МӘСИҺИЙАРʹА тʹәми һатьбу дайине, ԝәки әԝана Рʹожа Биранина мьрьна Иса Мәсиһ дәрбаз кьн, ве щәжьнерʹа дь Кʹьтеба Пирозда ӧса жи те готьне «Шива Хӧдан» (1 Корьнтʹи 11:20). Ле чьрʹа әв щәжьн ӧса фәрз ә? Кʹидәре у ча гәрәке бе дәрбазкьрьне?

Ԝәрә әм пeшийе пебьһʹәсьн дәрһәԛа щәжьна «Дәрбазбуне», йa kӧ щьмәʹта Ибрани һәр сал 14 Нисане дәрбаз дькьрьн ль гора салнәʹма Ибрани. Ле тӧ зани мәһа Нисане, бь салнәʹма Ибрани кʹәнге дәстпедьбу? Әв рʹожа чахе шәв у рʹож дьбьнә ԝәкә һәв, те һʹәсабе анәгори. Һьнге бьһаре незики анәгорийе, йан пешийа анәгорийе йан жи паше, рʹожа кӧ һива тʹәзә дәрдькʹәт, дьһатә һʹәсабе йәке Нисане. Жь ве һива тʹәзә паши 13 рʹожа, 14 мәһа Нисане бу. Ԝе рʹоже демәк 14 Нисане гава рʹо дьчу ава, щьмәʹта Ибрани һәр сал щәжьна Дәрбазбуне дәрбаз дькьрьн.

Ле сала 33-йа, 14 Нисане Иса щәжьнәкә тʹәзә кʹьфш кьр. Ве рʹоже Иса Мәсиһ тʹәви шагьртед хԝә дь отʹахәкеда тʹоп бун, ԝәки щара пашьн щәжьна Дәрбазбуне дәрбаз кә. Ԝе еваре, гава Щьһуда Исхәрйоти жь отʹахе дәркʹәт у чу, Иса щәжьна Шива Хӧдан дәрбаз кьр. Бь ве йәке Иса да кʹьфше, ԝәки һәр сал дәԝса щәжьна Дәрбазбуне, щәжьна Шива Хӧдан гәрәке бе дәрбазкьрьне. Ләма жи сале щарәке әв щәжьн те дәрбазкьрьне.

Мәттайе Ньвискʹар ӧса гьли дькә: «Иса нан һьлда шькьри да, кәркьр да шагьрта у гот: ‹Һан һьлдьн бьхԝьн. Әва бәдәна мьн ә. Пәйрʹа кʹас һьлда шькьри да, да ԝан у ԝанарʹа гот: Һун һʹәму жи жь ве вәхԝьн, әва хуна мьн ә бона пәймане, кӧ бона бахшандьна гӧнед гәләка те рʹетьне›» (Мәтта 26:26-28).

Ле гәло шагьртед Иса бь рʹастийе бәдәна Иса хԝарьн, йан жи хуна ԝи вәхԝарьн? Фәʹмдари йә ԝәки на, әв йәк ԝе бьһата һʹәсабе мәрьвхӧри у бь ве йәке әԝана ԝе мьԛабьли ԛанунед Хԝәде дәркʹәтана (Дәстпебун 9:3, 4; Ԛануна Кʹаһинтийе 17:10). Ча жь кʹьтеба Луԛа 22:20 те кʹьфше, Иса Мәсиһ гьлийед ӧса дьбежә: «Әва кʹаса пәймана ну йә, пе хуна мьн гьредайи, кӧ бона ԝә те рʹетьне». Ле әв кʹас дькарьбу рʹасти жи «пәймана ну» буйа? На, чьмки пәйман тьштәки ӧса нинә ԝәки бькарьби дәсте хԝә бьди, ләма жи кʹас тьштәки дьн те һʹәсабе.

