OVAKRISTAU vatumwa okuhinangela ononkhia mba Kristu. Otyipito otyo, tupu tyiihanwa okuti ‘Ondalelo ya Tatekulu’. (1 Coríntios 11:20) Omokonda yatyi otyipito otyo tyakolela unene? Onalupi tyina yokulingwa? Iya oñgeni tyina yokulingwa?

Jesus Kristu wahimbika otyipito otyo, kounthiki wo Pasikwa yova Judeu menima 33 Pomuvo wa Kristu. O Pasikwa yo va Judeu ankho ilingwa vala like menima, monthiki 14 mohanyi yo Nisan. Pala okuholovona onthiki oyo, ova Judeu ankho vakevelela omuvo una otyinthiki notyitenya vikala no noola mbulifwe. Onthiki oyo, otyitenya tyikala no noola 12, iya otyinthiki natyo tyikala no noola 12. Tyina ohanyi iviala, monthiki oyo, otyo ohanyi yo Nisan ihimbika. Iya tyina pamalambe ononthiki 14, otyo ankho valia o Pasikwa, putyina ekumbi liamanyingila.

Jesus walia o Pasikwa nono apostolu mbae. Konyima, walekela Judas Iskariote iya ahimbika Ondalelo ya Tatekulu. Ondalelo oyo yapinga po Pasikwa yova Judeu. Moluotyo, Ondalelo oyo, ina yokulingwa vala like menima.

Omukanda wa Mateusi utupopila okuti: “Jesus wapola ombolo elikuambela, iya eivembaula  eiyavela ovalongwa vae ati: ‘Tambulei, liei. Etyi tyilekesa olutu luange’. Tupu, Jesus wapola okopo, alingi elikuambelo, iya eiyavela ovalongwa, ati: ‘Nueiko amuho, mokonda etyi tyilekesa ohonde yange yomphango, maimomeswa pala ovanthu ovanyingi, opo vaevelwe ononkhali mbavo’”.—Mateus 26:26-28.

Vamue vati, Jesus wapilululile ombolo ohitu yae, iya ovinyu eipilulula ohonde yae. Mahi, puetyi Jesus aava ombolo oyo, olutu lwae ankho unalo aluho. Okuti ono apostolu mba Jesus valile umue ohitu ya Jesus no kunwa ohonde yae? Au, mokonda inkha vetyilingile ñgeno valinga onkhali movitumino via Huku. (Gênesis 9:3, 4; Levítico 17:10) Momukanda wa Lucas 22:20, Jesus wati: “Okopo ei ilekesa omphango omphe mailingwa nohonde yange maimomeswa mokonda yenyi”. Okuti okopo yatyo oyo, ankho oyo yakala umue ‘omphango omphe’? Au, otyo katyitavela, mokonda omphango omulao omunthu alinga namukuavo. Hatyipuka tyimue tyipondola okukuatwa.

Ngotyo, ombolo novinyu ankho ovilekeso vala. Ombolo otyilekeso tyolutu lua Kristu luhena onkhali. Jesus waundapesile ombolo yahupile ko Pasikwa. Ombolo oyo ankho ilingwa tyihena onkhiso. (Êxodo 12:8) Ombimbiliya yundapesa onkhiso ngotyilekeso tyonkhali. Moluotyo, ombolo ilekesa olutu luafwapo Jesus aava ngotyilikutila. Olutu olo, ankho lutupu onkhali.—Mateus 16:11, 12; 1 Coríntios 5:6, 7; 1 Pedro 2:22; 1 João 2:1, 2.

Ovinyu yotindu ilekesa ohonde ya Jesus. Ohonde oyo, yaavela esilivilo omphango omphe. Jesus wapopia okuti ohonde yae yamomeswa ‘pala eevelo liononkhali’. Mokonda yohonde ya Jesus, ovanthu vapondola okukala vasukuka komaiho a Huku, nokunyingila momphango omphe na Jeova. (Hebreus 9:14; 10:16, 17) Omphango oyo, yaikula ondyila opo Ovakristau 144.000 vaye keulu. Keulu mavakaundapa ngo nohamba no no saserdote, opo vakaavele ononkhano onongwa ovanthu aveho vokuetavela Huku pano pohi.—Gênesis 22:18; Jeremias 31:31-33; 1 Pedro 2:9; Revelação [Apocalipse] 5:9, 10; 14:1-3.

Ovalie vapondola okulia kombolo no kunwa kovinyu pehinangelo liononkhia mba Jesus? Ovovana vala valinga onthele momphango omphe, vokuna ekevelelo liokuenda keulu. Ovo vala vapondola okulia ombolo nokunwa ovinyu. Ospilitu sandu ya Huku iveavela oumbangi wokuti vaholovonwa pala  okukakala onohamba keulu. (Romanos 8:16) Tupu, vekahi momphango Youhamba kumue na Jesus.—Lucas 22:29.

Okuti vokuna ekevelelo liomuenyo wahapu mouye omupe pano pohi, navo valia kombolo novinyu? Au, Ovakristau ovo vatavela otyitumino tya Jesus tyokukala Pehinangelo Liondalelo ya Tatekulu. Mahi, kavali ombolo tupu kavanu ovinyu. Onombangi mba Jeova, valinga Ondalelo ya Tatekulu like menima, mo 14 yo Nisan putyina ekumbi liamanyingila. Namphila mouye auho muna vala Ovakristau vehehi vokuna ekevelelo liokuenda keulu, mahi, otyipito otyo, tyakolela pala Ovakristau aveho. Mokonda oo, omuvo pala Ovakristau aveho vahinangele oluembia olunene lua Jeova Huku no lua Jesus Kristu.—João 3:16.