APPENDIĊI

L-​Ikla taʼ fil-​Għaxija tal-​Mulej​—Ċelebrazzjoni li Tonora lil Alla

IL-​KRISTJANI huma kmandati biex jiċċelebraw it-​Tifkira tal-​mewt taʼ Kristu. Din iċ-​ċelebrazzjoni tissejjaħ ukoll l-​“ikla taʼ fil-​għaxija tal-​Mulej.” (1 Korintin 11:20) Għala hija daqshekk importanti? Meta u kif għandha tiġi ċelebrata?

Ġesù Kristu waqqaf din iċ-​ċelebrazzjoni fil-​lejl tal-​Qbiż Lhudi fis-​sena 33 E.K. Il-​Qbiż kien ċelebrazzjoni li tinżamm darba fis-​sena, fl-​14-il jum tax-​xahar Lhudi Nisan. Sabiex jikkalkulaw id-​data, il-​Lhud milli jidher kienu jistennew l-​ekwinozju tar-​rebbiegħa. Din hija l-​ġurnata meta bejn wieħed u ieħor ikun hemm 12-il siegħa dawl u 12-il siegħa dlam. L-​ewwel qamar ġdid qrib l-​ekwinozju tar-​rebbiegħa li setaʼ jiġi osservat kien jimmarka l-​bidu taʼ Nisan. Il-​Qbiż kien jiġi 14-il jum wara, meta tkun niżlet ix-​xemx.

Ġesù ċċelebra l-​Qbiż maʼ l-​appostli tiegħu, qal lil Ġuda l-​Iskarjota biex joħroġ, u mbagħad waqqaf l-​Ikla taʼ fil-​Għaxija tal-​Mulej. Din l-​ikla ħadet post il-​Qbiż Lhudi, u għalhekk għandha tiġi kommemorata darba waħda biss fis-​sena.

L-Evanġelju taʼ Mattew jirrapporta: “Ġesù ħa ħobża u, wara li qal talba, qasamha, ta lid-​dixxipli, u qal: ‘Ħudu, kulu. Dan il-​ħobż jirrappreżenta ġismi.’ Ukoll, qabad kies u, wara li radd  ħajr, tahulhom, u qal: ‘Ixorbu minnu, intom ilkoll; għax dan jirrappreżenta d-​“demm tiegħi tal-​patt,” li se jixxerred għal ħafna għall-​maħfra tad-​dnubiet.’”​—Mattew 26:​26-28.

Xi wħud jemmnu li Ġesù bidel il-​ħobż fil-​laħam letterali tiegħu u l-​inbid f’demmu. Madankollu, il-​ġisem fiżiku taʼ Ġesù kien għadu intatt meta offra l-​ħobż. Kienu l-​appostli taʼ Ġesù tassew qed jieklu l-​laħam letterali tiegħu u jixorbu demmu? Le, għax dak kien ikun kannibaliżmu u ksur tal-​Liġi t’Alla. (Ġenesi 9:​3, 4; Levitiku 17:10) Skond Luqa 22:​20, Ġesù qal: “Dan il-​kies jirrappreżenta l-​patt il-​ġdid konfermat b’demmi li se jixxerred għalikom.” Sar dak il-​kies verament “il-​patt il-​ġdid”? Dan ma setax ikun, ladarba patt huwa ftehim, mhux oġġett materjali.

Għalhekk, kemm il-​ħobż u kemm l-​inbid huma biss simboli. Il-​ħobż jissimbolizza l-​ġisem perfett taʼ Kristu. Ġesù uża ħobża li kien fadal mill-​ikla tal-​Qbiż. Il-​ħobża kienet magħmula mingħajr ebda ħmira. (Eżodu 12:8) Il-​Bibbja spiss tuża l-​ħmira bħala simbolu tad-​dnub jew tal-​ħażen. Il-​ħobż għalhekk jirrappreżenta l-​ġisem perfett li ssagrifika Ġesù. Kien ħieles mid-​dnub.​—Mattew 16:​11, 12; 1 Korintin 5:​6, 7; 1 Pietru 2:​22; 1 Ġwanni 2:​1, 2.

L-inbid aħmar jirrappreżenta d-​demm taʼ Ġesù. Dak id-​demm jagħmel validu l-​patt il-​ġdid. Ġesù qal li demmu xxerred “għall-​maħfra tad-​dnubiet.” B’hekk, il-​bnedmin jistgħu jsiru nodfa f’għajnejn Alla u jistgħu jidħlu f’patt ġdid maʼ Ġeħova. (Ebrej 9:14; 10:​16, 17) Dan il-​patt, jew kuntratt, jagħmilha possibbli biex 144,000 Kristjan leali jmorru s-​sema. Hemmhekk huma se jaqdu bħala slaten u qassisin għall-​barka taʼ l-​umanità kollha.​—Ġenesi 22:18; Ġeremija 31:​31-33; 1 Pietru 2:9; Rivelazzjoni 5:​9, 10; 14:​1-3.

Min għandu jieħu minn dawn l-​emblemi tat-​Tifkira? B’mod loġiku, dawk biss fil-​patt il-​ġdid​—jiġifieri, dawk li għandhom it-​tama li jmorru s-​sema​—għandhom jieħdu mill-​ħobż u l-​inbid. L-​ispirtu qaddis t’Alla jikkonvinċi lil uħud bħal dawn li huma ntgħażlu biex ikunu slaten fis-​sema. (Rumani 8:​16) Huma jinsabu wkoll fil-​patt tas-​Saltna maʼ Ġesù.​—Luqa 22:29.

 Xi ngħidu għal dawk li għandhom it-​tama li jgħixu għal dejjem f’Ġenna fuq l-​art? Dawn jobdu l-​kmand taʼ Ġesù u jattendu għall-​Ikla taʼ fil-​Għaxija tal-​Mulej, imma jmorru bħala osservaturi biex juru r-​rispett tagħhom, u mhux biex jieħdu sehem. Darba fis-​sena wara nżul ix-​xemx fl-​14 taʼ Nisan, ix-​Xhieda taʼ Ġeħova jiċċelebraw l-​Ikla taʼ fil-​Għaxija tal-​Mulej. Għalkemm ftit eluf biss madwar id-​dinja jistqarru li għandhom it-​tama għas-​sema, din iċ-​ċelebrazzjoni hija prezzjuża għall-​Kristjani kollha. Din hija okkażjoni fejn ilkoll kemm aħna nistgħu naħsbu dwar l-​imħabba li ma bħalha t’Alla Ġeħova u Ġesù Kristu.​—Ġwanni 3:​16.