CRISTOQ wañusqan P’unchayta Yuyarinankupaqmi cristianokuna kamachisqa karanku, chaytan sutichakullantaq ‘Señorpa Cenan’, nispa (1 Corintios 11:20). ¿Ima rayku chay p’unchay hatun p’unchay? ¿Hayk’aqtaq, imaynatataq ruwakunan?

Jesucriston chay yuyarina p’unchayta qallarichiran 33 watapi, judiokunaq Pascua nisqa fiestanku tutata. Pascua fiestataqa huk kutillatan watapi yuyarikuran 14 p’unchaypi nisán nisqa killapi. Nisán nisqa killaqa qallariran mosoq killa rikhurimuqtin, mosoq killataq rikhurimuran marzo killaq qallariy semana qhepata. Chaymantapachan judiokuna yupaqku chunka kinsayoq p’unchayta Pascua fiestata yuyarinankupaq.

Chay tutan Jesús apostolninkunawan Pascua fiestata yuyariranku, chay qhepamantaq Judas Iscarioteta kachapuspa Señorpa Cenan nisqata qallarichiran. Chay cenan Pascuaq rantin kapuran, chay raykun watapi huk kutillata yuyarina.

Mateo qelqan willan chaypi sucedesqanta: ‘Jesusqa t’antata hap’iykuspa Diosman graciasta qospa phasmirqan, hinaspan yachachisqankunaman qorqan: –Hap’iychis, mikhuychis, kayqa cuerpoymanmi [rikch’akun], nispa. Vinoyoq vasotapas hap’illarqantaq, hinaspan Diosman graciasta qospa paykunaman qorqan: –Llapaykichis kay vasomanta  ukyaychis, kayqa Diospa rimanakuyninta cheqaqchaq yawarniymi, askha runaq huchankuna pampachasqa kananpaqmi hich’asqa kanqa’, nispa (Mateo 26:26-28).

Wakinmi ninku, Jesusqa t’antatan aychanman tukuchiran, vinotataq yawarninman, nispa. Jesuspa cuerponmi ichaqa kaqlla kasharan t’anta haywasqan qhepaman. Chhaynaqa, ¿cheqaqtapunichu apostolninkuna Jesuspa aychanta mikhuranku yawarnintapas ukyaranku? Chayta ruwaspaqa runa mikhuq hinachá kankuman karan Diospa kamachikuynintataq mana kasukushankumanchu (Génesis 9:3, 4; Levítico 17:10). Lucas 22:20 textopi Jesús niran: “Kay vinoyoq vasoqa yawarniywan cheqaqchasqa mosoq rimanakuymi, ñoqan yawarniyta qankunarayku hich’asaq”, nispa. ¿Vasochu ‘mosoq rimanakuypi’ tukupuran? Rimanakuyqa manan vasochu nitaq imapaschu aswanpas acuerdo ruwaymi.

Chaymi t’antapas vinopas rikch’anachiylla. T’antaqa Cristoq ch’uya cuerponmanmi rikch’akun. Jesusqa Pascua fiestamanta mana qonchuyoq puchuq t’antatan hap’iran (Éxodo 12:8). Bibliaqa yaqa llapanpin qonchuta rikch’anachin huchawan otaq mana chanin ruwaywan. Chay raykun t’anta rikch’akun Jesuspa sacrificasqan mana huchayoq ch’uya cuerponman (Mateo 16:11, 12; 1 Corintios 5:6, 7; 1 Pedro 2:22; 1 Juan 2:1, 2).

Vinoqa Jesuspa yawarninmanmi rikch’akun, yawarnintaq mosoq rimanakuyta chaninchan. Jesusqa niranñan ‘huchakuna pampachasqa kananpaq’ yawarnin hich’arinanta. Chaywanmi wakin runakuna Jehová Diospaq ch’uya kapunku mosoq rimanakuyninpitaq kankupas (Hebreos 9:14; 10:16, 17). Chay rimanakuy ruwakusqanwanmi 144.000 cristianokuna hanaq pachaman rinqaku. Chaypin kanqaku kamachikuqkuna sacerdotekuna ima, llapa runakunata yanapanankupaq (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Pikunallan Jesuspa wañusqanta Yuyarina P’unchaypi t’antata mikhunanku vinotapas ukyananku? Yachasqanchis hina, mosoq rimanakuypi kaqkunallan, paykunaqa hanaq pachaman riqkunan. Diospa Santo espiritunmi sut’inchan hanaq pachapi kamachikuq kanankupaq akllasqa kasqankuta (Romanos  8:16). Chay runakunan mosoq rimanakuypi kasqanku rayku Jesuswan kuska kamachimunqaku (Lucas 22:29).

¿Imatataq ruwanku kay Hallp’api wiñay kawsayta suyakuqkuna? Jesuspa kamachikusqanta kasukuspan Señorpa Cenanman rinku, manaña imatapas mikhunkuchu chaypas, chaypi kasqankuwanmi rikuchinku chay p’unchay respetasqankuta. Jehová Diospa testigonkunan Señorpa Cenanta watapi huk kutillata yuyarinku, nisán killapi 14 p’unchayta, Intiq haykupusqan qhepaman. Hanaq pachaman ripuqkuna pisillaña kashanku chaypas, llapa cristianokunapaqmi chay p’unchayqa hatun p’unchay. Chay p’unchaymi Jehová Diospa Jesucristopa ancha hatun munakuyninkupi yuyaymananku (Juan 3:16).