RASUMPËPA cristianokunaqa Jesuspa wanïnin Yarpë mandätotam chaskiyashqa, tsëllatam hina “Santa Sena” o Señorpa Cënan nishpa qayayan (1 Corintios 11:20). ¿Imanirtaq alläpa preciso kë yarpëqa? ¿Imëtaq y imanötaq këtaqa rurayanman?

Tsë 33 Pascua judía watachömi kikin Jesucristu patsätserqan kë celebraciontaqa. Tsë Pascua fiestataqa huk kutillam celebrayaq watachö y 14 de nisán nishqanchömi rataq (judiokunapa calendarionchö). Judïokunaqa kë fëchata tanteayaq primavërachö rataq equinoccio nishqampita patsëmi, kë equinoccioqa, chunka ishkë horayoq paqas y chunka ishkë horayoq hunaq kaptinmi. Primavërachö equinocciopita más amänun kaq llullu killa rikakäramonqampitam tsë nisán killaqa qallaq. Tsë llullu killa rikakonqan hunaq Inti o Rupay ullurenqampita patsë chunka kima hunaq pasariptinllanam Pascua hunaq qallaq.

 Tsë ampim Jesusqa apostolninkunawan celebrayarqan Pascuata y tsëpitanam Judas Iscarioteta qarqaramur Señorpa Cënan nishqan celebracionta patsäratserqan. Kë celebracionmi, Pascua judía nishqan celebracionpa rantin quedarerqan, tsëmi kë Señorpa Cënan nishqanqa watachö huk kutilla celebrakänan.

Mateo nishqan evangeliom nimantsik imanö kanqanta: “Tantata Jesus tsarircur Diosta ‘grasias’ nicurerqan. Tsepitanam tantata paquirir, disipuluncunata qorqan queno nishpa: —Que tantata micuyë. Queqa noqapa cuerpü [“ninanmi”, NM]—nishpa. Tsepitanam binuyoq copata tsarircur Diosta ‘grasias’ nicurir disipuluncunata qorerqan queno nishpa: ‘Queta llapequi uputsinacuyë. —Queqa noqapa yawarnï [“ninanmi”, NM]. Que yawarnïwanmi mushoq contratu ruracärin. Noqam yawarnïta ramarnin, wanushaq atscaq nunacunapaq. Tsenopam jutsancuna perdonashqa canqa’” (Mateo 26:26-28).

Wakin nunakunaqa, ëtsantam tantaman y yawarnintam vïnoman tikratserqan nishpam creiyan. Tsënö creiyaptimpis Jesuspa cuerponqa entërom këkarqan, këmi “cuerpü” nishpa tantata pakikanqan hora. Tsëpenqa, ¿Jesuspa apostolninkunaqa ëtsantam mikuyarqan y yawarnintam upuyarqan nishwantsuraq? Manam, tsënö kashqa kaptenqa nunamayin mikoqchi kayanman karqan, y tsëtaqa Diosnintsik prohibinmi leyninkunachö (Génesis 9:3, 4; Levítico 17:10). Lucas 22:20 nishqanchömi Jesus nerqan: “Que copacho quecaq binoqa yawarnï [“ninanmi”, NM]; y tsë yawarnïwanmi Dios mushoq contratuta patsacäratsin nunacunawan. Tsëmi qamcunapaqrecur ramashqa canqa”.

Tsëmi kë tantawan vïnoqa significädoyoq kayan. Tantaqa Cristupa perfecto cuerpon ninanmi. Pascua cënapa katupin levadurannaq rurashqa tantawanmi Jesus celebrarqan (Éxodo 12:8). Bibliachöqa hutsatawanmi levadürata casi imëpis igualatsin. Tsënömi, tantaqa Jesucristupa mana hutsannaq sacrificanqan cuerpon ninan (Mateo 16:11, 12; 1 Corintios 5:6, 7; 1 Pedru 2:22; 1 Juan 2:1, 2).

Vïnoqa Jesuspa yawarnin cuentam, tsëmi mushoq contrato valoryoq tikrarerqan. Y “jutsancuna perdonashqa” kanampaqmi yawarnïta hichashaq nerqanmi Jesus. Tsërëkurmi wakin nunakunaqa limpio y puro kayan Jehová Diospa nawimpaq,  tsënöpam yëkuyan mushoq conträtoman (Hebreus 9:14; 10:16, 17). Tsë mushoq conträtorëkurmi 144.000 fiel cristianokuna cielota ëwayanqa. Tsëchömi kayanqa rey y sacerdote y Patsachö alli nunakunapaq bendicionkunata apayämonqa (Génesis 22:18; Jeremías 31:31-33; 1 Pedru 2:9; Apocalipsis 5:9, 10; 14:1-3).

¿Pikunataq tsë Jesuspa Wanïnim Yarpë celebracionchö tantata mikuyan y vïnota upuyan? Yachakonqantsiknöpis tantataqa mikuyanman y vïnotaqa upuyanman mushoq conträtoman yëkoqkunallam, o ciëloman ëwaqkunallam. Cielota ëwar akrashqa rey kayänampaqqa santu espïritum pëkunata alleq tanteatsin (Romanos 8:16). Hinamampis kë nunakunaqa Jesuswan gobernayämunampaq mushoq conträtomanmi yëkuyan (Lucas 22:29).

Pero ¿imataraq rurayanman paraïsoman tikrashqa Patsachö imëyaqpis kawëta munaqkunaqa? Jesus mandakonqannömi, vïnota mana upurnin o tanta mana mikurpis tsë Señorpa Cënan nishqan celebracionmanqa ëwayänan. Jehovapa testigonkunaqa watachö huk kutillam Señorpa Cënan nishqanta celebrayan, tsëtaqa rurayan Inti o Rupay ulluriptin 14 de nisán nishqan qallariptinmi. Hinantin Patsachö wallkaq nunakunalla ciëloman ëwaqpaq kayaptimpis, rasumpëpa cristianokunapaqqa alläpa precïsom kë celebración. Kë celebracionqa yanapamantsik Jehová Diospa y Jesucristupa hatun kuyakïninkunaman pensanapaqmi (Juan 3:16).