Dano Mono Ada Gitye ki Gin Mo ma Pe To i Komgi?

DANO mapol gitamo ni gin mo ma pe nen dok ma pe to tye i komwa. Gin gitamo ni i kare me to, gin man ma pe nen-ni, weko kom ci medde ki kwo. Kit ma tam man onya tutwal-li, jo mapol gibedo ki ur me niang ni tam man kara pe obedo gin ma Baibul pwonyo wacel. Gin ango kono dong ma timme i komwa i kare me to ma lubbe ki gin ma tye i Lok pa Lubanga?

Kit Ma Kitiyo Kwede ki Nyig Lok Neʹphesh ki Psy·kheʹ i Baibul

Wii omyero opo ni kicako coyo Baibul i leb Ibru ki Grik. Nyig lok ni neʹphesh i leb Ibru ki nyig lok ni psy·kheʹ i leb Grik kigonyo i Baibul me leb Acholi ni dano, lee, kwo, nyo cwiny. Neʹphesh ki psy·kheʹ nonge ma kato tyen 800 kulu i Ginacoya, dok nongo cung pi (1) dano, (2) lee, nyo (3) kwo pa dano nyo pa lee. Kong  wanenu ginacoya mogo ma ginyuto lok adek mapat pat magi.

Dano. “I kare pa Nua . . . dano [psy·kheʹ] manok ma romo aboro keken aye gularre ki i pii.” (1 Petero 3:20) Kany kigonyo nyig lok ni psy·kheʹ i leb Grik ni dano​—Nua, ki dakone, ki awobene adek, ki mongi. Nia 1:5 loko i kom cik ma kimiyo ki Luicrael ma mako coko manna ni: “Litino pa Yakobo ducu giromo 70.” Pi meno, wel lutino pa Yakobo onongo tye 70. Labol mogo me Baibul ka ma kigonyo iye nyig lok ni neʹphesh ki psy·kheʹ calo gin mo makwo nyo dano nonge i Nia 12:4; Yocwa 11:11; Jo Roma 13:1 ki 2 Petero 2:14.

Lee. I lok kom cwec ma tye i Baibul, wakwano ni: “Lubanga owacci, ‘Wek pii onywal gin makwo [neʹphesh] ma gicorre limuk, ki winyo bene gutuk lamalo i wi lobo i dan pete me polo.’ Lubanga owacci, ‘Wek lobo onywal gin makwo [neʹphesh] i kit kwagi: lee ma paco, ki gin ma lak alaka, ki lee me tim macalo kit kwagi tye’; ci otimme kit meno.” (Acakki 1:20, 24) I tyeng magi, kilwongo rec, winyi, ki lee me paco, ki lee tim ki nyig lok me leb Ibru ni neʹphesh. Kilwongo lee bene ni neʹphesh i Acakki 9:10; ki Lulevi 11:10, 46.

Kwo pa dano. Kare mukene nyig lok ni neʹphesh ki psy·kheʹ cung pi kwo pa dano. Jehovah owaco ki Moses ni: “Ka co gitye ka lweny, ci ngat acel cinge ocer i kom dako ma iye odongo, ce iye opoto woko, . . . Ka can onen iye, ci gibiculo kwo [neʹphesh] ki kwo [neʹphesh].” (Nia 21:22, 23) Nen bene lok pa Yecu ni: “An lakwat maber. Lakwat maber miyo kwone [psy·kheʹ] pi romi.” (Jon 10:11) Yecu omiyo psy·kheʹ, nyo kwone, pi dano. I tyeng magi, nen kamaleng ni nyig lok neʹphesh ki psy·kheʹ cung pi kwo pa dano. Ibinongo labol mukene mapol i kom nyig lok neʹphesh ki psy·kheʹ i Lungolkop 5:18; Matayo 10:39; Jon 15:13; ki 1 Jon 3:16.

 Ka imedde ki kwano Lok pa Lubanga, pe ibinongo ka mo ma loko ni neʹphesh nyo psy·kheʹ obedo “gin ma pe to” nyo ma “bedo nakanaka.” Kitungcel, Ginacoya waco ni neʹphesh obedo gin ma to. (Ejekiel 18:4, 20) Pi meno, ma lubbe ki Baibul, ngat ma dong oto woko nongo obedo neʹphesh ma oto, pe tye kit gin mo ma dok bwot ki to​—Latitlok 9:5, 10.

