AKRISTO nɔmbamaka dia salaka Eohwelo ka nyɔi ka Kristo. Eohwelo kɛsɔ mbelamɛka ɔnɛ “Dambo dia dikɔlɔ dia Nkumadiɔndjɔ.” (1 Kɔrɛtɔ 11:20) Lande na kele dambo sɔ ohomba efula? Etena ndo woho akɔna wahombadiɔ salema?

Yeso Kristo akahɔhɔla dambo sɔ la dikɔlɔ dia lushi lakasalaka ase Juda Pasaka lo 33 T.D. Pasaka kakasalemaka mbala ɔtɔi l’ɔnɔnyi, lo ngɔndɔ k’ase Juda ka Nisana 14. Dia nkamba akumi wa mbeya datɛ sɔ, ondo ase Juda wakakokɛnga etenyi ka l’ɔnɔnyi kele otsho la yanyi wekɔ popo, mbuta ate oya lo Ngɔndɔ ka sato 21. Ɔsɔ ekɔ lushi lele yanyi ekɔ oko la wenya 12 ndo otsho oko wenya 12. Valelo ya ngɔndɔ ya ntondo yakaleke nsukana la lushi lɔsɔ mbakɛnyaka etatelo ka ngɔndɔ ka Nisana. Pasaka kakasalemaka nshi 14 oma lâsɔ l’ɔkɔngɔ wa ɛɔtwɛlɔ ka wonya.

Yeso akasale Pasaka l’apɔstɔlɔ ande. Oma lâsɔ, nde akatondja Judasɛ Iskariyɔtɛ ko akahɔhɔla Dambo dia dikɔlɔ dia Nkumadiɔndjɔ. Dambo sɔ diakahɛnɛ Pasaka ndo diakahombe salemaka mbala ɔtɔi l’ɔnɔnyi.

Evanjiliɔ wa Mateo mbutaka ɔnɛ: “Yeso akɔshi mapa ndo l’ɔkɔngɔ wa nde nsala dɔmbɛlɔ, nde akoohembola ko akasha ambeki ande, ata ate: ‘Nyɔshi, nyole. Mapa ɔnɛ wekɔ didjidji dia demba diami.’ Ndo nto, nde akɔshi dikɔhɔ dia vinyɔ ndo l’ɔkɔngɔ wa nde nsala dɔmbɛlɔ, nde akawashadiɔ, ata ate: ‘Nyɔnɔ nyu tshɛ, nɛ dia vinyɔ nyɛ yekɔ didjidji dia “dikila diami  dia sheke” diayotshulɔma lo wahɔ w’anto efula dikambo dia edimanyielo ka pɛkato yawɔ.’”​—Mateo 26:26-28.

Anto amɔtshi fɔnyaka dia Yeso akakadimola mapa demba diande dia mɛtɛ di’emunyi ndo akakadimola vinyɔ dikila diande. Koko, demba di’emunyi diaki Yeso diaki paka woho wakidiɔ etena kakandashaka ambeki ande mapa ɔsɔ. Onde ambeki waki Yeso wakale mɛtɛ demba di’emunyi diaki Yeso ndo wakanɔ dikila diande? Kema, nɛ dia ɔsɔ otonga ndɛ emunyi w’onto ndo osekwelo w’ɔlɛmbɛ waki Nzambi. (Etatelo 9:3, 4; Akambo w’ase Lɛwi 17:10) Lo ndjela Luka 22:20, Yeso akate ate: “Vinyɔ nyɛ nembetshiyaka sheke y’oyoyo yambodjama l’ekimanyielo ka dikila diami diayotshulɔma lo wahɔ anyu.” Onde dikɔhɔ sɔ diakakome “sheke y’oyoyo” ya mɛtɛ mɛtɛ? Dui sɔ kokoka salema, nɛ dia sheke yekɔ diokanelo, koko aha ɛngɔ kɛnama.

Mbokɛmaka hwe dia mapa la vinyɔ wekɔ tsho tolembetelo. Mapa wekɔ djembetelo ya demba diaki Kristo dia kokele. Yeso akakambe la mapa wakatshikala etena kakawasale dambo dia Pasaka. Mapa wakasalema aha la mbidja wodoya. (Etombelo 12:8) Bible kambaka mbala efula la wodoya oko djembetelo ya pɛkato. Omalɔkɔ, mapa wekɔ djembetelo ya demba dia kokele diakalambola Yeso. Diɔ komonga la pɛkato.​—Mateo 16:11, 12; 1 Kɔrɛtɔ 5:6, 7; 1 Petero 2:22; 1 Joani 2:1, 2.

Vinyɔ ya beela yekɔ djembetelo ya dikila dia Yeso. Dikila mbasha sheke y’oyoyo nɛmɔ. Yeso akate dia dikila diande diakatshulwama “dia edimanyielo ka pɛkato.” L’ɔkɔngɔ wa nde nsala dui sɔ, anto wakakoke nkoma pudipudi lo washo wa Nzambi ndo mbɔtɔ lo sheke y’oyoyo la Jehowa. (Hɛbɛru 9:14; 10:16, 17) Sheke kana kɔhi shɔ mbamboyokonya Akristo wa kɔlamelo 144 000 lo nkondja diɛsɛ dia ntshɔ otsha l’olongo. Vɔ wayotokamba oko nkumi ya dikanga ndo ɛlɔmbɛdi lo wahɔ w’anto tshɛ.​—Etatelo 22:18; Jɛrɛmiya 31:31-33; 1 Petero 2:9; Ɛnyɛlɔ 5:9, 10; 14:1-3.

Waa na wahomba ndɛ mapa ndo nnɔ vinyɔ? Mbokɛmaka dia paka wanɛ wele lo sheke y’oyoyo, mbuta ate wanɛ wele la elongamelo ka ntshɔ l’olongo mbahomba ndɛ mapa ndo nnɔ vinyɔ. Nyuma k’ekila kaki Nzambi mbetawoyaka anto asɔ dia vɔ wambɔsɔnama dia tonga nkumi ya dikanga l’olongo. (Rɔmɔ 8:16) Vɔ wekɔ nto lo sheke ya Diolelo vɔ la Yeso.​—Luka 22:29.

 Kayotota dikambo dia wanɛ wele l’elongamelo ka nsɛna pondjo pondjo lo Paradiso ka la nkɛtɛ? Vɔ kitanyiyaka didjango diaki Yeso ndo mbɔtɔka lo Dambo dia dikɔlɔ dia Nkumadiɔndjɔ, koko vɔ ndjaka oko wanɛ wenda la dilɛmiɛlɔ kɛnɛ tshɛ keta, koko hawole mapa ndo hawɔnɔ vinyɔ. Mbala ɔtɔi l’ɔnɔnyi, l’ɔkɔngɔ wa ɛɔtwɛlɔ ka wonya lo Nisana 14, Ɛmɛnyi wa Jehowa salaka Dambo dia dikɔlɔ dia Nkumadiɔndjɔ. Kânga mbele paka nunu dingana to l’andja w’otondo mbata dia wekɔ l’elongamelo k’otsha l’olongo, dambo sɔ mbɔsamaka la nɛmɔ efula le Akristo tshɛ. Ɔsɔ ekɔ diaaso diakoka anto tshɛ nkana yimba lo ngandji koleki tshɛ kaki Jehowa Nzambi nde la Yeso Kristo.​—Joani 3:16.