CRISTOEʼ tu túuxtaj tiʼ tuláakal máaxoʼob ku yoksik u yóoloʼob tiʼ letiʼeʼ ka u kʼiimbesoʼob u kíimil, wa le ku yaʼalaʼal u «janal Yuumtsil» wa Última Cenaoʼ (1 Corintoiloʼob 11:20). ¿Baʼaxten jach unaj u beetaʼal le kʼiimbesajaʼ? ¿Baʼax kʼiin yéetel bix kʼaʼabéet u kʼiimbesaʼal?

Jesuseʼ tu káajsaj le kʼiimbesajaʼ tu jaʼabil 33 teʼ yáax siglooʼ, tu áakʼabil tuʼux ku kʼiimbesik kaʼach u Pascua le judíoʼoboʼ. Le judíoʼoboʼ utéen kaʼach ichil u jaʼab ku kʼiimbeskoʼob le Pascuaoʼ, tu kʼiinil 14 tiʼ nisán tu calendarioʼob. Le luna nueva ku lúubul maas naatsʼ tiʼ u equinoccioi primaveraeʼ le ku meyaj kaʼach tiʼ le judíoʼob utiaʼal u yilkoʼob baʼax kʼiin ken lúubuk le 14 tiʼ nisanoʼ (u equinoccioi primaveraeʼ letiʼe kʼiin tuʼux yaan óoliʼ doce oras sáasil yéetel óoliʼ doce oras éeʼjochʼeʼenil). Le u mesil nisanoʼ ku káajal ken jach yáax ilaʼak le luna nueva ku lúubul maas naatsʼ tiʼ u equinoccioi le primaveraoʼ. Le Pascuaoʼ ku káajal tu 14 kʼiinil jach yáax ilaʼak le Luna nuevaoʼ, le ken tʼúubuk le kʼiinoʼ.

 Teʼ áakʼab jeʼeloʼ, Jesuseʼ tu kʼiimbesaj le Pascua yéetel u apostoloʼoboʼ, tsʼoʼoleʼ ka tu yaʼalaj tiʼ Judas Iscariote ka jóokʼok, ku tsʼoʼokol túuneʼ ka tu káajsaj u kʼiimbesajil u Janal Yuumtsil. Le kʼiimbesajaʼ tu jeelintaj le Pascua ku kʼiimbesik kaʼach le judíoʼoboʼ, le oʼolal chéen xan utéen ichil upʼéel jaʼab unaj u beetaʼal.

U Evangelioi Mateoeʼ ku yaʼalik baʼax tu beetaj Jesús: «Jesuseʼ tu chʼaʼaj le waajoʼ, tu tsʼáaj nib óolal tiʼ Yuum Jajal Dios, ku tsʼoʼokol u xetʼikeʼ, ka tu tsʼáaj tiʼ u [apostoloʼob] táan u yaʼalik: Chʼaʼex jaanteʼex, lelaʼ in wíinklil. Ku tsʼoʼokoleʼ tu chʼaʼaj [..] jumpʼéel u nuʼukulil ukʼuleʼ ka tu tsʼáaj nib óolal tiʼ Jajal Dioseʼ, ka tu tsʼáaj tiʼob táan u yaʼalik: Ukʼulneneʼex tuláakaleʼex tiʼ le nuʼukulaʼ, tumen lelaʼ in kʼiʼikʼel ku jaajkúuntik le túumben [pactooʼ] yéetel ku weʼekel tu yoʼolal yaʼabkach máakoʼob utiaʼal u saʼatsajil kʼebanoʼob» (Mateo 26:26-28).

Yaan máaxoʼob tuklikeʼ le waajoʼ jach suunaj u wíinklil Jesús yéetel le vinooʼ jach suunaj u kʼiʼikʼel. Baʼaleʼ Jesuseʼ ka tu máansaj le waaj utiaʼal jaantbiloʼ mix u xéetʼ u wíinklil ku binetik. Le apostoloʼob xanoʼ, ¿jach wa túun tu jaantoʼob u bakʼel yéetel tu yukʼoʼob u kʼiʼikʼel Jesús? Maʼatech. Tumen wa maʼeʼ bey ka suunakoʼob jeʼex le canibaloʼoboʼ yéetel bejlaʼaʼ tiaʼanoʼob tu contra u ley Dioseʼ (Génesis 9:3, 4; Levítico 17:10). Jesús xaneʼ tu yaʼalaj: «Le ukʼulaʼ letiʼ le túumben [pacto] jaajkunaʼan yéetel in kʼiʼikʼel wekaʼan ta woʼolaleʼex[oʼ]» (Lucas 22:20). Le ukʼuloʼ, ¿jach wa túun letiʼ le túumben pactooʼ? Maʼatech, tumen le túumben pactooʼ maʼ upʼéel baʼal ku páajtal u yukʼaʼaliʼ, chéen u kʼáat u yaʼal upʼéel tʼaan ku yantal ichil kaʼatúul wa kaʼa jaats máakoʼob.

