AKIN kichiuaj kemej Cristo kiselijkej tanauatil maj kichiuakan ‘itakualis toTekotsin’ (1 Corintios 11:20). No motokaytia: ijkuak tikelnamikij imikilis Cristo. ¿Keyej motelneki nejin talnamikilis? ¿Kemanian uan keniuj moneki tikchiuaskej?

Jesucristo kipeualtij itech youak keman kichiujkej ininPascua judíos, itech xiuit 33.  Pascua katka se talnamikilis tein kichiuayaj sepa xiuit, itech tonal 14 metsti judío nisán. Nejon metsti peuaya keman yekinika uelia moitaya selik metsti, tepitsin satepan keman panouaya iyekinika semana marzo. Judíos sayoj kipouayaj maj panouani 13 tonalmej, uan ijkuakya kipeualtiayaj Pascua.

Nejon youak, Jesús kichiuak Pascua iniuan itatitaniluan. Ompa, kiluij Judas Iscariote maj kisa uan satepan kipeualtij iTakualis toTekotsin. Nejin takualis kiixpatak Pascua tein kipiayaj judíos, uan yejua ika moneki se kichiuas xijxiujtika.

IEvangelio Mateo kimelaua tein mochiuak: ‘Jesús kikuik in pan uan kitasojkamachilij Iueyitajtsin, kikojkotonak uan kinmajmakak imomachtijkauan. Uan kinilij: “Xikuakan [...]; yejua ne nonakayo”. Ompa kikuik se vaso de vino uan kitasojkamachilij Iueyitajtsin. Kinmajmakak uan kinilij: “Xitayikan [...] nochi namejuan. Porin nijin vino yejua ne noesyotsin. Uan ika nijin vino kitenextia ke nimoyektenkauka ya iuan Notajtsin Dios de ke mimilauis noesyotsin, para ke ijkon ixnesis ke Dios kintapojpoluia miakke den tajtakolejke”’ (Mateo 26:26-28).

Sekin kinemiliaj ke Jesús yekmelauj kichiuak maj pan mokepa inakayo uan vino maj mokepa iesyo. Sayoj ke inakayo Jesús ajsitoya keman kixeloj pan. Yejua ika, ¿uelis tikijtoskej ke tatitanilmej yekmelauj kikuajkej inakayo uan tayikej iesyo? Amo, ta komo ijkon kichiuaskiaj, kikuajtoskiaj inakayo se aksa uan no kitapanauiliskiaj itanauatil Dios (Génesis 9:3, 4; Levítico 17:10). Jesús kijtoj: “Nejin copa kijtosneki yankuik netenkaualis ika noesyo, tein namoka toyauiti” (Lucas 22:20, TNM). ¿Yekmelauj copa mochiuak “yankuik netenkaualis”? Amo, nejon amo keman ueli mochiua, ta se netenkaualis amo ueli se kimatoka kemej se teisa.

Yejua ika, pan uan vino sayoj mokui kemej neskayomej. Pan kiixnextia inakayo Cristo tein amo kipiaya tajtakol. Jesús kikuik pan tein mokauak itech Pascua takualis, tein amo kipiaya nion se taman tein kixokoltiskia (Éxodo 12:8). Tein taxokoltia, Biblia miakpa ika kiixnextia tajtakol uan tein kichiua maj moauilo teisa. Yejua ika, pan kiixnextia inakayo Jesús tein kitemakak tein  amo kipiaya tajtakol (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vino chichiltik kiixnextia iesyo Jesús, tein ika peua yankuik netenkaualis. Jesús kinextij ke toyauiskia iesyo uan ika nejon ‘Dios kintapojpoluiskia miakej tajtakolejkej’. Ika iesyo Jesús, Dios kinita chipaujkej sekin taltikpakneminij uan pouij itech yankuik netenkaualis iuan Jiova (Hebreos 9:14; 10:16, 17). Nejin netenkaualis kichiua maj yakan iluikak 144,000 akin kichiuaj kemej Cristo uan amo kikauaj Dios. Ompa yeskij tekiuanij uan tiopixkamej akin kinualkuiliskej tein kuali taltikpakneminij (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Akonimej kinnamiki maj kikuakan pan uan maj tayikan vino tein mokui kemej neskayomej itech Talnamikilis? Kemej tikitakejya, sayoj akin pouij itech yankuik netenkaualis, tein kijtosneki, akin kichiaj yaskej iluikak. Iyektikatsin espíritu Dios kinyekmatiltia ke kinixpejpenkej maj mochiuakan tekiuanij ne iluikak (Romanos 8:16). Yejuan no pouij itech netenkaualis tein kichiuak Jesús maj iuan tekiuajtikan itech iTekiuajyo Dios (Lucas 22:29).

Axkan, ¿toni kichiuaj akin kichiaj nemiskej nochipaya itech se xochital? Ijkon kemej Jesús tanauatij, youij itech iTakualis toTekotsin uan yetoskej ompa kinextiaj poujkaitalis, maski amo kikuaj pan uan amo tayij vino. Itaixpantijkauan Jiova kichiuaj iTakualis toTekotsin sepa xiuit, satepan keman motatia Tonaltsin uan keman peua tonal 14 metsti nisán. Maski semanauak taltikpak moajsij sayoj seki miles akin kiyekmatij ke yatij iluikak, nochin akin kichiuaj kemej Cristo kiitaj ke motelneki nejon talnamikilis. Se tonal kampa uelij itech tanemiliaj ueyi netasojtalis tein Jiova Dios uan Jesucristo kinextiaj (Juan 3:16).