AKHRISTU atumika kuti achitengi mwambu wa Chikumbusku cha nyifwa yaku Khristu. Kumbi mwambu uwu ngwakukhumbika wuli? Kumbi titenere kuwuchita wuli ndipuso zuŵanji?

Yesu Khristu wangwambiska mwambu uwu pa usiku wa Phaska wachiyuda mu chaka cha 33 C.E. Phaska lenga sekeresu lo lachitikanga kamoza pachaka pazuŵa la 14 la mwezi wachiyuda wa Nisani. Mwezi wa Nisani wayambanga asani mwezi wayamba waka kuŵalika, akhumba asani papita sabata yakwamba ya mwezi wa March. Pavuli paki, Ayuda aŵerenganga mazuŵa 14 kuti achiti Phaska ndi mazulu asani lumwi lasere.

 Yesu wati wachita Phaska ndi akutumika ŵaki, wangudikiska Yuda mKeriote, pavuli paki wangwambiska mwambu wa Chakurya Chamazulu cha Ambuya. Pakuti mwambu uwu ungusere m’malu mwa Phaska waChiyuda, utenere kuchitika kamoza pe pachaka.

Uthenga Wamampha waku Mateyu ukamba kuti: “Yesu wanguto chiŵandi wangutumbika, ndi wangumenya; ndipu wangupaska ku ŵasambizi wo, wanguti: ‘Rondani, ryani; ichi ndi liŵavu langu.’ Ndipu wanguto nkhombu, wanguti wawonga, wangupaska kwaku wo, wakuti: ‘Mwiyanimu mosi; chifukwa izi ndi ndopa zangu za chipanganu chifya, zakudikiya pa chifwa cha ŵanandi ku chireke cha vilakwa.’”—Mateyu 26:26-28.

Ŵanthu anyaki agomezga kuti Yesu wangusambuska chiŵandi kuja liŵavu lenechu ndipuso vinyu kuja ndopa zaki chayizu. Kweni panyengu yo Yesu waperekanga chiŵandi, liŵavu laki lenga losi lamphumphu. Kumbi akutumika aku Yesu aryanga nadi liŵavu laki ndi kumwa ndopa zaki chayizu? Awa, chifukwa chakuti kuchita ivi kwatingi kuŵengi kurya munthu ndipuso kwenga kuswa dangu laku Chiuta. (Chiyambo 9:3, 4; Ŵalevi 17:10) Mwakuyana ndi lemba la Luka 22:20, Yesu wanguti: “Jomera lenili [kapu] nchipanganu chifya mu ndopa zangu, zakudikiya pa chifwa chaku imwi.” Kumbi jomera pamwenga kuti kapu, yinguja nadi “chipanganu chifya”? Ivi venga viyo cha, chifukwa chakuti chipanganu nchinthu chakuwoneka ndi masu cha kweni nkhuvwanana pa chinthu chinyaki.

Ndichu chifukwa chaki chiŵandi ndi vinyu ving’anamuwa liŵavu pamwenga ndopa chayizu cha. Chiŵandi chimiya liŵavu laku Khristu lakufikapu. Yesu wangugwiriskiya nchitu chiŵandi cho chingujaku pa mwambu wa Phaska. Chiŵandi ichi chingupangika kwambula mtupu wewosi pamwenga kuti yisiti. (Chituwa 12:8) Mu Bayibolo, mtupu umiya ubudi pamwenga vakunanga. Mwaviyo,  chiŵandi chimiya liŵavu lambula kalema lo Yesu wangupereka nge sembi. Liŵavu ili lengavi ubudi wewosi.—Mateyu 16:11, 12; 1 Ŵakorinte 5:6, 7; 1 Petro 2:22; 1 Yohane 2:1, 2.

Vinyu muyera wamiya ndopa zaku Yesu. Ndopa ndizu zichitiska kuti phanganu liŵi chayiluchayilu. Yesu wangukamba kuti ndopa zaki zingudirika kuti ‘tigowokereki maubudi ngidu.’ Nthowa yeniyi ndiyu yichitiska kuti ŵanthu aje akutowa pamasu paku Chiuta ndi kusere mu phanganu lifya ndi Yehova. (Ŵahebere 9:14; 10:16, 17) Phanganu lenili pamwenga kuti kuvwanana kwenuku ndiku kujula nthowa kuti Akhristu akugomezgeka akukwana 144,000, aluti kuchanya. Yiwu amuteŵete nge mafumu ndi asembi kuti mtundu wosi wa ŵanthu uzilonde vitumbiku.—Chiyambo 22:18; Yeremiya 31:31-33; 1 Petro 2:9; Chivumbuzi 5:9, 10; 14:1-3.

Kumbi mbayani wo atenere kurya chiŵandi ndi kumwa vinyu pa Chikumbusku? Nchachiziŵikiyevi kuti mbanthu wo ŵe muphanganu lifya pe, kung’anamuwa kuti wo ŵe ndi chilindizga chakuluta kuchanya ndiwu mbakwenere. Mzimu utuŵa waku Chiuta ndiwu usimikizgiya ŵanthu ŵenaŵa kuti asankhika kuti akaje mafumu kuchanya. (Ŵaroma 8:16) Yiwu ŵe mu phanganu so la Ufumu ndi Yesu.—Luka 22:29.

Nanga ŵanthu wo ŵe ndi chilindizga chakuzija pacharu chapasi m’Paradayisu atenere kusanirikapu? Yiwu avwiya dangu laku Yesu ndipu mwaulemu asanirika pa mwambu wa Chakurya Chamazulu cha Ambuya, kweni aryaku cha chiŵandi pamwenga kumwa vinyu. Kamoza pachaka, Akaboni aku Yehova achita mwambu wa Chakurya Chamazulu cha Ambuya pa Nisani 14, asani lumwi lasere waka. Chinanga kuti pacharu chosi chapasi pe ŵanthu masauzandi ngamanavi waka wo ŵe ndi chilindizga chakuluta kuchanya, mwambu uwu ngwakuzirwa kwa Akhristu wosi. Ndi mwambu wo uchitiska kuti ŵanthu wosi akumbukengi chanju chikulu chaku Yehova Chiuta ndi Yesu Khristu.—Yohane 3:16.