KUN nadadangog nindo an mga terminong “kalag” asin “espiritu,” ano an minasabong sa isip nindo? An dakol naniniwala na an kahulogan kan mga terminong ini sarong bagay na dai naheheling asin inmortal na nag-eeksister sa laog niato. Naghohona sinda na pagkagadan an dai naheheling na kabtang na ini kan tawo minasuway sa hawak asin nagpapadagos na mabuhay. Huling an paniniwalang ini lakop na marhay, dakol an nabibigla na maaraman na bako nanggad iyan an itinotokdo kan Biblia. Kun siring, ano an kalag, asin ano an espiritu, segun sa Tataramon nin Dios?

Enot, estudyare an kalag. Tibaad nagigirumdoman nindo na an Biblia orihinal na isinurat prinsipalmente sa Hebreo asin Griego. Kun isinusurat an manongod sa kalag, ginamit kan mga kagsurat kan Biblia an termino sa Hebreo na neʹphesh o an termino sa Griego na psy·kheʹ. An duwang terminong ini minalataw nin labi nanggad sa 800 na beses sa Kasuratan, asin iyan pirmeng tinatradusir na “kalag” kan New World Translation. Kun sisiyasaton nindo an paagi nin pagkagamit kan Biblia sa “kalag” o “mga kalag,” magigin risang-risa na an terminong ini sa pundamental nanonongod sa (1) mga tawo, (2) mga hayop, o (3) sa buhay mismo nin tawo o hayop. Estudyaran  niato an nagkapirang teksto na nag-aatubang kan tolong laen-laen na kahulogan na ini.

Mga tawo. “Kan mga aldaw ni Noe . . . pira sana, an boot sabihon, walong kalag, an dinarang ligtas sa tubig.” (1 Pedro 3:20) Digdi an terminong “kalag” malinaw na mga tawo an boot sabihon​—si Noe, an saiyang agom, an saiyang tolong aking lalaki, asin an mga agom kaini. Nasasambitan kan Exodo 16:16 an mga instruksion na itinao sa mga Israelita mapadapit sa pagtipon nin mana. Sinabihan sinda: “Mamurot kamo kaiyan . . . segun sa kabilangan kan mga kalag na nasa tolda kan lambang saro sa saindo.” Kaya an kadakolan kan tinipon na mana depende sa kabilangan nin mga tawo sa kada pamilya. An iba pang halimbawa sa Biblia kan pag-aplikar kan “kalag” o “mga kalag” sa sarong tawo o mga tawo makukua sa Genesis 46:18; Josue 11:11; Gibo 27:37; asin Roma 13:1.

Mga hayop. Sa kasaysayan kan paglalang sa Biblia, mababasa niato: “Sinabi nin Dios: ‘Tumuga an katubigan nin bunyog nin buhay na mga kalag asin an mga gamgam maglayog sa ibabaw kan daga sa kahiwasan kan kalangitan.’ Asin an Dios nagpadagos sa pagsabi: ‘Tumuga an daga nin buhay na mga kalag segun sa saindang mga klase, magarong hayop asin naghihirong hayop patin layas na hayop kan daga segun sa klase kaiyan.’ Asin siring an nangyari.” (Genesis 1:20, 24) Sa tekstong ini, an mga sira, magarong hayop, asin layas na hayop saro sana an apod​—“mga kalag.” An mga gamgam asin iba pang mga hayop inaapod na mga kalag sa Genesis 9:10; Levitico 11:46; asin Bilang 31:28.

Buhay nin sarong tawo. Kun beses an terminong “kalag” nangangahulogan kan buhay nin sarong tawo. Sinabihan ni Jehova si Moises: “An gabos na tawo na naghahanap kan saimong kalag gadan na.” (Exodo 4:19) Ano an hinahanap kan mga kaiwal ni Moises? Gusto nindang halean nin buhay si Moises. Bago kaidto, mantang ipinapangaki ni Raquel an saiyang aking si Benjamin, “minaluwas an saiyang kalag (huli ta sia nagadan).” (Genesis 35:16-19) Sa oras na iyan, nawaran nin buhay si Raquel. Estudyare man an mga tataramon ni Jesus: “Ako iyo an marahay na pastor; an marahay na pastor minatao kan saiyang kalag para sa mga karnero.” (Juan 10:11) Itinao ni Jesus an saiyang kalag, o buhay, para sa katawohan. Sa mga tekstong ini sa Biblia, an terminong “kalag” malinaw na nanonongod sa buhay nin sarong tawo. Makakakua kamo nin dakol pang halimbawa kan kahulogan na ini kan “kalag” sa 1 Hade 17:17-23; Mateo 10:39; Juan 15:13; asin Gibo 20:10.

 Ipapaheling sa saindo kan dugang pang pag-adal sa Tataramon nin Dios na dai nanggad manonompongan sa bilog na Biblia na ikinokonektar an mga terminong “inmortal” o “daing katapusan” sa terminong “kalag.” Imbes, sinasabi kan Kasuratan na an kalag mortal, na an boot sabihon iyan nagagadan. (Ezequiel 18:4, 20) Kun siring, an apod kan Biblia sa sarong tawong nagadan “gadan na kalag.”​—Levitico 21:11.

