NAMEA didy hankalaza ty Fahatiarova ty nahafatesa Kristy ty Kristiana. Kaihy koa hoe “Sakafo Hariva ty Tompo” raha io. (1 Korintianina 11:20) Manino raha zay ro vatan-draha? Ombia ty tokony hankalazà azy, le manao akory ty hanaova azy?

Nanomboky nanao fankalazà io Jesosy Kristy, tamy haly ty Paska jiosy tao 33. Indraiky santao ty nanaova raha zay, saky 14 Nisana, vola jiosy. Manao akory ty fikontea Jiosy reo daty io? Lafa 21 Marsa (na 22 Marsa), le misy 12 lera eo ho eo ty halava ty andro, le 12 lera koa ty haly. Ty im-bola voalohany mifankarìny marè amy andro io, ro voaloha ty vola Nisana. Nankalazà ty Paska, 13 andro tafarany zay.

Nankalaza Paska niaraky tamy apostoliny reo Jesosy, nandroaky Jodasy Iskariota, bakeo nanomboky ty Sakafo Hariva ty  Tompo. Solo ty Paska jiosy raha io, ka tokony hankalazà indraiky santao.

Hoy ty Filazantsara Matio: “Laha mbo nihina rozy, le nandramby mofo Jesosy. Lafa baka nivavaky ie, le nitampahiny mofo iny, ka nameany ty mpianatsy, sady hoy ty asany: ‘Rambeso raha toy, le hano. Toy ro vatako.’ Nandramby kopy koa ie, ka lafa baka nisaotsy a Ndranahary, le nameany an-drozy kopy iny, sady hoy ty asany: ‘Minòma amy toy nareo iaby. Fa toy ro lioko, le ty lio ty fifanekea, azy halatsaky ho ahy ty maro iny, ho fanengà hadisoa.’ ”—Matio 26:26-28.

Misy mino, fa novà Jesosy ho nofotsiny noho liony vatany mofo noho divay rey. Kanefa tsy nisy nangalà ty vata Jesosy, lafa nizara mofo iny ie. Nihina ty nofotsy Jesosy noho nino ty liony vatany va apostoliny reo? Aha, mandika ty lalàna Ndranahary rozy laha nanao raha zay, satria mitovy amy mihina olo. (Genesisy 9:3, 4; Levitikosy 17:10) Hoy Jesosy, araky ty Lioka 22:20: “Kopy toy ro fifanekea vaovao miory amy ty lioko, azy halatsaky ho ahinareo iny.” Kopy iny mihintsy va “fifanekea vaovao” io? Tsy ho mety laha zay ro ie, satria raha tsy hay rambesy tana ty fifanekea, na ty fifanaraha.

Midika zay, fa misy heviny an’ohatsy ty mofo noho ty divay. Mifanandrify amy ty vata lavorary nanana Kristy mofo iny. Amby ty mofo tamy sakafo Paska iny ro nampiasà Jesosy. Tsy nisy masirasira, na hoe lalivay mofo io. (Eksodosy 12:8) Matetiky ro ivolana ty fahotà na ty faharatia ty safà hoe lalivay amy Baiboly ao. Hita baka amy zay, fa mifanandrify amy ty vata lavorary natao Jesosy soro, mofo iny. Tsy nisy ota raha io.—Matio 16:11, 12; 1 Korintianina 5:6, 7; 1 Petera 2:22; 1 Jaona 2:1, 2.

Mifanandrify amy ty lio Jesosy divay mena iny. Liony io ro mahavy fifanekea vaovao iny hanan-kery. Nivola Jesosy hoe nandatsaky ty liony ie, mba hahavy ty olo hahazo “fanengà hadisoa.” Midika zay, fa afaky halio amaso  Ndranahary noho hilitsy amy fifanekea vaovao natao Jehovah io ty olo. (Hebreo 9:14; 10:16, 17) Mbo fifanekea io avao koa, ro nahavy ty Kristiana tsy mivaliky 144 000 ho afaky hanan-danitsy any. Ho mpanjaka noho mpisoro rozy lafa any, ka handay fitahia ho ahin’olo iaby.—Genesisy 22:18; Jeremia 31:31-33; 1 Petera 2:9; Apokalypsy 5:9, 10; 14:1-3.

Ia ty mahazo mihina amy mofo noho mino amy divay ty Fahatiarova? Ze tafilitsy anaty fifanekea vaovao io avao, tsy ia zay fa ze mitamà ho an-danitsy any. Ty fanahy masy Ndranahary ro ahaizan-drozy fa voafily ho mpanjaka ho an-danitsy any rozy. (Romanina 8:16) Nanaova Jesosy fifanekea mikasiky Fanjakà iny koa rozy.—Lioka 22:29.

Ka manao akory ty mikasiky ty olo mitamà hiay zisiky farany amy Paradisa an-tany etoa? Manoriky ty didy Jesosy rozy, ka mankalaza ty Sakafo Hariva ty Tompo. Fe tsy mihina amy mofo iny noho tsy mino amy divay iny rozy, fa manatriky amim-panajà avao. Mankalaza ty Sakafo Hariva ty Tompo indraiky santao ty Vavolombelo Jehovah, saky 14 Nisana afara ty filenteha masoandro. Atao ty Kristiana iaby vatan-draha fankalazà io, ndre an’arivony avao aza ty mivola fa mitamà hanan-danitsy any. Mahatiaro ty fitiava bevata natoro Jehovah noho Jesosy ty olo iaby, amy fotoa io.—Jaona 3:16.