I WA Mbakristu tindi ér ve Umbur ku u Kristu. Ka mkombo ne kpaa i yer ér “kwaghyan u umbur Ter” ye. (1 Mbakorinte 11:20) Er nan ve mkombo ne a lu hange hange? Ka hanma shighe nahan a fatyô u eren unu, man a er un nena?

Yesu Kristu yange ver mkombo ne hen tugh mbu i er iniongo i Paseka i Mbayuda i ken inyom i 33 S.W. la. Yange i eren iniongo i Paseka kwa môm ken inyom, sha uwer u Mbayuda u Nisan ayange 14. Mbayuda yange ve er nan ve ve zua a iyange nee? Ikyav tese ér yange ve kegh iyange i sev mbu a av sha shighe u urahe ve sev mbu a lihe a war kuman ahwa 12, tugh di kpa mbu a tsa nahan vough la. Iyange shon ne ia karen kera, uwer u he ua duen sha kwavaôndo vea nengen a nenge a mi nahan maa i lu mhii u uwer u Nisan je la. Ayange a̱ karen 14 yô maa ve er iniongo i paseka, shighe u iyange i mir kera yô.

Yesu yange ya Paseka ne a mbaapostoli nav imôngo, mba been yô maa a na Yuda Isekarioti ian ér a̱ yem, yemen kera yô maa a ver mkombo u Kwaghyan u Umbur Ter la. Kwaghyan ne kar tile sha ityough ki Paseka u Mbayuda eren la, nahan yô gba u un kpa a yaan un kwa môm tseegh ken inyom.

Ivangeli i Mateu kaa ér: “Yesu tôô bredi A sôn iveren i dedoo sha mi, A coon, A na mbahenen, A kaa er: Ngohol nen, ya nen, ka iyol Yam je ne. Shi A tôô iyongo, sughun yô, A na ve, A  kaa er: Ne cii ma nen shimi; gadia ka awambe Am a ikuryan je ne, a i hee a sha ci u ior kpishi sha u den asorabo.”—Mateu 26:26-28.

Mbagenev na jighjigh ér Yesu yange gema bredi la hingir iyol na kpôô kpôô, shi a gema wain la hingir awambe na. Nahan kpa, shighe u Yesu tôô bredi la coon na mbahenen nav la, iyol na lu her tsembelee, kwagh nzughul sha i ga. Mbaapostoli mba Yesu yange ve ya iyol na shi ve ma awambe na kpôô kpôô shinii? Ei, luun er yange vea er nahan yô, ngura ma lu u yaan inyam or je la, nahan ma ve lu peren tindi u Aôndo. (Genese 9:3, 4; Levitiku 17:10) Yesu kaa ken Luka 22:20 ér: “Iyongo ne ka ikuryan i he i ken awambe Am a i hee sha ci wen ne.” Iyongo i a er kwagh u i ne yange kôr i gema hingir “ikuryan i he” kpôô kpôô shinii? Kwagh a fatyô u eren nahan ga, gadia ikyuryan ka iceghzwa, ka ikyagh ki or a fatyô u benden ave sha mi kpôô kpôô ga.

Nahan yô, bredi man wain la ka di akaa a sha ikyav tsô. Bredi la tile sha ityough ki iyol i Kristu i vough la. Lu bredi u Yesu ya Paseka a mbahenen nav shi her la, tôô coon na ve, ve ya kwaghyan u umbur Ter la ye. I wa kwa sha bredi shon ga. (Ekesodu 12:8) Ken Bibilo yô, kwa tile sha ityough ki isholibo shin kwagh u hôôn. Nahan yô, bredi la tile sha ityough ki iyol i Yesu i vough, i yange na naagh a mi la. Iyol na ne lu a isholibo ga.—Mateu 16:11, 12; 1 Mbakorinte 5:6, 7; 1 Peteru 2:22; 1 Yohane 2:1, 2.

Wain u nyian la di tile sha ityough ki awambe a Yesu. Ka awambe shon a ne ve ikyuryan i he ne i hingir kwagh u injaa ye. Yesu kaa ér i haa awambe na inya ‘sha u den ior asorabo.’ Kwagh ne una wase uumace vea hingir wang sha ishigh ki Aôndo, nahan Yehova una ya ikyur i he la a ve. (Mbaheberu 9:14; 10:16, 17) Ikyuryan shin ityendezwa i Aôndo ne na yô hingir u Mbakristu mba jighjigh mbagenev iorov 144,000 vea yem sha. Vea za lu ator man upristi, nahan vea er akaa a dedoo sha ci u uumace jimin cii.—Genese 22:18; Yeremia 31:31-33; 1 Peteru 2:9; Mpase 5:9, 10; 14:1-3.

Ka unô i gbe u vea ya bredi shi vea ma wain laa? Sha jighilii yô, ka mba i ye ikyur i he ne a ve la tseegh—inja na yô, ka mba ve lu a ishimaverenkeghen i yemen sha la tseegh i gbe u vea ya bredi shi vea ma wain la kpaa ye. Icighan jijingi u Aôndo ngu a wase ve, nahan ve fa wanger wanger ér í tsua ve ér ve za tema ator sha.  (Mbaromanu 8:16) Yesu kpa ya ikyur i Tartor a mba ve lu yemen sha ne.—Luka 22:29.

Mba ve lu a ishimaveren i va lun ken Paradiso shin tar ne gbem sha won la di yô kwagh ve ngu nena? Ve kpaa mba kor tindi u Yesu ngise wa mbahenen nav sha kwagh u Kwaghyan u Umbur Ter la, nahan ka ve za mkombo ne, kpa i lu u za nengen a nenge tseegh, mba ye bredi shi mba me wain la ga. Mbashiada mba Yehova mba eren mkombo u Kwaghyan u Umbur Ter la kwa môm ken inyom, sha iyange i Nisan 14 aikighe, shighe u iyange i mir yô. Ka iorov udubu kpuaa tar sha won cii ve ye bredi shi ve me wain sha u tesen ér ve mba a ishimaveren i yemen sha ye, nahan kpa mkombo ne ngu Mbakristu jimin cii kwagh u inumbe ga. Ngu a na hanma or ian i hiden henen sha kwagh u dooshima u hemban cii u Yehova Aôndo man Yesu Kristu ve tese se la.—Yohane 3:16.