ABAKLISTU balifundilwe ukwanuka imfwa ya baKlistu. Ici icakwanuka nakabili ciletwa ati ‘umulalilo wa baShikulu.’ (1 AbaKolinto 11:20) Mba nindo cicindamine ukwakuti? Nilwisa celelwe ukwanukwa, kabili cilyelelwe ukwanukwa shani?

BaYesu Klistu balitatikile ici icakwanuka pa bushiku bwa Muciluko uwa baJuda mu mwaka wa 33 C.E. Umuciluko wali kusefya ukwalukucitwa limo lukoso mu mwaka, pa kasuba ka 14 mu mwenshi wa Nisani uwa baJuda. Pakweba’ti bapende ukufika pali kako akasuba, abaJuda cipale baalukupembelela akasuba ka mu mpindi ya mwela ili kuba ukutuba pa maawala 12 ne mfinshi pa maawala 12. Akasuba ako ili umwenshi waikala akaali apepi ne kasuba aka, e kaali kasuba ka kutanga aka mwenshi wa Nisani. Umuciluko walukubako panuma ya nshiku 14, ninshi akasuba kawa.

BaYesu balisefeshe Umuciluko ne ntangishi shabo, kabili panuma ya kutamfya Juda Isikaliote, eli batatikile Umulalilo wa baShikulu. Uyu umulalilo walipyene Umuciluko wa baJuda, pakuti pali fyefyo, ulyelelwe ukwanukwa limo lukoso mu mwaka.

Ibuuku lya mu Baibolo ilyakwe Matayo lilalabila ati: “BaYesu balibulile siŋkwa nekucindika, nekuukumala, nekubapela abasambile, nekulabila ati: Pokeni, mulye; uyu mubili wanji! Kabili balibulile iŋkomeci, nekutota, nekubapela, nekulabila  ati: Nweni-mo mwense; pakuti iyi milopa yanji, iyakulayana kwabukumo, iyakupokomokela abenji, kukulekelela kwafyakubifya.”—Matayo 26:26-28.

Bambi abantu balicetekele ati baYesu balyalwile shinkwa ukuba iminefu yabo ne mfaina ukuba imilopa yabo. Nangabe’fyo, umubili wa baYesu wali lukoso uubulubulu ili bapeele uyo shinkwa. Kani intangishi sha baYesu muli bucine shalukulya iminefu yabo ne kulukunwa imilopa yabo? Koku, pakuti ukucite’fyo nga kwali kupuulaishe’funde lya baLesa ilikaanya ukulye’minefu ya bantu ne kunwe’milopa. (Ifyakutaŋga 9:3, 4; IfyabaLefai 17:10) Koti ni fyefyo tupenda pali Luku 22:20, baYesu balilabile ati: “Iŋkomeci iyi kulayana kwabukumo mumilopa yanji ipokomokele pakuti pali mwebo.” Kani inkomeci iyo icinenene yalyalukile “kulayana kwabukumo”? Ifyo tekuti ficitikepo, pakuti ukulayana kusuminanshanya, talipo cintu ici mungabona ne menso.

Pakuti pali fyefyo, fyonse fyobilo shinkwa ne mfaina fyakupalanya lukoso. Shinkwa ilemakaninako umubili wa baKlistu uuwaminine. BaYesu balipyungishe shinkwa iyasheleko ku cakulya ca Muciluko. Shinkwa yalipangilwe iya kubulo’musunga. (Ifyakufuma 12:8) Baibolo ilalabila pa musunga ati keshibilo ka kubifya neli aka kubola. Pakuti pali fyefyo, shinkwa iya kubulo’musunga ilemakaninako umubili uuwaminine woyo baYesu bapeele. Tawakwetepo akakubifya.—Matayo 16:11, 12; 1 AbaKolinto 5:6, 7; 1 Petilo 2:22; 1 Yoane 2:1, 2.

Imfaina ishikashikile shilemakaninako imilopa ya baYesu. Iyo imilopa ilalenga ukulayana kwa bukumo ukuba ukwa cinenene. BaYesu balilabile ati imilopa yabo yalipokomokele “kukulekelela kwafyakubifya.” Pakuti pali fyefyo, abantunshi bangaba abaswetele mu menso abaLesa kabili bangaba mu kulayana kwa bukumo na baYehova. (AbaEbeya 9:14; 10:16, 17) Uku ukulayana e kulenga ati ba 144,000 abaKlistu babucetekelo bangaya kwiulu. Kulya bakaba ni mfumu ne bapapatilishi pakweba ati abantunshi bonse bangashuka.—Ifyakutaŋga 22:18; Jelemiya 31:31-33; 1 Petilo 2:9; Ukufisulula 5:9, 10; 14:1-3.

Mba nibani lomba abelelwe ukulya ifyakupalanya fya pa Cakwanuka? Ni baabo lukoso abali mu kulayana kwa bukumo—e kweba ati, ni baabo abakwete ubucetekelo bwa kuya kwiulu—ebelelwe ukulya shinkwa ne kunwe’mfaina. Umupashi uswetelele  uwa baLesa eubabuulishisha ukweba ati balisalulwilwe ukube’mfumu kwiulu. (AbaLoma 8:16) Nakabili bali mu kulayana kwa Bufumu na baYesu.—Luku 22:29.

Nga pano abo abakwete ubucetekelo bwa kwikala umuyayaya mu Paladaiso pa calo? Balalonde’funde lya baYesu kabili balasangwako ku Mulalilo wa baShikulu mu mucinshi, pano tabalyako. Limo mu mwaka panuma lulya akasuba kawa pa Nisani 14, Bamboni sha baYehova balanuka Umulalilo wa baShikulu. Nangaba’ti banini lukoso mu calo conse abalabila ati bali ne bucetekelo bwa kuya kwiulu, ici icakwanuka cicindeme ku baKlistu bonse. Ni mpindi ili bonse bangalakanya pa butemwe ubwakuti ubukulu ubwa baYehova Lesa na baYesu Klistu.—Yoane 3:16.