Estudyaran niato ngonyan an pagkagamit sa Biblia kan terminong “espiritu.” May mga tawong nagsasaboot na an “espiritu” ibang termino sana para sa “kalag.” Minsan siring, bakong totoo iyan. Linilinaw kan Biblia na an “espiritu” asin “kalag” nanonongod sa duwang magkalaen na bagay. Ano an pagkakalaen ninda?

Ginagamit kan mga kagsurat kan Biblia an termino sa Hebreo na ruʹach o an termino sa Griego na pneuʹma kun sinda nagsusurat manongod sa “espiritu.” Ipinaparisa mismo kan Kasuratan an kahulogan kan mga terminong idto. Halimbawa, an Salmo 104:29 nagsasabi: “Kun haleon mo [Jehova] an saindang espiritu [ruʹach], sinda nagagadan, asin sinda minabalik sa saindang kabokabo.” Asin an Santiago 2:26 nagsasabi na “an hawak na daing espiritu [ pneuʹma] gadan.” Kun siring, sa mga bersikulong ini, an “espiritu” nanonongod sa bagay na nagtatao nin buhay sa hawak. Kun mayo nin espiritu, an hawak gadan. Kun siring, sa Biblia bako sanang “espiritu” an ginagamit sa pagtradusir sa terminong ruʹach kundi siring man an “puersa,” o puersa nin buhay. Halimbawa, may labot sa Baha kan kaaldawan ni Noe, an Dios nagsabi: “Dadarahon ko sa daga an baha tanganing laglagon an gabos na laman na dian aktibo an puersa [ruʹach] nin buhay sa sirong nin kalangitan.” (Genesis 6:17; 7:15, 22) Sa siring, an “espiritu” nanonongod sa dai naheheling na puersa (an silyab nin buhay) na nagtataong buhay sa gabos na linalang na may buhay.

Bakong pareho an kalag asin an espiritu. Kaipuhan kan hawak an espiritu kun paanong kaipuhan kan radyo an elektrisidad​—tanganing magpunsionar. Sa pag-ilustrar pa, isipon an sarong nabibitbit na radyo. Kun lagan nindo nin pila an sarong nabibitbit na radyo asin patanogon iyan, an elektrisidad na yaon sa pila garo man sana nagtatao nin buhay sa radyo. Minsan siring, kun mayo nin pila gadan an radyo. Iyo man an iba pang klase nin radyo kun iyan dai nakasaksak sa koryente. Kaagid kaiyan, an espiritu  iyo an puersa na nagtatao nin buhay sa satong hawak. Siring man, arog kan elektrisidad, an espiritu mayo nin pagmate asin dai nakakaisip. Iyan sarong impersonal na puersa. Alagad kun mayo an espiritung iyan, o puersa nin buhay, an satong hawak “nagagadan, asin sinda minabalik sa saindang kabokabo,” siring kan sinabi kan salmista.

Nagtataram manongod sa kagadanan nin tawo, an Eclesiastes 12:7 nagsasabi: “An kabokabo [kan saiyang hawak] minabalik sa daga arog kan dati asin an espiritu mismo minabalik sa tunay na Dios na nagtao kaiyan.” Kun an espiritu, o puersa nin buhay, lumuwas sa hawak, an hawak nagagadan asin minabalik sa pinaghalean kaiyan​—an daga. Kaagid kaiyan, an puersa nin buhay minabalik sa pinaghalean kaiyan—​an Dios. (Job 34:14, 15; Salmo 36:9) Dai ini nangangahulogan na an puersa nin buhay aktuwal na minaduman sa langit. Imbes, nangangahulogan iyan na para sa sarong nagadan, an ano man na paglaom na buhay sa ngapit nakasarig ki Jehova Dios. An saiyang buhay nasa kamot na nin Dios, sabi ngani. Paagi sana sa kapangyarihan nin Dios na an espiritu, o puersa nin buhay, ikakabalik tanganing an sarong tawo mabuhay giraray.

Kanigoan kanakakarangang maaraman na ini an eksaktong gigibohon nin Dios para sa gabos na nagpapahingalo sa “mga lolobngan na girumdoman”! (Juan 5:28, 29) Sa panahon kan pagkabuhay liwat, si Jehova maporma nin sarong bagong hawak para sa sarong tawo na nagtotorog sa kagadanan asin bubuhayon iyan paagi sa pagbugtak dian nin espiritu, o puersa nin buhay. Kanigoan kagayagayang aldaw iyan!

Kun gusto nindong makanood nin orog pa manongod sa mga terminong “kalag” asin “espiritu” siring kan pagkagamit sa Biblia, makakakua kamo nin mahalagang impormasyon sa brosyur na Ano an Nangyayari sa Sato kun Kita Magadan? asin sa pahina 100-5 asin 158-62 kan librong Nangangatuwiran Mula sa Kasulatan, na parehong ipinublikar kan Mga Saksi ni Jehova.