VAKRISTE kwa va pangera mokurugana Ediworoko lyonomfa daKristusa. Sipito esi kusitumbura hena asi “Murarero gwaHompa.” (1 Vakolinte 11:20) Mulyo musinke gwa kara mo mwago? Siruwoke ntani ngapi nava vhura kugurugana?

Jesus Kristusa ga tulire po sipito esi momasiku goPaska zoVajuda mo-33 S.N. Paska kwa kere sipito esi ngava rugana rumwe tupu momvhura mezuva 14 lyokwedi koVajuda Nisani. Mokuvarura ezuva olyo, Vajuda ngava ndindire ezuva lyomosinema somomangenyena eli lya kere nonovili 12 domutenya ntani nonovili 12 domasiku. Kwedi kokupe kokuhova kopopepi nezuva eli kwa likidire etamekero lyoNisani. Ngava dana Paska momazuva 14, konyima zokukatoka ezuva.

Jesus kwa dene Paska kumwe novapositoli vendi ntani konyima zokupwagesa mo Judasa Isikaliyoto, ga tulisire po Murarero gwaHompa. Murarero ogo kwa pinganenene po Paska zoVajuda, yipo nye gwa kona kugurugana rumwe tupu momvhura.

 Evangeli lyaMateusa kudivisa asi: “Jesus ta gusa mboroto, ta pandura Guhwe, ta zi bamagura, a zi pe varongwa vendi, ta tanta asi: ‘Guseni mu lye, oru yiro rutu rwange.’ Makura ntani ana gusa nkinda, ta pandura Guhwe, ta zi va pe, ta tanta asi: ‘Nwaa-nweni mo namuvenye, yeeyi ezi yizo honde zange zegwanekero lyepe, ezi ngazi tjikangerera wovanzi edongonono lyononzo.’”—Mateusa 26:26-28.

Vamwe kwa pura asi Jesus kwa pirwire mboroto zi kare rutu rwendi ropanyama ntani vhinyu zi kare honde zendi. Nye, rutu rwaJesus ropanyama kwa kere ruwaawa apa ga geve mboroto ozo. Vapositoli vaJesus awo sili kwa lire rutu rwendi ropanyama ntani nokunwa honde zendi ndi? Hawe, oyo ngano va kere asi varulyavantu ntani nokuteza po veta zaKarunga. (Genesis 9:3, 4; Levitikus 17:10) Kuliza naRukasa 22:20, Jesus ga uyungire asi: “Nkinda ezi egwanekero lyepe lyomohonde zange, ezi ngava mu tjisangera.” Ozo nkinda ko zene yizo za kere nye sili “egwanekere lyepe” ndi? Hawe, morwa egwanekero alyo elizuvho, kapisi sininke sokumona.

Mboroto ntani novhinyu ayo kwa kere tupu yidiviso. Mboroto kufanekesa rutu rokusikilira mo rwaKristusa. Jesus kwa ruganesere muhwi gomboroto ogo gwa hupire ko komurarero goPaska. Muhwi kwa gu rugene pwa hana yihaheso, ndi yifuliso. (Exodus 12:8) Bibeli kuruganesa yihaheso mokufanekesa nzo ndi ezonauko. Yipo nye mboroto kukarera po rutu rokusikilira mo oru ga zambere Jesus. Aro kapi rwa peke nzo.—Mateusa 16:11, 12; 1 Vakolinte 5:6, 7; 1 Peturusa 2:22; 1 Johanesa 2:1, 2.

Vhinyu zongeha kukarera po honde zaJesus. Honde ozo kunkondopeka egwanekero lyepe. Jesus ga uyungire asi honde zendi kwa zi tjisangere ‘kedongonono lyononzo.’ Vantu kuvhura nye kukara vana zere kosipara saKarunga yipo va vhure kuwiza megwanekero lyepe kumwe naJehova. (Vahebeli 9:14; 10:16, 17) Egwanekero eli kuninkisa Vakriste wovalimburukwi 144 000 yi va wapere mokuza meguru. Omo awo ngava ka kara vahompa novapristeli mokutungikira vantu navenye.—Genesis 22:18; Jeremiya 31:31-33; 1 Peturusa 2:9; Ehororo 5:9, 10; 14:1-3.

 Wolye wokuvhura kumakera kovhinyu nomboroto? Wowo tupu va kara megwanekero lyepe, kutanta asi owo va kara nehuguvaro lyokuza meguru. Mpepo zokupongoka zaKarunga yizo azi va ninkisa va dive asi awo vana va horowora mokukakara vahompa vemeguru. (Varoma 8:16) Awo hena kwa kara megwanekero lyoUhompa naJesus.—Rukasa 22:29.

Ngapi kuhamena owo va kara nehuguvaro lyokuparuka narunye pevhu moParadisa? Nawo kulimburukwa mpangera zaJesus ntani kukara mo moMurarero gwaHompa, nye awo kuwiza ngwendi vakalimo wokufumadeka, kapisi wokumakera. Rumwe momvhura konyima zokukatoka ezuva lyoNisani 14, Nombangi daJehova kurugana Murarero gwaHompa. Nampili asi mayovi gomasesu tupu mouzuni naunye ga kara nehuguvaro lyemeguru, sipito esi aso mulyo koVakriste navenye. Aso silika apa navenye ava vhuru kugazadara ko keharo lyenene lyaJehova Karunga ntani neli lyaJesus Kristusa.—Johanesa 3:16.