ХРИСТИАННАРГА Христостуң өлүмүн сактып демдеглээр айтыышкын бердинген. Ол уттундурбас болуушкунну «Дээрги-Чаяакчының кежээки чеми» деп база адап турар (1 Коринфичилерге 11:20). Ол болуушкуннуң утказы кандыгыл? Ону кажан база канчаар демдеглээрил?

Иисус Христос ол байырлалды б.э. 33 чылда, еврейлерниң Хосталыышкын байырлалын, азы Пасханы, демдеглеп турган хүнүнде киирген. Хосталыышкын байырлалын, еврей календарь-биле алырга, 14 нисанда, чылда чаңгыс катап демдеглеп турган. Еврейлер, ол хүннү санап үндүрер дээш, чазын дүн-хүн дуртунуң деңнежип кээр үезин манап турган. Часкы дүн-хүн дуртунуң деңнежип кээр үезинге чоок айның чаазын (кажан ыргак чиңге ай тыптып турар үеде), нисан айның эгези деп санап турган. Хосталыышкын байырлалын ол айның 14 дугаар хүнүнде, хүн ашкан соонда байырлап турган.

Иисус бодунуң элчиннери-биле Хосталыышкын байырлалын байырлаан соонда, Иуда Искариотту чоргузупкаш, Дээргиниң Кежээзин демдеглеп киирген. Еврей Хосталыышкын байырлалын ол солаан болганда, ону база чылда чаңгыс катап демдеглээр херек.

 Матфейниң бижээн буянныг медээзинде: «Иисус хлебти алгаш, Бурганга өөрүп четтиргеш, ону үзе тыртып, өөреникчилеринге бербишаан, мынча дээн: „Алгаш, чиңер, бо дээрге Мээң мага-бодум-дур“. А ооң соонда Ол дашканы көдүргеш, Бурганга өөрүп четтиргеш, ону өөреникчилеринге сунгаш, мынча дээн: „Дөгереңер ижиңер, бо дээрге хөй улустуң бачыттарын өршээри-биле төгерим Мээң ханым-биле чардынар дугуржулга-чагыг-дыр“» (Матфейниң 26:26—28).

Иисус хлебти мага-бот кылдыр, а кызыл-араганы хан кылдыр хуулдурупкан деп, чамдык улус бүзүреп турар. Ынчалзажок, кажан Иисус элчиннерге хлебти дамчыдыптарга, ооң мага-боду бүдүн хевээр арткан. Таанда, Иисустуң элчиннери ооң мага-бодун чип, ооң ханын ижип турган деп бе? Чок, болбайн. Ындыг турган болза, ол чүүл Бурганның хоойлузун үреп турар, кижи эъди чиир чорук болур болгай. (Эге дөс 9:3, 4; Левит 17:10). Луканың 22:20-де: «Бо дашка дээрге силер дээш төгерим Мээң ханым-биле чардынар чаа дугуржулга-чагыг-дыр» — деп, Иисус чугаалаан. Ол дашка «чаа дугуржулга-чагыг» апарган бе? Чок, чүге дизе чаа дугуржулга-чагыг — эт-херексел эвес-тир.

Ынчап кээрге, хлеб биле кызыл-арага — символ-демдектер-дир. Хлеб Иисустуң бачыт чок мага-бодун илередип турар. Ол кежээ Иисус Хосталыышкын байырлалындан арткан хлебти өөреникчилеринге үлеп берген. Ындыг хлебти ажыткы чокка быжырып турган (Хосталыышкын 12:8). Библияда ажыткы бачыттың болгаш үрелгениниң демдээ болуп турар. Ынчангаш ажыткы чок хлеб Иисустуң өргүлге берген тергиин мага-бодун илередип турар. Ооң мага-боду бачыт чок турган (Матфейниң 16:11, 12; 1 Коринфичилерге 5:6, 7; 1 Пётрнуң 2:22; 1 Иоанның 2:1, 2).

А кызыл-арага Иисустуң ханын илередип турар. Христостуң төккен ханының ачызында чаа дугуржулга-чагыг күштүг апарган. Иисус бодунуң ханын «хөй улустуң бачыттарын өршээри-биле» төгер деп чугаалаан. Ол чүүл Иегованың мурнунга арыг бооп, ооң-биле чаа дугуржулга-чагыгны чарып алыр арганы кижилерге берип турар (Еврейлерге 9:14; 10:16, 17). Ол дугуржулга чагыг 144 000 шынчы христианнарга дээрге чурттаар арганы ажыдып турар. Олар бүгү кижи төрелгетенниң ажыынга хааннар болгаш дээди бараалгакчылар апаар (Эге дөс 22:18; Иеремия 31:31—33; 1 Пётрнуң 2:9; Ажыдыышкын 5:9, 10; 14:1—3).

 Дээргиниң кежээки байырлалының үезинде кым хлебти чип, кызыл-араганы ижип болур? Чүгле чаа дугуржулга-чагыгже кирип турар болгаш дээрге чурттаар идегелдиг кижилер ол символ-демдектерден амзап болур. Ол кижилер дээрге хааннаар кылдыр шилиттингенин Бурганның ыдыктыг сүлдези оларны бүзүредип турар (Римчилерге 8:16). Оон аңгыда, Иисус оларның-биле Чагырга дугайында дугуржулга-чагыг чарып алган (Луканың 22:29).

А черге дываажаңга мөңге чурттаар идегелдиг кижилер канчаарыл? Олар Иисустуң айтыышкынынга дыңнангыр бооп, Христостуң өлүмүнүң сактыышкын Кежээзинге олуржуп турар. Ынчалзажок олар ол болуушкунга хүндүткелдиг-даа болза, символ-демдектерден амзавайн турар. Иегованың Херечилери сактыышкын Кежээзин хүн ашкан соонда, 14 нисанда демдеглеп турар. Бөгүн делегейде дээрге чурттаар идегелдиг каш борбак муң кижи арткан-даа болза, ол уттундурбас болуушкунну шупту христианнар үнелеп турар. Сактыышкын Кежээзиниң үезинде Иегова Бурганның болгаш Иисус Христостуң өндүр улуг ынакшылының дугайында кижи бүрүзү ханы боданып болур (Иоанның 3:16).