BUGGIDAR dulemar binsadamalad dule burgwisar e burbadina anba dula gudidaye, emar ogwayedidaye. Bergwablesaar dulemar deyob binsadamarsoggua, Bibliagi deyob soglenasurye durdagnonimalale geg iddodamalad. Degid Bibliagindi ¿igi nue dule burgwisar gusdaye soglenai?

Gebbe Biblia narmaglesgua abar hebreo gayabali narmaglesad, geb abar griego gayabali narmaglesbalid. Abar Bibliagine, hebreo gayabali néfesch naidi geb griego gayabali psykjé naidi burbaye sogsadamalad abar san burbaye sogsadamarbalid. Wagsigdina “almaye” sogdamalad. Bibliagine 800 gwena mergu néfesch geb psykjé narmaggar nanaid. Néfesch naile geb psykjé nadibe sunmagnaded 1) dulemargine 2) ibmar durgangine 3) dulemar dula gudidiidgine geb ibmar durgan dula buggwadgi. Anmar daggoena weg sogbaa soglenaidi igi Bibliagine we ibmargi sunmaglenai.

Dulemar. “Noé ibagangi, Noé ur dummad sobnai gusgu, Bab Dummad igarba gwen nanassurmalad. Bab Dummad we dulemar aa urse doged edarbedii gusad. Deunni, unnila e wala baabag [psykjé], muu mulusadba san onos gusmalad” (1 Pedro 3:20). Wegine griego gayabali psykjé sognaidi, soglesad, dulemar ebaabagye: Noé, Noé e ome, Noé masmala ebaagwad geb Noé e balamar ebaamarmogad. Éxodo 16:16 gine Israelitamarga weyob soglesye sognabalid: “Be neggi mergu dule[mar] [néfesch] niggadba, wala walagwengi nibirbo wilub mergu [maná] weemaloye”. Degsoggu soglesundo maná welegoenye dulemar merguedbali. Néfesch geb psykjé narmaggar nanaidi Génesis 46:18 gine Josué 11:11 gine Gusmalad 27:37 gine geb Romanos 13:1 gine anba dulemargine sunmaglenabalid.

 Ibmar durgan. Gebbe sagla ibmar obinyileargua Bab Dummad sogsad: “Diigi ibmar dulamar [néfesch] bela aggar aggar anbiggumar, degine, nuumar anbiggumar, we nabneggi nabir niba guggudii gumalagar. Geb degi, Bab Dummad sogdebalid: Nabbagi bela ibmar durgan [néfesch] na egad egad balibimaladba anbiggumar: ibmar durgan sunna aggwilemalad, ibmar durgan nabbagi garmagdimalad, ibmar durgan sabburbarmalad, bela na egad egad balibimaladba anbiggumar. Deyob gunoniggid” (Génesis 1:20, 24). Wegine sunmaglenaidi uamargine ibmar durgan sabburba buggwadgine, ibmar durgan neg yaggi aggwelemaladgine hebreo gayabali bela wemar néfeschye bilenanaid. Geb Génesis 9:10 gine Levítico 11:46 gine geb Números 31:28 gine, siggwimargine sunmaglesgua geb ibmar durgan bamaladgi sunmaglesbargua soglenabalid wemala néfeschye.

Dulemar dula gudiir. Inbaggwa dulemar dula gudiidgine sunmaglealile sogledabalid wemala néfeschye geb psykjéye. Be daggena igi Jehová Moisésga sogsa: “Ar ade, bela dulemar be [néfesch] oburgwebimaladi baddo bela burgwismalad” (Éxodo 4:19). Bibliagi soglenabalid, Raquel burgwisgua egi [néfesch] nosye, Raquel burgwisad obared (Génesis 35:16-19). Anmar binsabaloena Jesús ibmar sogsamogadgi: “Ani an sibad wawaad edarbed nuedid. Sibad wawaad edarbed nued na sibad wawaad ular, e san burba [na e, psykjé] na ugged” (Juan 10:11). Jesús na e sunnadi, anmar ular burgwisad. Degsoggua bergwable anmar weg narmaggar nanaid dagsadgine néfesch geb psykjé gine sunmaglenaile dulemar dula gudidiid obarnadaed. Anba Éxodo 4:19 gine Mateo 10:39 gine Juan 15:13 gine geb Gusmalad 20:10 gine dulemargi sunmaglenabalid, soglenagu néfesch geb psykjé.

Be, Biblia durdagmaidbali dagnadabboed hebreo gayabali néfesch naile geb griegobali psykjé naile nagabali sognasurdaed we geg burgweye. Bur soglenadaed néfesch geb psykjé nabir burgweye (Ezequiel 18:4, 20). Aagala mag iddolleged Bibliagine dule burgwaledgi sunmaglesgua, ibigala nai néfesch burgwaledye (Levítico 21:11).

Abar Bibliamargi hebreo gayabali rúaj naile geb griego gayabali pnéuma naile gaya baidsig ogwader nasisdamalad burbaye, san burbadibe wag gayabardina nasisdamalad espíritu. Weyob imaglesale noar nagusdaed. Ar Bibliagine rúaj geb pnéuma soglegedi, bunnoged obared dule dula sediid. Be daggena Salmo 104:29 (TNM) gine Jehovágala soged: “Be ei bunnoged [rúaj] osulosale burgwemaloed”. Lucas 8:55 (TNM) gine sognamogad: “Bunolo gannar bunnoded [pnéuma], geb yog gwisgualed”. Degsoggua Bibliagi rúaj geb pnéuma soglegedi bunnoged dule dula sediid obardaed. Aagala Biblia Traducción del Nuevo Mundo gine rúaj geb pnéuma naile unnila soglenasurdaed burbaye, soglenadabalid bunnogedye. Be daggena Noé ibagangi Bab Dummad neg odosoggargua sogsad: “Anidi an Dii Dummad owigoed nabbaneg odogega bergwable ibdurgan, nabir bunnomaladi [rúaj] bela burgwemalaga” (Génesis 6:17, TNM;7:15, 22). Degsoggua rúaj geb pnéuma bunnoged dula dulemar sediid obardaed, ibmar durganse baggale bunnogedbali dula gudimarmogad.

Anmar ibmar imaggegala dula gudiir gebed, gangued niggar gebed, ar igi radio nabir golegala electricidad abedae, bateríadibe aayobi anmar dula gudi guegala bunnodimogar gebed.

Be nabbi wisgubiele Bibliagi néfesch geb psykjé rúaj geb pnéuma ibu obarnadae be nabir absoged garda Razonamiento a partir de las Escrituras, página 32, 36 se geb página 136, 140 se, Jehovági sunmagmalad we garda onosad.