JESUSCA pai huañushcata yuyaringapaj tandanacuchun nishpami paita catijcunataca mandashca. Chaitaca ‘Jesús huañushcata yuyarishpa micuna’ tandanacui nishpapishmi shutichin (1 Corintios 11:20). ¿Chai tandanacuica imamantataj valishca can? ¿Ima punlla, ima hora, ima shinataj rurana canchij?

Chai tandanacuitaca 33 huatapi, judiocunapaj Pascua micuipimi Jesusca callarichirca. Pascua fiestataca huatapica shuj cutinllami rurajcuna carca. Judiocunaca paicunapaj calendariota catishpami primavera punllacunapi llullu luna ricurichun shuyajcuna carca. Llullu luna ricurijpi, punllapish 12 horasta, tutapish 12 horasta charijpimi nisán quilla callarij carca. Judiocunaca 14 de nisán punllapimi Inti huashicushca qˈuipa Pascua micuita rurajcuna carca.

Chai tutapimi Jesusca paita catijcunandij Pascua fiestata yuyarirca. Judas Iscariote llujshishca qˈuipami, Jesusca pai huañushcata yuyarina tandanacuita callarichirca. Chai tandanacuimi judiocunapaj Pascua fiestapaj randi can. Chaimantami Jesús huañushcataca huatapi shuj cutinlla tandanacushpa yuyarinchij.

Jesús imata rurashcata parlashpaca Mateo libropica cashnami nin: ‘Tandata japishpami Diosta pagui nirca. Chaita chaupishpa, paipaj yachacujcunaman cushpaca: “Japichij, micuichij, caica ñuca cuerpomi” nishpami curca. Copata japishpapish, Diosta pagui nishpami: “Cai copamanta tucuicuna ubyaichij  nishpa cushpaca, caica achcacunapaj juchacunata perdonangapaj mushuj ruranata callarichishcata ricuchij ñuca jichana yahuarmi”’ nircami (Mateo 26:26-28).

Huaquincunaca, tandataca paipaj aichata, cutin vinotaca paipaj yahuarta Jesús rurashcatami crincuna. Shinapish paipaj yachacujcunaman Jesús tandata cujpica Jesusca causacurcarajmi. Shinashpaca, ¿yachacujcunaca Jesuspaj aichatachu micurcacuna, Jesuspaj yahuartachu ubyarcacuna? Mana. Chaita rurashpaca Dios mandashcacunata mana cazushcatami ricuchinman carca (Génesis 9:3, 4; Levítico 17:10). Lucas 22:20-pica Jesusca: “Cai copaca, cancunamanta ñuca yahuarta jichashpa mushuj ari ninacushcata ricuchijmi” nircami. ¿Copaca “mushuj ari ninacushcachu” tucurca? Mana, ashtahuanpish pajtachina cashcata ricuchij yuyaimi carca.

Tandapish vinopish ari ninacushcata pajtachina cashcata ricunchingapajmi carca. Tandaca Jesuspaj aichatami ricuchirca. Pascuata micushca qˈuipaca levadura illaj tandata japishpami Jesusca paipaj yachacujcunaman curca (Éxodo 12:8). Huaquinpica levaduramanta parlashpaca jucha tiyashcatami Bibliapica ricuchin. Levadura illaj tandaca paipaj jucha illaj cuerpota Jesús huañushpa cuna cashcatami ricuchirca (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vinoca Jesuspaj yahuartami ricuchin. Chai yahuarmi ari ninacushcata pajtachina cashcata ricuchin. Jesusca “juchacunata perdonangapaj” ñuca jichana yahuarmi nircami. Jesús chaita rurashcamantami huaquin gentecunaca Diospaj ñaupajpi alli ricurishpa, mushuj ari ninacushcapi yaicuncuna (Hebreos 9:14; 10:16, 17). Chai ari ninacushcapica Jesusta alli catijcunapuramantami jahua pachaman ringapaj 144.000 agllashcacuna can. Jahua pachapica mandajcuna, curacuna cashpami cai Allpapi causajcunataca achcata bendicianga (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Jesús huañushcata yuyarina tandanacuipica picunataj tandata micuna can, vinotapish ubyana can? Caicama ricushca shinaca, jahua pachaman rinata shuyajcunallami tandata micuna can, vinotapish ubyana can. Jahua pachapi mandangapaj agllashca cashcata yachachunca Diospaj jucha illaj espiritumi paicunata ayudan (Romanos 8:16). Cai agllashca gentecunaca Jesushuan mandangapaj mushuj ari ninacushcapi cashcatapishmi ricuchin (Lucas 22:29).

 Shinashpaca, ¿paraíso Allpapi causagrij gentecunaca imatataj ruran? Paicunaca tandata mana micunchu, vinotapish mana ubyanchu. Shinapish Jesús mandashca shinami pai huañushcata respetohuan yuyaringapaj tandanacuncuna. Testigo de Jehovacunaca 14 de nisán punllapi, Inti huashicushca qˈuipa tandanacushpami huatapica shuj cutinlla Jesús huañushcata yuyarinchij. Jahua pachaman ringapaj muyundij Allpapi ashalla gentecuna tiyajpipish, tucuicunami Jesús huañushcata yuyarina canchij. Chai tandanacuica Jehová Diospish, Jesuspish achcata cˈuyashcata yuyaringapajmi ayudan (Juan 3:16).