KUA poaki e tau Kerisiano ke taute e Fakamanatuaga he matulei he Keriso. Ko e fakamanatuaga nei kua ui foki ko e ‘kaiaga afiafi he Iki.’ (1 Korinito 11:20) Ko e ha ne aoga lahi ai? A fe mo e puhala fe ka fakamanatu ai?

Ne fakatū e Iesu Keriso e fakamanatuaga nei he pō he Paseka faka-Iutaia he 33 V.N. Kua taute e Paseka lagataha he tau, he Nisana he aho 14 aki he mahina faka-Iutaia. Ke fuafua e aho ia, ne fakatali mooli e tau Iutaia ke he aho he vahā tau tupu ne ha ha ai 12 e matahola he aho mo e 12 e matahola he pō. Ko e kitiaaga fakamua he mahina foou ne tata lahi atu ke he aho tau tupu nei kua fakamailoga e aho fakamua he Nisana. Hoko mai ai e Paseka he 13 e aho he mole.

Ne fakamanatu e Iesu e Paseka mo e tau aposetolo haana, fekau a Iuta Isakariota ke fano, ato fakatū e Kaiaga Afiafi he Iki. Kua hukui he kaiaga nei e Paseka faka-Iutaia ti kua lata ni ke fakamanatu lagataha he tau.

 Ne talamai he Evagelia ha Mataio: “Ti toto ai e Iesu e areto, mo e fakaaue, ti tofitofi, mo e age ke he tau tutaki, kua pehe age, Kia toto a mo e kai; ko e haku a tino a enei. Kua toto foki e ia e kapiniu, mo e fakaaue; ti age ai e ia kia lautolu, kua pehe age, Kia inu ai a a mutolu oti kana; ha ko e haku a toto a enei, ko e toto he maveheaga fou, kua fakamaligi mo e tau tagata tokologa ke fakamagalo aki e tau hala.”—Mataio 26:26-28.

Kua manatu falu ne fakafaliu e Iesu e areto ke he tino haana mo e uaina ke he haana toto. Ka kua mau katoatoa agaia e tino ha Iesu he magaaho ne foaki e ia e areto nei. Kua kai mooli kia he tau aposetolo ha Iesu e tino haana mo e inu e toto haana? Nakai, ha ko e kai tagata a ia mo e holitū e matafakatufono he Atua. (Kenese 9:3, 4; Levitika 17:10) Hagaao ke he Luka 22:20, ne pehē a Iesu: “Ko e kapiniu nai, ko e maveheaga fou ia ke he haku a toto, kua fakamaligi ma mutolu.” Ti kua eke mooli kia e kapiniu ia “ko e maveheaga fou”? Kua nakai maeke e mena ia, ha ko e maveheaga ko e mena ne talia, nakai ko e koloa.

Ati, ko e areto mo e uaina ko e tau mena fakatai hokoia. Ne fakamailoga he areto e tino mitaki katoatoa he Keriso. Ne fakaaoga e Iesu e areto ne toe mai he kaiaga he Paseka. Kua nakai fai fakaea ne tao aki e areto. (Esoto 12:8) Ne fa fakaaoga he Tohi Tapu e fakaea ke fakamailoga aki e hala po ke kelea. Kua hukui ai he areto e tino mitaki katoatoa ne poa e Iesu. Kua atāina mai he hala.—Mataio 16:11, 12; 1 Korinito 5:6, 7; 1 Peteru 2:22; 1 Ioane 2:1, 2.

Ne hukui he uaina kula e toto ha Iesu. Ko e toto ia ne fakamooli ai e maveheaga foou. Ne talahau e Iesu kua fakamaligi e toto haana “ke fakamagalo aki e tau hala.” Ati maeke he tau tagata ke moua e tuaga meā ki mua he Atua mo e maeke ke huhū atu ke he maveheaga foou mo Iehova. (Heperu 9:14; 10:16, 17) Ko e maveheaga nei, po ke konotuleke, ati maeke ai he tau Kerisiano tua fakamooli ne 144,000 ke o hake ke he lagi. To eke a lautolu mo tau patuiki mo e tau ekepoa ke fakamonuina e tau tagata oti kana.—Kenese 22:18; Ieremia 31:31-33; 1 Peteru 2:9; Fakakiteaga 5:9, 10; 14:1-3.

 Ko hai ka fakalataha ke he tau mena fakatai nei he Fakamanatuaga? Maama ai, ko lautolu ni he maveheaga foou—ko lautolu haia ne moua e amaamanakiaga ke o hake ke he lagi—kua lata ke kai e areto mo e inu e uaina. Kua taute he agaaga tapu he Atua a lautolu ia ke talitonu kua fifili a lautolu ke eke mo tau patuiki i luga he lagi. (Roma 8:16) Kua ha ha ai foki a lautolu ke he maveheaga he Kautu mo Iesu.—Luka 22:29.

Ka e kua a lautolu ne moua e amaamanakiaga ke moui tukulagi he Parataiso he lalolagi? Kua omaoma a lautolu ke he poaki ha Iesu ke fakamanatu e Kaiaga Afiafi he Iki, ka e o atu a lautolu ke fanogonogo fakalilifu, nakai ke kai po ke inu. Lagataha he tau, he mole e tōaga laā he Nisana 14, ne fakamanatu he Tau Fakamoli a Iehova e Kaiaga Afiafi he Iki. Pete kua fiha ni e afe tagata he lalolagi katoa ne talahau ke moua e amaamanakiaga ke he lagi, nukua uho e fakamanatuaga nei ke he tau Kerisiano oti kana. Ko e magaaho ke manamanatu e tau tagata oti kana ke he fakaalofa mua ue atu ha Iehova ko e Atua mo Iesu Keriso.—Ioane 3:16.