ЧА ТӦ дьшьрмиш дьби, мәʹна ван гьлийа чь йә? Һьнәк баԝәр дькьн, кӧ әв һәйә тьштәк нава мәрийада, йе кӧ найе дитьне у намьрә. У ԝана тʹьре кӧ паши мьрьна бәдәне әв тьштәк, йе кӧ найе дитьне жь мәрийа дәрдькʹәвә у диса дьжи. Гәләк жь мәрийа һәма ӧса дьшьрмиш дьбьн у һьн жи әԝана әʹщебмайи дьминьн гава педьһʹәсьн, кӧ әв һинкьрьн ль сәр һʹиме Кʹьтеба Пироз нинә. Ԝәрә әм пебьһʹәсьн, ча хәбәред «рʹӧһʹ» у «нәфс» дь Кʹьтеба Пирозда тенә хәбате.

Пешийе, ԝәрә әм хәбәрдьн дәрһәԛа хәбәра, нәфс. Дьбәк те бира тә кӧ Кʹьтеба Пирозә орижинал һатийә ньвисаре ль сәр зьмане Ибранийа у Йунанийа. Гава ньвискʹаред Кʹьтеба Пироз дәрһәԛа «нәфсе» дьньвисин, ԝана хәбәрәкә Ибрани дьданә хәбате, нефеш у хәбәрәкә Йунани психе. Әв дӧ хәбәр дь Кʹьтеба Пирозда, ԝәкә 800 щара һатьнә ньвисаре. Ле дь Мьзгинийеда ԝәлгәрʹандьна Стокһолме, әв дӧ хәбәр, ль сәр зьмане Кӧрманщи гәләк щар те ԝәлгәрʹандьне ча «нәфс». Һәрге тӧ дина хԝә бьдейи, хәбәра нәфс ча те хәбьтандьне дь Кʹьтеба Пирозда, тӧйе те дәрхи ԝәки әԝ гәлә щар те готьне ль сәр мәрийа. Ньһа ԝәрә әм дәрһәԛа ве йәке чәнд мәсәла пебьһʹәсьн.

Ԝи зәмане Нӧһда, гава гәми дьһатә чекьрьне. Ԝеда һьндьк, аԝа готи һʹәйшт нәфс «нава аведа хьлаз бун» (1 Пәтрус 3:20). Ль вьр хәбәра, «нәфс» әшкәрә ль сәр мәрийа те готьне, демәк Нӧһ, жьна ԝи, се кӧрʹед ԝи у жьнед ԝан. Дь кʹьтеба Дәркʹәтьне 16:16-да, щьмәʹта Исраелирʹа дәрһәԛа тʹопкьрьна маннайе, рʹебәри һатә дайине. Ԝанарʹа һатьбу готьне: «Бьра һәр кәси ԝә, ԛаси хԝарьна хԝә жь ԝи бәрәв кә, ԝәкә һʹәсабе ԝан нәфса, чьԛас кӧ коне һәр кәсида һәнә». Демәк һәр кәс, мана гәрәке тʹера нәфәред хԝә тʹоп кьра. Диса чәнд мәсәла дькари бьбини дь кʹьтеба Дәстпебун 46:18; Йешуа 11:11, Кʹаред Шандийа 7:14-да, кʹидәре кӧ «нәфс (ПКʹМ)» ль сәр мәрийа те готьне.

Һәрге тӧ һе кʹур һин би Кʹьтеба Пироз, тӧйе бьбини ԝәки дь Кʹьтеба Пирозда тʹӧ щикида найе готьне, кӧ нәфс һʹәта-һʹәтайе дьжи йан жи нәмьрийә. Ле бь рʹастийе Кʹьтеба Пироз әʹйан дькә, кӧ нәфс дьмьрә у нажи (Һәзәԛел 18:4, 20).

Ньһа ԝәрә әм бьньһерʹьн кӧ ча дь Кʹьтеба Пирозда хәбәра «рʹӧһʹ» те хәбате. Һьнә жь мәрийа дьшьрмиш дьбьн, кӧ «рʹӧһʹ» у «нәфс» йәкә. Ле бь рʹастийе әв ӧса нинә. Кʹьтеба Пироз рʹьнд нишан дькә, ԝәки ортʹа «рʹӧһʹ» у «нәфсда», фьрԛи һәйә. Ле гәло, фьрԛийа ԝан чьда нә?

