A REKRISTIANO a kirir el mengedaol er a kodellel a Jesus. Tia okedongall el “Chedaol Belsoil” er a Rubak. (1 Korinth 11:20) Ngera uchul me  ngkmal klou a ultutelel? Ngoingerang e mekerang a dongetmokl er ngii?

A Jesus Kristus a kiltmeklii tia el tekoi er sel kesus er a Baskua er a Rechijudea er a rak er a 33 C.E. A Baskua a lulengedaol er ngii el ta el taem er a chelsel a ta el rak er a 14 el kebesengil a Nisan, el buil er a Rechijudea. Me a Rechijudea a milengiil el mo er sel sils el ngii a mle 12 el sikang a llomes e 12 el sikang a klebesei me bo lodengei el kmo tia el buil ngulemuchel er oingerang. E a kot el tab el buil er a uriul er tia el sils a mle uchelel a buil el Nisan. Me a 13 el klebesei er a uriul, e te milengetmokl er a Baskua er a uriul er a lengelt a sils.

A Jesus a milengedaol er a Baskua ngii me a rechapostol er ngii, e a uriul e ngdilu er a Judas Iskariot me ngmerael. E mocha kutmeklii a Chedaol Belsoil er a Rubak. Tia el Belsoil a miltechir a Baskua me a uchul e kede meruul er ngii el di tang er a ta el rak.

A Ebangkelio er a Mateus a kmo: “A Jesus a ngiluu a telkib er a blauang, e milluluuch el mereng a sulel a Dios, e milechedii, e nguu el mesterir a rubengkel. Ng dilu el kmo, ‘Mnguu me monga er ngii e tia ia bedengek.’ E sola e ngiluu a kob, e mirreng a sulel a Dios, e nguu el mesterir, e dilu el kmo, ‘Molim er ngii kemiu el rokui; e tia ia rsechek el melisiich er a telbilel a Dios. Ngiil rsechek a mo metenget el kirir a re betok el chad el kirel el melubet a klengit.’”​—Mateus 26:26-28.

A rebebil a oumerang el kmo a Jesus a milult a blauang el mo bedengel e dirrek el milult a bilong el mo rsechel. Engdi a bedengel a Jesus a dimlak a dibus er ngii er sel taem er a lebilsterir a blauang. A rechapostol er a Jesus te mera el milenga er a bedengel e melim er a rsechel? Ngdiak, e le tia mo belkul a kmo te milenga er a rechad e tia millemall a llechul a Dios. (Genesis 9:3, 4; Levitikus 17:10) Ngar er a Lukas 22:20 e a Jesus a dilu el kmo: “Tial kob a beches el telbilel a Dios el mo mutebechel er a rsechek el mo modars el kiriu.” Me tia el kob, ngmera el mlo ‘beches el telbiil’? Ngkmal diak e le telbiil a diak el klalo.

 Me nguaisei, a blauang me a bilong a di okesiu. A blauang a okesiul a bedengel a Jesus el mle cherrungel. A Jesus a uluusbech aike el blauang el mlo derengel a belsoil er a Baskua. Tia el blauang a dimlak a omkukel. (Exodus 12:8) A Biblia a blechoel el ousbech er a omkukel a blauang el okesiul a klengit. Me a blauang a mle okesiul a cherrungel el bedengel a Jesus el letilengetengii el dimlak a klengit er ngii.​—Mateus 16:11, 12; 1 Korinth 5:6, 7; 1 Petrus 2:22; 1 Johanes 2:1, 2.

Me a bekerkard el bilong a mle okesiul a rsechel a Jesus. Tia el rsechel a ulterekeklii sel beches el telbiil. A Jesus a dilu el kmo, a rsechel a mloitel el kirel el “melubet a klengit.” Me a rechad a sebechir el mo klikiid er a osengel a Dios e mo chedal a beches el telbiil el obengkel a Jehovah. (Hebru 9:14; 10:16, 17) Tia el telbiil a uchul me ngsebechir a re 144,000 el blak a rengrir el Kristiano el mo er a eanged. Ngar er a eanged e te mo mesiou el king e prist el ngii a mo uchul a klengeltengat el mo er a rokui el chad el kiei er a chutem.​—Genesis 22:18; Jeremia 31:31-33; 1 Petrus 2:9; Ocholt 5:9, 10; 14:1-3.

Me te rua techang a sebechir el menga e melim er a Chedaol Belsoil? Ngdi tirke el chedal a beches el telbiil el tir a oba omelatk el mo kiei er a eanged, a sebechir el menga blauang e melim a bilong. A chedaol reng er a Dios a mla oterekokl a rengrir el kmo, te mla mengilt el mo ta er tirke el mo king el ngar er a eanged. (Rom 8:16) Te dirrek el mo chedal a telbiil el kirel a Renged el obengkel a Jesus.​—Lukas 22:29, BT.

E tirke el oba omelatk el mo kiei el mo cherechar el ngar er a Baradis el chutem? Te olengesenges er a Jesus me te mo er a Chedaol Belsoil er a Rubak engdi te diak el longang a blauang me a lechub e lolim a bilong. A ta er a ta el rak, el ngii a uriul er a lengelt a sils er a Nisan 14, e a Resioning er a Jehovah a mengedaol er a Chedaol Belsoil er a Rubak. Me alta ngmeliuekl er a beluulechad el rokir e te di kesai el telael a kmo te oba omelatk el mo er a eanged, engdi omengedolel tia el sils a kmal mekreos er a rengrir a rokui el Kristiano. Tia sel taem el rokui a sebechir el mo dmolech el melebedebek er a klou el olechotel a bltkil a rengul a Jehovah me a Jesus Kristus el kirir a rokui el chad.​—Johanes 3:16.