MI TAMPI nih cun kan chung ah mit in hmuh khawh lomi a thi kho lomi a um tiah an zumh. Thih tikah cu mit in hmuh khawh lomi cu pum chungin a chuak i a nung tiah an ruah. Cu zumhnak cu a karh tuk caah Baibal cawnpiakmi a si lo an hngalh tikah mi tampi cu an khuaruah a har. Cu a si ahcun Pathian Bia chim ningah kan thih tikah zeiahdah kan can?

Baibal cu a hramthawk ah Hebru le Grik holh deuh in rak ṭial a si kha na theih ko lai. Baibal ah hmanmi Hebru biafang neʹphesh le Grik biafang psy·kheʹ kha Baibal cheukhat ah thlarau tiah an rak leh. Cu biafang pahnih cu Cathiang  chungah voi 800 leng a um i a bikin (1) minung, (2) saram, (3) minung asiloah saram ngeihmi nunnak kha a chim duhmi a si. Cuti phun thum in a langhtermi Baibal cang cheukhat kha i ruah u sih.

Minung. “Lawng chungah a lutmi mi tlawmte minung [psy·kheʹ] dihlak ah pariat hna kha ti chung cun khamh an si.” (1 Piter 3:20) Hika ah Grik biafang psy·kheʹ kha minung—Noah, a nupi, a fapale pathum le an nupile—caah hman a si ti cu a fiang. Exodus 16:16 ah manna changreu charnak he aa tlaiin Israel mi hna kha hiti hin lamhruainak pek an si: “Nan i zaat tawk cio in nan char lai, . . . Cun mahle thlam chung i khua a sami [neʹphesh] dihlak ca cio khan char a si lai.” Manna zeizat char ding timi cu chungkhar pakhat cio an chungkhar neʹphesh asiloah minung cungah aa hngat.

Saram. Baibal chungah sernak he aa tlaiin hitin kan rel: “Pathian nih cun aa thawh i, ‘Ti nih hin thilnung [neʹphesh] phun tampi a hrin hna lai i va hi thli lakah hin an zuang lai,’ a ti i cu bang cun a hung si.’ Cun Pathian nih hitin a chim chap: ‘Vawlei nih hin inn zuat saṭil [neʹphesh] a phunphun le ramlak saram a phunphun, a hme he a ngan he, hring hna seh,’ a ti i cu bang cun a hung si.” (Genesis 1:20, 24) Hi Baibal cang ah hin nga, innzuat saṭil le ramlak saram vialte caah Hebru biafang neʹphesh ṭhiamṭhiam kha a hman.

Minung nunnak. A caancaan ah neʹphesh le psy·kheʹ timi biafang nih minung pakhat nunnak zong kha a chim duhmi a si tawn. Jehovah nih Moses kha hitin a ti: “Nangmah [Na neʹpheshʹ] thah an duhmi vialte kha an thi cang.” (Exodus 4:19) Rachel nih a fapa Benjamin kha a hrin i ‘a thaw hmanung bik [neʹphesh] a cat.’ (Genesis 35:16-19) Jesuh chimmi hi bia zong hi ruat hmanh: “Tukhal ṭha cu keimah hi ka si. Ṭukhal ṭha cu a tuu hna caah a lu [psy·kheʹ] hloh kha a sian.” (Johan 10:11) Jesuh nih minung caah a psy·kheʹ asiloah a nunnak kha a rak pek. Mah Baibal cang hna chim ningin  neʹphesh le psy·kheʹ timi biafang nih minung nunnak a sawh ti cu a fiang.

Pathian Bia kha tamdeuh in hlathlai ahcun Baibal chung dihlak khua zei ka hmanh ah neʹphesh le psy·kheʹ timi biafang kha “a thi kho lomi” asiloah “a hmun zungzalmi” timi biafang he aa sengtlai lo ti kha hmuh khawh a si.