Нан у шәрав әв симбол ьн. Нан бь симболике те һʹәсабе бәдәна Исайә ԛәданди. Паши щәжьна Дәрбазбуне, йа кӧ Иса тʹәви шагьртед хԝә дәрбаз кьрьн, нан чь кӧ мабу Иса һьлда у да шагьртед хԝә. Әв нан бе һәвиртьрʹшк чедькьрьн (Дәркʹәтьн 12:8). Дь Кʹьтеба Пирозда һәвиртьрʹшк бь симболике те һʹәсабе, ча тьштәки бь гӧнә, йан жи тьштәки бь ԛӧсур. Ләма жи нане бе һәвиртьрʹшк, те һʹәсабе бәдәна Исайә ԛәданди йе кӧ әԝи бәрва да. Бәдәна ԝи бе ԛӧсур у бе гӧнә бу (Мәтта 16:11, 12; 1 Корьнтʹи 5:6, 7; 1 Пәтрус 2:22; 1 Йуһʹәнна 2:1, 2).

Шәрава сор жи бь симболике те һʹәсабе хуна Иса. Бь сайа хуна Иса, кӧ һатә рʹетьне, пәймана тʹәзә кʹәтә ԛәԝате. Иса гот кӧ хуна ԝи «бона бахшандьна гӧнед гәләка те рʹетьне». Бь сайа ве йәке, мәри бәр чʹәʹве Хԝәде дькарьн тʹәмьз бьн у һьн жи әԝана дькарьн тʹәви Йаһоԝа дь пәймана нуда бьн (Ибрани 9:14; 10:16, 17). Әв пәйман йан жи пʹәвкʹәтьн,  сәва 144 000 мәсиһийед амьн мәщале вәдькә, сәва кӧ әԝана ль әʹзмана бьжин. Ль ԝьр әԝана ԝе бьбьнә ча пʹадша, кʹаһин, ԝәки бь кʹарәкә мәзьн сәва мәрийа, пʹадшатийе бькьн (Дәстпебун 22:18; Йерәмйа 31:31-33; 1 Пәтрус 2:9; Әʹйанти 20:6; 14:1-3).

Ле гәло ԝәʹде Евара Биранине, изьна кʹе һәйә жь ван симбола бьхԝьн у вәхԝьн? Изьна ԝан мәрийа һәйә, йед кӧ дь ве пәймана нуда ньн у гӧмана ԝан жи жийина ль әʹзмана йә. Бь сайа рʹӧһʹе пироз, әԝана те дәрдьхьн у ль сәр хԝә тʹәхмин дькьн кӧ әԝана жь алийе Хԝәдеда һатьнә жьбартьне, сәва кӧ ль әʹзмана бьбьнә пʹадша (Рʹомайи 8:16). Хенщи ԝе йәке, Иса Мәсиһ хԝәха тʹәви ԝан пәймана пʹадшатийе кʹьфш кьр (Луԛа 22:29).

Ле чь әм дькарьн бежьн дәрһәԛа ԝан мәрийа, гӧмана кʹижана һәйә кӧ бьжин дь Щьнәте ль сәр әʹрде? Әԝана һәма ӧса дькьн, ча кӧ Иса тʹәми дабу. Әԝана әве щәжьне бь ԛәдьр дәрбаз дькьн, ле жь симбола нахԝьн у вәнахԝьн. Сале щарәке, 14 мәһа Нисане, гава рʹо дьчә ава, Шәʹдед Йаһоԝа әв Рʹожа биранине дәрбаз дькьн. Рʹаст ә жь ԝан мәрийа йед кӧ ль әʹзмана гәрәке бьжин, ль сәр дьнйайе ньһа тʹәне чәнд һʹәзар манә, ле әв әʹйд сәва һʹәму Мәсиһийа тьштәки гәлә фәрз те һʹәсабе. Ԝәʹде ве әʹйде һәр кәс дькарә дәрһәԛа һʹьзкьрьна Йаһоԝа у Иса Мәсиһ һе кʹур дьшьрмиш бә (Йуһʹәнна 3:16).