Kit Ma Kitiyo Kwede ki Nyig Lok Ruʹach ki Pneuʹma i Baibul

Baibul mogo gonyo nying lok Ibru ni ruʹach ki nyig lok Grik ni pneuʹma ni kwo, yweyo me kwo nyo ni cwiny. Leb ma kicako coyo kwede Baibul nyuto ni ruʹach ki pneuʹma obedo teko me kwo ma tye i kom ginacweya ma i lobo. Me labolle, Jabuli 104:29 waco ni: “Ka ikanne [Jehovah] woko ki botgi, ci gineno can; ka ikwanyo yamo me yweyoni [ruʹach] woko ki botgi ci gito woko, gidok i apwa ka ma yam gua ki iye.” Dok Luka 8:55 keto ni “cwinye [pneuʹma] odwogo, oa malo oyotoyot.” Dong i tyeng magi ruʹach ki pneuʹma obedo gin ma miyo kwo i kom. Ka pe, kom to woko. Pi meno, i Baibul me New World Translation, kigonyo nyig lok ruʹach ni “cwiny,” ki dok ni yweyo me kwo bene. Me labolle, i lok kom Pii Aluka me kare pa Nua, Acakki 6:17 waco ni: “Abicoro pii aluka madwong i wi lobo, wek otyek kom gin ducu ma tye ki kwo, i te polo, wek gin ducu ma gitye i wi lobo oto woko.” (Acakki 7:15, 22) Pi meno ruʹach ki pneuʹma gubedo teko ma pe nen ma miyo kom ginacweya ducu kwo.

Kom mito teko me kwo [ruʹach nyo pneuʹma] kit ma redio mito kwede teko me mac alektwic wek oti. Me medo lapor mukene i kom meno, tam kong i kom redio cing. Ka iketo beteri i redio cing ci iyabo, teko ma tye i beteri-ni weko redio tiyo. Ento ka beteri peke, ci redio  ling woko. Man bene rom aroma ki redio ma tiyo ki mac alektwic ka kipwutu lakub macce woko ki i mac. I kit yo acel-li, komwa bene mito teko me kwo wek obed ma kwo. Pi meno, [ruʹach nyo pneuʹma] pe obedo gin ma ngeyo kome nyo twero tam dok rom aroma ki alektwic nyo teko ma tye i beteri. Obedo teko ma pe kwo. Ento labongo teko me kwo meno, komwa ‘to woko, ci dok i apwa’ kit ma lacoc mo me Jabuli owaco-ni.

Latitlok 12:7 oloko i kom to pa dano ni: “Apwa [kome] bene dok i kom ngom ka ma yam oa ki iye, ki cwiny [ruʹach] dano dok bot Lubanga ma yam omiyo-ni.” Ka cwiny, nyo teko me kwo oweko kom, kom to ci dok ka ma yam oa ki iye​—i lobo-ni. I kit yo acel-li, teko me kwo bene dok ka ma yam oa ki iye​—bot Lubanga. (Yubu 34:14, 15; Jabuli 36:9) Man pe tyene ni teko me kwo kikome aye cito wa i polo. Ento, tyene tye ni, gen pa dano moni ma oto-ni, nongo dong cung i kom Lubanga Jehovah. Kwone nongo dong tye i cing Lubanga. Dong nongo teko pa Lubanga keken aye ma twero dwoko cwiny nyo teko me kwo man cen weko ngat meno doko okwo odoco.

Pud dong obedo me kwe cwiny ya, me ngeyo ni man aye gin ma Lubanga bitimo i kom jo ducu ma gitye ka yweyo i “lyel”! (Jon 5:28, 29) I kare me cer, Jehovah biyubo kom mukene manyen pi ngat moni ma nongo tye ka nino i to ka dong miye kwo ki keto cwiny nyo teko me kwo i kome. Nino meno dong pud bibedo me yomcwiny ya!