Гава ньвискʹаред Кʹьтеба Пироз дәрһәԛа «рʹӧһʹ» дьньвисин, әԝана хәбәра Ибрани рʹуаһ у хәбәра Йунани пнеума дьдан хәбате. Кʹьтеба Пироз хԝәха мәʹна ван гьлийа шьровәдькә. Мәсәлә, дь кʹьтеба Зәбура 104:29-да, ӧса ньвисар ә: «Дәма кӧ тӧ [Йаһоԝа] рʹӧһʹе [рʹуаһ] ԝан дьстини, әԝ дьмьрьн у диса ль шунда вәдьгәрʹьн аха хԝә йа бәре (АБ)». Ӧса жи дь кʹьтеба Аԛуб 2:26-да те готьне кӧ «ԛальб бе рʹӧһʹ [пнеума] мьри йә». Жь ван рʹеза те кʹьфше кӧ «рʹӧһʹ», әʹмьр дьдә бәдәне. Бейи «рʹӧһʹ» бәдән мьрийә. Хенщи ве йәке дь Кʹьтеба Пирозда хәбәра рʹуаһ те ԝәлгәрʹандьне нә кӧ тʹәне ча «рʹӧһʹ», ле ӧса жи ча, «бин» йан бина жийине. Мәсәлә, дәрһәԛа Селава Дьнйайе ԝәʹде Нӧһ, Хԝәде гот: «Ва әзе ава тофане ль сәр дьне рʹакьм, ԝәки һәр бәдәна кӧ бин [рʹуаһ] ль бәр һәйә бьн пʹәрʹе әʹзменда ԛьрʹбә у ль сәр рʹуйе әʹрде жи чь кӧ һәйә ӧнда бә» (Дәстпебун 6:17; 7:15, 22, ПКʹМ).

Демәк, рʹӧһʹ у нәфс ԝәкә һәв ниньн. Мәсәлә ча сәва кӧ радио бьхәбьтә лазьм ә ток, ӧса жи сәва кӧ бәдәна мә бьжи лазьм ә рʹӧһʹ. Әв йәк рʹьнд те кʹьфше жь мәсәла радиойе, йе кӧ бь батарей дьхәбьтә. Сәва кӧ радио векʹәвә, лазьм ә батарей. Әве йәке әм ӧса жи дәрһәԛа радиойе кӧ ль сәр токе дьхәбьтә, дькарьн бежьн. Бейи ток радио ԝе нәхәбьтә. Дәрһәԛа рʹӧһʹ жи әм дькарьн бежьн, ԝәки әв ԛәԝат ә, йа кӧ әʹмьр дьдә бәдәне у нет-фькьред ԝе тʹӧнә. Демәк рʹӧһʹ кәс нинә, әв ԛәԝат ә. Ча жи зәбурбеж гот, бейи рʹӧһʹ, демәк бейи бина жийине, мәри «дьмьрьн у диса ль шунда вәдьгәрʹьн аха хԝә йә бәре».

Дь кʹьтеба Ԝаиз 12:7-да ньвисар ә, ԝәки гава мәри дьмьрә бәдәна ԝи дьбә ах у вәдьгәрʹә әʹрде, ле рʹӧһʹе ԝи чьмки жь Хԝәде һатьбу дайине, пашда вәдьгәрʹә бал Хԝәде. Демәк гава рʹӧһʹ йан бина жийине жь бәдәне дәрдькʹәвә, бәдән дьмьрә у диса вәдьгәрʹә ахе жь кʹижани һатә әʹфьрандьне. Ле бина жийине вәдьгәрʹә щәм канийа әʹмьр, демәк бал Хԝәде (Ибо 34:14, 15; Зәбур 36:9). Әв йәк найе һʹәсабе, кӧ бина жийине йан әв ԛәԝат, дьчә ль әʹзмана. Әв те һʹәсабе, кӧ тʹәне Йаһоԝа дькарә мьрийа вәгәрʹинә ль жийине. Йан жи әм дькарьн бежьн, ԝәки әʹмьре мәрийа дь дәсте Хԝәдеда нә. Чьмки тʹәне ԛәԝата Йаһоԝа дьгьһиже,  ԝәки рʹӧһʹ йан бина жийине бьдә мәрийа сәва кӧ әԝана диса бьжин.

Дьле мә рʹьһʹәт дьбә гава әм педьһʹәсьн, кӧ «һʹәмуйед тʹьрбада» йед кӧ бь хәԝа мьрьне рʹаза нә, бь сайа Хԝәде ԝе вәгәрʹьнә ль жийине! (Йуһʹәнна 5:28, 29). Гава Йаһоԝа ԝе ԝана жь мьрьне рʹакә, әԝе ԝанарʹа бәдәнәкә ну бьдә. Йаһоԝа ԝе рʹӧһʹ, йане бина жийине пʹьфи ԝан бькә у әԝана диса ԝе бькарьбьн бьжин. Әв йәк шабунәкә мәзьн ԝе мәрийарʹа бинә у әме чьԛас бәхтәԝар бьн, ӧса нинә!

Сәва кӧ һе кʹур пебьһʹәси ԝәки ча хәбәра «рʹӧһʹ» у «нәфс» дь Кʹьтеба Пирозда тенә хәбате, дькари бьньһерʹи брошура «Чь Дьԛәԝьмә Ԝәʹде Мьрьне?» Ль сәр рʹупʹела 375-384 (Ингл.), ӧса жи кʹьтеба, «Шеԝьркьрьн сәр Һʹиме Кʹьтеба Пироз». Әв әʹдәбйәт Шәʹдед Йаһоԝа нәшьр кьрьн, у әԝ ль сәр гәлә зьмана һатьн ԝәлгәрʹандьне.