JIZƆS bin tɛl Kristian dɛn fɔ de mɛmba di tɛm we i day. Wetin mek dat impɔtant? Ustɛm dɛn kin mek am? Ɛn aw dɛn kin mek am?

Jizɔs Krays bin mek am di nɛt we di Ju pipul dɛn bin gɛt di Pasova insay di ia 33. Dɛn bin de mek di Pasova wan tɛm insay di ia. Na di de we mek 14 insay di mɔnt we dɛn kɔl Naysan, dɛn bin de mek am. Naysan bin de bigin we dɛn si di nyu mun afta di fɔs wik insay Mach. Afta dat, di Ju pipul dɛn kin kɔnt 14 dez fɔ mek di Pasova. Dɛn bin de mek am ivintɛm, we di san dɔn go dɔŋ.

Jizɔs bin sɛlibret di Pasova wit in apɔsul dɛn. Afta Judas Iskariɔt kɔmɔt na do, i mek di It fɔ Mɛmba di Masta. Frɔm da tɛm de, dɛn lɛf fɔ sɛlibret di Pasova ɛn bigin mek di wan we Jizɔs mek. Bikɔs na wan tɛm insay di ia dɛn bin de mek di Pasova, semweso, na wan tɛm insay di ia wi fɔ mek di Ivintɛm It fɔ Mɛmba di Masta.

Di Gud Nyus we Matyu rayt bin tɔk se: “Jizɔs tek bred, i pre ɛn tɛl Gɔd tɛnki. I kɔt kɔt am ɛn gi in lanin bɔy dɛn ɛn se, ‘Una tek am ɛn it am, dis na [tin we min] mi bɔdi.’ Dɔn i tek di kɔp ɛn pre ɛn tɛl Gɔd tɛnki. I gi in lanin bɔy dɛn ɛn se, ‘Una ɔl drink di wayn we de na dis kɔp; dis na [tin we min] mi blɔd  we a tek mek di agrimɛnt we Gɔd mek wit in pipul dɛn, a dɔn sakrifays am fɔ padin plɛnti plɛnti pipul dɛn sin.’”—Matyu 26:​26-28.

Sɔm pipul dɛn biliv se Jizɔs chenj di bred to in tru tru bɔdi, ɛn di wayn to in tru tru blɔd. Bɔt ɔl pat pan Jizɔs in bɔdi bin stil de pan am we i gi in apɔsul dɛn di bred. Yu tink se na Jizɔs in tru tru bɔdi ɛn in blɔd in apɔsul dɛn bin it ɛn drink? Nɔ, nɔto so i bi. Di apɔsul dɛn nɔ bin du dat bikɔs Gɔd in lɔ bin se mek dɛn nɔ it ɛni bif we gɛt blɔd. (Jɛnɛsis 9:​3, 4; Lɛvitikɔs 17:​10, NW) Insay Lyuk 22:​20, Jizɔs bin se: “Di wayn we de na dis kɔp na di nyu agrimɛnt bitwin Gɔd ɛn mɔtalman we a mek wit mi blɔd wɛn a gri fɔ mek pipul kil mi [“so dat a go sev una,” NW].” Yu tink se na di wayn ɔ di kɔp na bin “di nyu agrimɛnt”? Nɔ, bikɔs agrimɛnt na sɔntin we pipul dɛn kin gri pan. Nɔto tin we pɔsin de si ɔ tɔch.

So, di bred ɛn di wayn min sɔntin. Di bred min Krays in bɔdi we nɔ gɛt wan sin. Di bred we dɛn kin yuz pan di Pasova na bred we nɔ gɛt yist. Na wan pan dɛn bred ya we bin lɛf pan di Pasova, Jizɔs bin yuz. (Ɛksodɔs 12:​8) Bɔku tɛm, di Baybul kin yuz yist fɔ tɔk bɔt sin. Bikɔs di bred we dɛn yuz nɔ gɛt yist, so i min Jizɔs in pafɛkt bɔdi. I nɔ bin gɛt wan sin.—Matyu 16:​11, 12; Fɔs Lɛta Fɔ Kɔrint 5:​6, 7; Pita In Fɔs Lɛta 2:​22; Jɔn In Fɔs Lɛta 2:​1, 2.

Di rɛd wayn min Jizɔs in blɔd. Na da blɔd de mek di agrimɛnt gɛt pawa. Jizɔs bin se in blɔd go “padin plɛnti plɛnti pipul dɛn sin.” Dat dɔn mek mɔtalman klin na Gɔd in yay ɛn dɛn dɔn ebul de pan di nyu agrimɛnt wit Jiova. (Di Ibru Pipul Dɛn 9:​14; 10:​16, 17) Dis agrimɛnt dɔn mek di 144,000 fetful Kristian dɛn ebul fɔ go na ɛvin. We dɛn go de, dɛn de go bi kiŋ ɛn prist dɛn, ɛn du plɛnti gud tin dɛn fɔ mɔtalman.—Jɛnɛsis 22:​18; Jɛrimaya 31:​31-33; Pita In Fɔs Lɛta 2:​9; Rɛvɛleshɔn 20:​6; 14:​1-3.

Na udat dɛn fɔ it di bred ɛn drink di wayn? Na di wan dɛn we de pan di nyu agrimɛnt. Dat min se na di wan dɛn we gɛt fɔ go na ɛvin nɔmɔ fɔ it di bred ɛn drink di wayn. Na Gɔd in oli spirit de sho dɛn se Gɔd dɔn pik dɛn fɔ go bi kiŋ na  ɛvin. (Lɛta Fɔ Rom 8:​16) Dɛn de bak pan wan ɔda agrimɛnt we Jizɔs mek wit dɛn fɔ rul na in Kiŋdɔm.—Lyuk 22:​29.

We di wan dɛn we go de sote go na Paradays, wetin dɛn fɔ du? Dɛn fɔ du wetin Jizɔs tɛl dɛn ɛn go di Ivintɛm It fɔ Mɛmba di Masta. Bɔt we dɛn go de, dɛn nɔ de it di bred ɛn drink di wayn; dɛn de go fɔ go wach. Na wan tɛm insay di ia Jiova Witnɛs dɛn kin mek di Ivintɛm It fɔ Mɛmba di Masta. Dɛn kin mek am Naysan 14, we di san dɔn go dɔŋ. Pan ɔl we di wan dɛn we fɔ go na ɛvin nɔ bɔku igen, di Ivintɛm It fɔ Mɛmba di Masta na sɔntin we impɔtant to ɔlman we na Kristian. Na tɛm we ɔlman kin tink gud wan bɔt di lɛk we Jiova Gɔd ɛn Jizɔs Krays lɛk wi.—Jɔn 3:​16.