AKRISTU bakanikinwa vo bayindulanga lufwa lwa Kristu. O Luyindulu lwalu luyikilwanga mpe vo “Nlekelo a Mfumu.” (1 Korinto 11:20) Nkia nsasa luna? Nkia ntangwa ye nkia mpila lufwete yindulwilwa?

Yesu Kristu wasikidisa luyindulu lwalu muna fuku wa Nduta ya Ayuda ya mvu wa 33 wa tandu kieto. E nkinzi wa Nduta nkumbu mosi kaka wakembelwanga konso mvu kina kia 14 kia ngonde ya Nisani. Ayuda muna zaya e lumbu kiaki, nanga bavingilanga e nsungi a kintombo. Muna nsungi yayina e lumbu kiakalanga ye ola 12 za mwini, ye ola 12 za fuku. E lumbu kiantete kia zangamanga ngonde i kiayantikanga e ngonde a Nisani. Muna kuma kiaki, e Nduta yayantikanga vioka lumbu 13.

Yesu vava kamana dia elambu dia Nduta ye alongoki andi, wavaikisa Yuda mwisi Kereote, i bosi wasikidisa Nlekelo a Mfumu. Elambu diadi i diavinga vana fulu kia Nduta ya Ayuda. Ikuma vo difwete kembelwanga nkumbu mosi kaka muna konso mvu.

E Nsangu zambote zasoneka Matai zivovanga vo: ‘Yesu obongele e mbolo, osambidi, obukunwini yo, ovene yo kwa alongoki, ovovele vo: ‘Nubonga nwadia. Eyayi nitu ame isunzulanga.’ Obongele e kopo, ovutwidi matondo, ubavene dio, yo vova vo: ‘Nunua dio yeno awonso, kadi menga  mame ma kangu disunzulanga, mana mebungukila muna kuma kia wantu ayingi muna luloloko lwa masumu.’—Matai 26:26-28.

Akaka bekwikilanga vo muna lumbu kiakina Yesu wakitula mbolo se nitu andi, e vinyo se menga mandi. Kansi, o Yesu vava kabavana mbolo wamoyo kakala. Nga ntumwa za Yesu nitu andi kieleka badia yo nua menga mandi? Ve kikilu, kadi ediadi diadi kulula nsiku a Nzambi walembi dia menga. (Etuku 9:3, 4; Fuka 17:10) Muna Luka 22:20 Yesu wavova vo: “E mbungwa yayi i’kangu diampa muna menga mame, mana mebungukila muna kuma kieno.” Nga mbungwa yakituka kieleka se “ekangu diampa”? Ke dilendakana ko, kadi ekangu i ngwizani ke lekwa kisimbwanga ko.

Muna kuma kiaki, e mbolo ye vinyo sinsu kaka. E mbolo nitu a Yesu yalunga isonganga. Yesu wasadila mbolo ina yasuva vava badia Nduta. E mbolo zazina ke zafuna ko. (Luvaiku 12:8) Nkumbu miayingi, Nkand’a Nzambi usadilanga funa nze sinsu kia masumu ye vilwa. Muna kuma kiaki, mbolo yalembi funiswa yisonganga e nitu ina kavana o Yesu se kimenga. Ke yakala y’esumu ko.—Matai 16:11, 12; 1 Korinto 5:6, 7; 1 Petelo 2:22; 1 Yoane 2:1, 2.

E vinyo menga ma Yesu yisonganga. Kadi o menga i masikidisa ekangu diampa. Yesu wavova vo o menga mandi mabunguka muna “luloloko lua masumu.” Muna menga mama, wantu balenda kituka avelela vana ndose a Nzambi yo kota mun’ekangu diampa yo Yave. (Ayibere 9:14; 10:16, 17) Ekangu diadi yovo ngwizani, yaziula e nzila kimana 144.000 ma Akristu akwikizi benda kun’ezulu. Bekala se atinu ye anganga kun’ezulu yo twasa nsambu kwa wantu awonso.—Etuku 22:18; Yeremiya 31:31-33; 1 Petelo 2:9; Lusengomono 5:9, 10; 14:1-3.

Nga yeto awonso tufwete dianga Nlekelo a Mfumu? Awana kaka bena mun’ekangu diampa—ana bena ye vuvu kia kwenda kun’ezulu i bafwete dia mbolo yo nua vinyo. Mwand’avelela usianga kimbangi kwa wantu awaya mu zaya vo basolwa mu kwenda yala kun’ezulu. (Roma 8:16)  Bena mpe mun’ekangu dia kintinu yo Yesu.—Luka 22:29.

Adieyi tuvova mu kuma kia awana bena ye vuvu kia zinga yakwele mvu muna Paradiso ova ntoto? Belemvokelanga mpe nkanikinu a Yesu wa kwenda kuna Nlekelo a Mfumu. Kansi ke bedianga nlekelo ko, bekalanga se mbangi muna luyindulu. Muna konso mvu kina kia 14 kia ngonde ya Nisani kuna nim’a ndimuk’a ntangwa, Mbangi za Yave beyindulanga Nlekelo a Mfumu. Kana una vo omu nz’amvimba akete kaka bena ye vuvu kia kwenda kun’ezulu, o luyindulu lwalu lwamfunu kikilu kuna kwa Akristu awonso. I nsungi ambote ya sungamena o zola kwampwena basonga Yave wa Nzambi yo Yesu Kristu.—Yoane 3:16.