ZAITO lok, munxak morona toslo atmo asa, ani melea uprantui to jivo urta oxem manta. Zorui choddxe lok hacher patieta, Bible oxem kainch xikoina mhunn zannam zalea uprant, tankam ojap dista. Bible hachea vixim kitem xikoita tor?

Poilim Bible Hebrev ani Grik bhaxen boroilolo tem tumkam ugddas astolem. Hebrev bhaxen neʹphesh ani Grik bhaxen psy·kheʹ him utram, sumar 800 poros chodd pavtti Bible-ant uzar keleant ani tancho veg-vegllo orth asa. Zoso (1) lok, (2) zonvaram (3) munxachem vo zonvarachem jivit. Konkani Bible-ant hea utrank, pranni, jivit ani atmo him utram uzar keleant. Hea Hebrev ani Grik utrancho veg-vegllo orth dakhoilolim thoddim vachpam, atam ami polloum-ia.

Lok. “Noah tarum bandtalo tea kallar . . . fokot ek dhaktto atth zannancho [Grik, psy·kheʹ] zomo udka vorvim vattavlo.” (1 Pedru 3:20) Hea versant, Grik bhaxen “psy·khe” hea utrachea zagear, atth zannancho zomo mhunnttlolem asa. Tim atth zannam, Noah, tachi bail, tanche tig put ani tancheo bailo. Suttka 16:16-ant, Israel porjek manna ektthaim korchea vixim diloleo suchounneo asat. Tankam sanglolem, “zonn-eklean apnnak goroz titlench, ektthaim korchem tombunt aslolea aplea ghorcheanchi [Hebrew, neʹphesh] sonkia monant dhorun.” Tor tannim, ghorcheank vo ghorant kitle lok asat hem monant dhorun, manna ektthaim korchi goroz asli.

Zonvaram. Bible-ant rochnne vixim uloitana, “Devan mhollem, ‘Udkam jivea pranneamnim [Hebrev, neʹphesh] bhorom ani ontrallar, prithume voir, suknnim uddum!’ Ani toxench zalem. Devan mhollem, ‘Sogllea jin’sanche pranni [Hebrev, neʹphesh] zomnir utpon zaum: pospacheo  mon’zati, jivannim ani tore-torechim ran’vott zonavoram.’ Ani toxench zalem.” (Utpoti 1:20, 24) Hea vachpant nusteank, suknneank, postat tea zonvarank, ani ranvotti zonvarank neʹphesh hem utor uzar kelam.

Munxachem jivit. Thodde pavtt, Hebrev bhaxen neʹphesh ani Grik bhaxen psy·kheʹ, hea utrancho orth munxachem jivit mhunn dakhounk uzar kelam. Jehovan Moizesak sanglem, “Tuka [Hebrew, neʹphesh] marunk sodtale te soglle morun gele.” (Suttka 4:19) Jezuchea utram vixim-i niall korat. Tannem mhunnttlem, “Hanv boro Gonvlli. Boro gonvlli menddram pasot aplo jiv [Greek, psy·kheʹ] dita.” (Juanv 10:11) Hea soglea vachpamnim, Hebrev bhaxen neʹphesh ani Grik bhaxen psy·kheʹ, him utram munxachea jivitak uzar keleant.

Devachea utracho, bariksannen obheas kelo zalear neʹphesh ani psy·kheʹ hea utracho orth “kednanch morona toslo atmo” vo “sasnnak jieta toslo atmo” oxem khoinch dakhounk na. Tache bodlek, ne’phesh vo jiv, morta mhunn Bible-ant sanglolem asa.—Ezekiel 18:4, 20.

Hebrev bhaxen ru’ach ani Grik bhaxen pneuʹma him utram Konkani Bible-ant choddxe pavtt jiv, prann vo atmo mhunn bhaxantor keleant. Punn, hea Hebrev ani Grik utrancho sarko orth kitem tem Bible dakhoun dita. Udharonnak, Stotr 104:29 mhunntta, “Tum tondd mat dhamp, tim ghabortat; Tum prann [ruʹach] mat kadd, tim morun dhul’lint portotat.” Ani Jakob 2:26 sangta, “Zoxi pranna [pneuʹma] vinnem kudd mel’li zata, tosoch bhavarth kornniam vinnem mel’lo zata.” Hea versamnim, ru’ach ani pneuʹma hea utrancho orth, kuddik jiv haddtta to prann mhunn dakhoilam. Prann na zalear kudd morta. Taka lagon, ru’ach ani pneuʹma hea utrancho orth, jiv vo jivitacho svas oxem-i mhunnonk zata. Udharonnak, Noahachea  kallar buddtte uprant kitem zalem tem sangtana Utpoti 7:22 mhunntta, “zanchea naka puddamnim jivitacho svas [ruʹach] aslo te soglle pranni sukhe zomnivele morun gele.” (Utpoti 7:15) Tor, “ru’ach” mhunnttlear jivitacho svas vo jivitachi xokti ji soglea pranneank jivont dovorta.

Udharonnak, ek reddio choltolo zalear taka laittichi goroz asta. Toxench ek kudd jivont uronk, jivitacho svas vo xokti gorjechi. Eka reddio-nt bettri ghalit zalear, tea bettrint aslolea xokte udexim to chalu zata. Bettri ghalunk na zalear, to cholchona. Toxench, ek reddio laitticher cholta ani tachi vaier kaddli zalear, to-ui cholchona. Teach bhaxen, ru’ach vo pneu’ma amchi kudd jivi dovorta. Laitti bhaxen ru’ach vo pneu’ma hi ek xokti, ji chintunk xokona. Ti xokti na zalear, amchi kudd morta, ani Stotr pustokant sanglolea pormonnem ami “dhul’lint portotat.”

Munxachea mornna vixim uloitana Upodexok 12:7 mhunntta, ‘Tedna dhul’l ek pavtt zomnintli ail’li toxi zomnik portotoli ani Devan dil’lo jiv [ruach] tache-xim portun vetolo.’ Eke kuddintlo jiv vo xokti bhair soron voita tednam, ti kudd morta ani tichi porot dhul’l zata. Toxench, Devan dilolo jiv vo xokti, Deva kodden porot voita. (Job 34:14, 15; Stotr 36:9) Punn hacho orth, jiv vo jivitachi xokti sorgar voita oxem nhoi. Konnui morta tednam to munis portean jietolo vo na, hem Dev tharaita. Tachem jivit Devachea hatant asta. Fokot Devuch tea munxak, jiv vo jivitachi xokti diun porot jivont korunk xokta.

“Somadhimnim” asat tea lokank, Jehova Dev porot jivont korcho asa hem zannam zal’lean amkam kitli khuxalkai bhogta nhoi! (Juanv 5:28, 29)  Mornnachea nhident nhidon aslolea munxank uttoitana, Jehova tankam ek novi kudd ditolo ani tea kuddint jiv vo jivitachi xokti ghalun, jivont kortolo. To khubuch khuxalkaiecho dis astolo!

Tumkam neʹphesh ani psy·kheʹ vo ruʹach ani pneuʹma, him utram Bible-ant koxim uzar keleant tea vixim anik zannam zaunk zai zalear, tumchean Jehovachea Sakxeamnim chhaplolem pustok, Reasoning From the Scriptures (Inglez bhaxen) pan 375-384 pollounk zata.