩ arĩa marĩ thĩinĩ wa kĩrĩkanĩro kĩrĩa kĩerũ na nĩo marĩ na kĩĩrĩgĩrĩro gĩa gũthiĩ matu-inĩ. Roho mũtheru wa Ngai nĩ ũmaheaga ũira hatarĩ na nganja atĩ o nĩ athure matuĩke athamaki kũu matu-inĩ. (Aroma 8:16)  Ningĩ marĩ thĩinĩ wa kĩrĩkanĩro kĩa Ũthamaki hamwe na Jesu.—Luka 22:29.

Ĩ arĩa nao marĩ na kĩĩrĩgĩrĩro gĩa gũgaatũũra tene na tene thĩinĩ wa Paradiso gũkũ thĩ? Nĩ mathĩkagĩra watho wa Jesu wa kũũngana hĩndĩ ya Irio cia Mwathani, mathiaga na gĩtĩo, no matirĩaga mũgate kana kũnyua ndibei. Aira a Jehova macemanagia rita rĩmwe o mwaka, Nisani 14 riũa rĩathũa, gũkũngũĩra Irio cia Mwathani. O na gũtuĩka no andũ ngiri nyinyi tu thĩ yothe moigaga me na kĩĩrĩgĩrĩro gĩa gũthiĩ matu-inĩ-rĩ, gĩkũngũĩro kĩu nĩ kĩa bata harĩ Akristiano othe. Nĩ ihinda rĩrĩa othe mangĩĩthugunda igũrũ rĩgiĩ wendo mũnene mũno wa Jehova Ngai na Jesu Kristo.—Johana 3:16.