KRISTONS risibi ordi pa komemora mortu di Kristu. Es komemorason comadu tambi di “Sia di Siñor.” (1 Koríntius 11:20) Ke ku manda i importanti dimas? Kal tempu ki dibi di fasidu i di kal manera?

Jesus Kristu da inisiu pa es iventu na noiti di Paskua Judeu na 33 E.K. Paskua seduba un selebrason ku ta fasiduba un bias kada anu, na dia 14 di mis Judeu, Nisan. Mis di Nisan ta kumsa ora ki lua nobu ojadu. Utru ora, dipus di purmeru sumana di Marsu. Dipus, Judeus ta konta 13 dias pa fasi paskua.

Jesus selebra Paskua ku si apostulus, i disa Judas Iskariotis sai, dipus i da inisiu pa Sia di Siñor. Es sia toma lugar di Paskua Judeu, pa kila, i dibi di fasidu un bias kada anu.

Ivanjeliu di Mateus fala: ‘Jesus toma pon, i ora riba del, i kebral, i da si disipulus, i fala: ‘Bo toma, bo kume; es signifika ña  kurpu.’ Dipus, i toma kopu, i  fala Deus obrigadu, i da elis, i fala: ‘Abos tudu bo bibi nel, pabia es signifika ña sangi, sangi di kontratu, ku na darmadu pa manga di jintis, pa purdon di pekadus.’ — Mateus 26:26-28.

Alguns ta pensa kuma Jesus bidanta pon na si propi karni i viñu na si sangi. Ma, Jesus ka muriba inda oca i da es pon. Sera ki apostulus di Jesus na bardadi kume si propi karni i bibi si sangi? Nau, pabia kila na seduba kume pekadur, i un violason di lei di Deus. (Kumsada 9:3, 4; Sirmonias 17:10) Sugundu Lukas 22:20, Jesus fala: ‘E kopu signifika nobu kontratu seladu ku ña sangi ku na darmadu pa bos.’ Sera ki kil kopu torna “nobu kontratu” na sintidu literal? Kila ka pudiba sedu pabia, kontratu i un akordu, i ka un kusa ku pudi pegadu.

Asin, pon ku viñu i simplis simbulus. Pon ta simbolisa kurpu perfeitu di Kristu. Jesus usaba pon di sia di Paskua ku sobra. Pon fasidu sin fermentu. (Saida 12:8) Manga di bias Biblia ta usa fermentu suma simbulu di pekadu o kurupson. Asin, pon representa kurpu perfeitu ku Jesus sakrifika. I staba livri di pekadu. — Mateus 16:11, 12; 1 Koríntius 5:6, 7; 1 Pedru 2:22; 1 Jon 2:1, 2.

Viñu tintu representa sangi di Jesus. Ki sangi ku pui pa i ten nobu kontratu. Jesus fala ki, si sangi darmadu pa “purdon di pekadus.” Asin, pekaduris pudi torna limpu na ujus di Deus, i e pudi fasi parti di nobu kontratu ku Jeova. (Ebreus 9:14; 10:16, 17) Es kontratu torna pusivel pa 144.000 kristons fiel pudi bai pa seu. La, e na sirbi suma reis i saserdotis pa benefisiu di tudu pekaduris. — Kumsada 22:18; Jeremias 31:31-33; 1 Pedru 2:9; Apokalipsi 5:9, 10; 14:1-3.

Kin ki dibi di kume i bibi es simbulus ku ta usadu na Memorial? Sin duvida, i so kilis ku fasi parti di nobu kontratu — ku sedu, kilis ku tene speransa di bai pa seu — ku dibi di kume pon i bibi viñu. Spiritu santu di Deus ta konvensi elis di kuma e kujidu pa sedu reis na seu.  (Romanus 8:16) E fasi tambi parti di kontratu di Renu ku Jesus. — Lukas 22:29.

Ke gora di kilis ku tene speransa di vivi pa sempri na Paraisu li na Tera? E ta obdisi ordi di Jesus i e ta mati Sia di Siñor, ma e ta bai suma jintis ku na observa ku rispitu, e ka ta kume pon i bibi viñu. Un bias kada anu, dipus di sol kai, na 14 di Nisan, Tustumuñas di Jeova ta komemora Sia di Siñor. So puku jintis na mundu ntidu ku afirma tene speransa di bai vivi na seu, ma mesmu asin, es komemorason i importanti pa tudu kristons. I un mumentu nunde ku tudu jintis pudi rifliti na amor garandi di Jeova Deus ku di Jesus Kristu. — Jon 3:16.