Bey xanoʼ, le waaj yéetel le vinooʼ maʼ jach u wíinklil yéetel u kʼiʼikʼel Jesusiʼ. Le waajoʼ chéen u kʼáat u yaʼal u wíinklil Jesús. Le waaj tu máansaj Jesusoʼ upʼéel waaj tu yalabtaj tiʼ le tu jaantoʼob teʼ Pascuaoʼ. Le waajaʼ minaʼan mix upʼíit levadura ichil (Éxodo 12:8). Le Bibliaoʼ yaʼab u téenel ku ketik le levadura yéetel le kʼebanoʼ. Le waaj túunoʼ u kʼáat u yaʼal u wíinklil Jesús tu kʼubaj t-oʼolal, upʼéel wíinklil minaʼan kʼeban ichil (Mateo 16:11, 12; 1 Corintoiloʼob 5:6, 7; 1 Pedro 2:22; 1 Juan 2:1, 2).

Le box chak vinooʼ u kʼáat u yaʼal u kʼiʼikʼel Jesús. Le u kʼiʼikʼeloʼ le béeykuntik le túumben pactooʼ. Jesuseʼ tu yaʼalaj yaan u wekik u kʼiʼikʼel «utiaʼal u saʼatsajil kʼebanoʼob». Tu yoʼolal u kʼiʼikʼeleʼ u jaats wíinkoʼobeʼ ku yilaʼaloʼob bey minaʼan u kʼebanoʼob tumen  Dioseʼ yéetel ku táakpajloʼob teʼ túumben pacto yéetel Jéeobaoʼ (Hebreob 9:14; 10:16, 17). Le pactoaʼ ku béeykuntik ka xiʼik teʼ kaʼan144,000 cristianoʼob chúukaʼan u yóoloʼoboʼ. Teʼeloʼ tiʼ ken u beet u reyiloʼob yéetel u sacerdoteiloʼobiʼ utiaʼal u yutsil tuláakal wíinikoʼob (Génesis 22:18; Jeremías 31:31-33; 1 Pedro 2:9; Apocalipsis 5:9, 10; 14:1-3).

¿Máaxoʼob túun unaj u jaantkoʼob le waaj yéetel u yukʼikoʼob le vino ku meyaj ken kʼiimbesaʼak kíimik Jesusoʼ? Jeʼex tsʼoʼok k-kanikaʼ, chéen le máaxoʼob táakpajaʼanoʼob ichil le túumben pactooʼ wa le máaxoʼob kun binoʼob teʼ kaʼanoʼ. U kiliʼich pixan wa u espíritu santo Dioseʼ le aʼaliktiʼob yéeyaʼanoʼob utiaʼal u binoʼob teʼ kaʼanoʼ (Romailoʼob 8:16). Letiʼob xaneʼ ku táakpajloʼob teʼ pacto beetaʼan yéetel Jesús utiaʼal upʼéel Reinooʼ (Lucas 22:29).

¿Kux túun le máaxoʼob ku páaʼtik u kuxtaloʼob utiaʼal mantatsʼ teʼ paraíso way Luʼumeʼ? Jeʼex tu túuxtilak Jesuseʼ, letiʼob xaneʼ ku yantaloʼob tu kʼiimbesajil u Janal Yuumtsil, baʼaleʼ maʼ tu táakpajloʼob tiʼ u jaantkoʼob le waajoʼ mix tiʼ u yukʼikoʼob le vinooʼ; chéen tiaʼanoʼob utiaʼal u yeʼesoʼob tsiikiliʼ. U j-jaajkunajoʼob Jéeobaeʼ chéen utéen ichil u jaʼab ku kʼiimbeskoʼob u Janal Yuumtsil; ku beetkoʼob ken káajak u kʼiinil 14 tiʼ nisán ken tsʼoʼokok u tʼúubul kʼiin. Tiʼ tuláakal yóokʼol kaabeʼ maʼ yaʼab máaxoʼob yéeyanoʼob utiaʼal u binoʼob teʼ kaʼanoʼ, baʼaleʼ le kʼiimbesajaʼ táaj nojoch baʼax u kʼáat u yaʼal utiaʼal tuláakal máax kʼamik Cristo. Le kʼiimbesajaʼ ku kʼaʼajsiktiʼob u sen nojoch yaabilaj Jéeoba yéetel Jesús tu yoʼolaloʼob (Juan 3:16).