Baibal cheukhat nih Hebru biafang ruʹach le Grik biafang pneuʹma zong kha thaw le thlarau tiah an leh. Cathiang theng nih mah biafang hna sullam kha a chim. Tahchunhnak ah Salm 104:29 nih hitin a ti: “[Jehovah] na thaw [ruʹach] kha na tlaih kanh hna tikah an thi i an chuahkehnak vawlei ah khan an kir ṭhan.” Jeim 2:26 zong nih ‘pum cu thlarau [pneuʹma] loin a thi’ tiah a langhter. Cu a si caah mah cacang hna ningin ruʹach le pneuʹma cu pum a nuntermi a si. Ruʹach asiloah pneuʹma lo cun pum cu a thi. Cucaah, Baibal i ruʹach timi biafang kha thlarau ti lawng si loin nunnak ṭhawnnak tiah leh a si. Tahchunhnak ah Noah chan Buanchukcho he aa tlaiin Pathian nih hitin a ti: “[“Nunnak ṭhawnnak [ruʹach] ruangah,” NW] a nungmi thil vialte hrawhnak ding caah vawlei cungah buanchukcho ka tlunter lai. Vawlei cung i a ummi thil vialte an thi dih lai.” (Genesis 6:17; 7:15, 22) Cucaah ruʹach le pneuʹma nih thil nung vialte a cawlcanghter khomi mit in hmuh khawh lomi ṭhawnnak (a nuntermi ṭhawnnak) kha a sawh.

Radio pakhat ngaih awkah elektrik dah a herh bantukin pum cawlcanghnak caah nunnak ṭhawnnak [ruʹach asiloah pneuʹma] a herh. Tam deuh in fianternak caah radio a hmemi pakhat khi ruat hmanh. Radio chungah datkhe kan sanh ahcun datkhe chungah a ummi dah thawngin radio cu a aw a hung chuak (a hung nung). Asinain datkhe a um lo ahcun radio cu a aw a chuak ti lo (a thi). Cu bantuk cun, thlarau [ruʹach asiloah pneuʹma] cu pum a nuntermi ṭhawnnak a si. Elektrik dah bantukin thlarau [ruʹach asiloah pneuʹma] nih  intuarnak le khuaruah khawhnak a ngei lo. Mah cu pum a ngei lomi ṭhawnnak men a si. Sihmanhsehlaw thlarau asilole nunnak ṭhawnnak a um lo ahcun salm caṭialtu nih a chim bantukin kan pum cu ‘a thi i kan chuahkehnak vawlei ah khan a kir ṭhan.’

Phungchimtu 12:7 nih mithi kong kha hitin a chim: “Kan pum cu vawlei leidip ah a kir ṭhan lai i kan thaw [ruʹach asiloah pneuʹma] cu a kan petu Pathian sinah a kir ṭhan lai.” Thaw asiloah nunnak ṭhawnnak cu pum chungin a chuah tikah kan pum cu a thi i a chuahnak vawlei ah a kir ṭhan. Cu bantuk cun nunnak ṭhawnnak cu a ratnak Pathian sinah a kir ṭhan. (Job 34:14, 15; Salm 36:9) Nunnak ṭhawnnak kha van ah a kai ṭhan tiah a chim duhmi a si lo. Mi pakhat a thih tikah a hmailei nunnak ruahchannak cu Jehovah Pathian cung lawngah a um tinak a si. A nunnak cu Pathian kut ah a um. Pathian ṭhawnnak thawng lawngin mi pakhat nunter khawh awkah nunnak ṭhawnnak pek ṭhan khawh a si.

Pathian nih “thlan chung i a ummi mithi vialte” a nunter ṭhan hna lai ti theih cu lung hna a va ngam dah! (Johan 5:28, 29) Jehovah nih thawhṭhannak caan ah thihnak ah aa hngilhmi pakhat kha pum thar a serpiak lai i nunnak ṭhawnnak a peknak thawngin a nunter ṭhan lai. Lunglawmhnak in a khatmi caan a si lai!

Baibal ah hmanmi neʹphesh le psy·kheʹ, cun ruʹach le pneuʹma timi biafang hna kong kha hngalh chap na duh ahcun Jehovah Hngaltu hna chuahmi What Happens to Us When We Die? timi brochure le ကျမ်းစာဖြင့် ကျိုးကြောင်းဆင်ခြင်ခြင်း timi cauk cahmai 87-91, 312-16 ah man a ngeimi a konglam hna kha kawl khawh a si.