ABAKRISTAYO baragirwa okukuza Ekiijukyo ky’okufa kwa Kristo. Obundi omukoro gunu gwetwa “eky’Ekiro kya Mukama waitu.” (1 Abakolinso 11:20, NW) Gwina makuru ki? Ddi kandi nigutekwa kwijukwa mu mulingo ki?

Yesu Kristo akatandikaho omukoro gunu ha bugenyi bw’Ekiyudaaya obw’Okuhingurwaho omu 33 C.E. Obugenyi bunu obw’Okuhingurwaho bwaijukwaga murundi gumu buli mwaka ha kiro ky’e 14, omu kwezi kw’Ekiyudaaya okwa Nisan. Kubalirra ekiro kinu ha kyahikiraga, Abayudaaya balindi’raga ekiro omu mwaka esaha ezanyamusana ahazainganainganiraga n’ez’ekiro, nukwo kugamba, esaha 12 ezanyamusa n’ez’ekiro 12. Hanyuma y’ekiro okwezi kwabanzaga kuboneka, niyo yabaga ntandikwa y’okwezi kwa Nisan. Hanyuma y’ebiro 14, nubwo bakwataga obugenyi bw’okuhingurwaho, izoba nirikyamara kugwa.

Yesu akalya obugenyi bw’okuhinguraho n’abakwenda be, hanyuma y’okuragira Yuda Isikalyota kuturukamu, akatandika omukoro ogw’Eky’Ekiro kya Mukama waitu. Omukoro gunu nugwo gwagarukire omu kiikaro ky’obugenyi bw’okuhingurwaho obw’akwatwaga Abayudaaya, nahabwekyo, gusemerire kwijukwa murundi gumu omu mwaka.

Enjiri ya Matayo egamba: “Yesu yakwata omugati, yasaba, yagucwamu, yabaha abegeswa be nabagambira ati: ‘Mukwate, mulye. Gunu nugwo mubiri gwange.’  Yakwata empwahwa yasiima, yabaha, nagamba ati: ‘Munywe ha enu inywena; baitu niyo “sagama yange eyekiragano” eseseka habwa baingi obwokuihaho ebibi.’”—Matayo 26:26-28.

Abamu batekereza ngu Yesu akahindura omugati gwafooka mubiri gwe gwonyini na vini, esagama ye yonyini. Kyonka, omubiri gwa Yesu akaba akyagwine obu yabahaire omugati. Mali abegeswa ba Yesu bakalya enyama n’esagama ye byonyini? Nangwa, ekikorwa ekyo kyakubaire nk’okulya omuntu ekikucwa ekiragiro kya Ruhanga. (Okubanza 9:3, 4; Ebyabalevi 17:10) Okusigiki’ra ha Luka 22:20, Yesu akagamba: “Empwahwa enu nikyo kiragano kihyaka eky’omu sagama yange, niyo yaseseka habwanyu.” Empwahwa enu niyo yafookere kiragano kihyaka? Ekyo tikikusoboka, habwokuba ekiragano kuba kwikiraniza tikiba kintu.

Nahabwekyo, omugati n’evini bumanyiso. Omugati gweme’raho habw’omubiri gwa Kristo oguhikirire. Yesu akakozesa omugati ogukaba gusagire ha kiihuro ky’okuhingurwaho. Omugati ogwo gukaba gutatirwemu kitumbisa kyoona. (Okuruga 12:8) Baibuli ekozesa ekitumbisa kumanyisa ekibi n’okujunda. Nahabwekyo, omugati gwemerraho habw’omubiri gwa Yesu ogwali guhikirire ogu yahaireyo nk’ekihongwa. Gutabe n’ekibi.—Matayo 16:11, 12; 1 Abakolinso 5:6, 7; 1 Petero 2:22; 1 Yohana 2:1, 2.

Evini erukutukura eyemerraho habw’esagama ya Yesu. Esagama ya Yesu esobozesa ekiragano ekihyaka kutekwa omu nkora. Yesu akagamba ngu esagama ye ekaseswa “habwokuihaho ebibi.” Nahabwekyo, abantu basobora kufooka abasemiire omu maiso ga Ruhanga kandi nibasobora n’okutaaha omu kiragano ekihyaka na Yahwe. (Abaheburaniya 9:14; 10:16, 17) Ekiragano kinu, kisobozesa Abakristayo abesigwa 144,000 kugenda omuiguru. Bali okwo baraherezaga nk’abakama, kandi nk’abanyakatagara kuhaisa abaana b’abantu boona emigisa.—Okubanza 22:18; Yeremiya 31:31-33; 1 Petero 2:9; Okusuku’rwa 5:9, 10; 14:1-3.

Nibaha abasemerire kulya n’okunywa ha bumanyiso bwe kijukyo kinu? Abo bonka abali omu kiragano ekihyaka-abo abaina okunihira okw’okugenda omuiguru—nibo bonka abasemerire kulyaho ha mugati n’okunywa ha vini. Omwoyo gwa Ruhanga ogurukwera gumanyisa abali nka’bo ngu bakomerwe kuba bakama omuiguru. (Abarumi 8:16) Kandi bali omu kiragano ky’Obukama na Yesu.—Luka 22:29.

 Kandi abo abaina okunihira kw’okwikara omu rugonjo rwa Ruhanga ha nsi ebiro byoona? Borobera ekiragiro kya Yesu nibabaho ha mukoro gw’Eky’Ekiro kya Mukama waitu, kyonka babaho kuhaisa omukoro ekitiinisa, baitu hatali kulyaho. Omurundi gumu buli mwaka ha Nisani 14, hanyuma y’izoba kugwa, Abakaiso ba Yahwe baijuka omukoro gw’Eky’Ekiro kya Mukama waitu. Nobukiraba ngu abaine okunihira okw’okugenda omuiguru bataito muno, omukoro gunu gw’omugaso muno hali Abakristayo boona. Niko kasumi buli omu akatunga kucumitiriza ha kugonza okw’amani Yahwe Ruhanga n’omwana we Yesu Kristo oku batwolekere.—John 3:16.