NGELE to uvu oshitya “omwenyo” nosho wo “ombepo,” oshike hashi ya momadhiladhilo goye? Aantu oyendji oyi itaala kutya omwenyo nenge ombepo oshinima shoka shi li mutse, ihe ihashi monika noihashi si. Ohaya dhiladhila kutya ngele omuntu okwa si, oshinima shoka ihaashi monika ohashi thigi po olutu e tashi tsikile okukala nomwenyo. Molwaashoka eitaalo ndyoka olya taandela apuhe, aantu oyendji ohaya kala ya kumwa okwiilonga kutya Ombiimbeli hasho tayi ti ngawo nandonando. Ihe mbela Oohapu dhaKalunga otadhi ti omwenyo nombepo oshike?

Tango, natu tale koshitya omwenyo. Otashi vulika to dhimbulukwa kutya tango konyala Ombiimbeli ayihe oya li ya nyolwa mOshihebeli nomOshigreka. Oshitya shOshihebeli nefesh noshitya shOshigreka pyihe mbyoka ya longithwa mOmbiimbeli olundji oya tolokwa mOmbiimbeli yOshindonga noshitya “omwenyo,” ihe iikando yontumba oniitya “omunamwenyo,” “oshinamwenyo” nosho wo “omuntu.” Ngele owa konakona omukalo moka iitya nefesh nenge pyihe ya longithwa mOmbiimbeli, oto ka mona sha yela kutya iitya mbika yOshihebeli nOshigreka  otayi ulike lela (1) kaantu, (2) kiinamwenyo nenge (3) kokukala nomwenyo kwomuntu nenge kwoshinamwenyo. Natu konakoneni omanyolo gontumba ngoka taga gandja omaityo ngoka gatatu ga yoolokathana.

Aantu. Omupisalomi okwa popi kombinga yaJehova a ti: “Okwa kumitha oomwenyo [nefesh] dha sa enota, noomwenyo [nefesh] dha sa ondjala, okwe dhi kutitha [uuwanawa].” (Episalomi 107:9, OB-1954) Menyolo ndyoka oshitya “oomwenyo” (nefesh) osha yela kutya otashi ulike kaantu, molwaashoka aantu oyo haya si enota nondjala. MuJeremia 13:17 (OB-1954) omupolofeti Jeremia ota ti kutya ‘omwenyo gwe otagu kala nokulililila . . . oshoka oshigunda shOmuwa otashi ka faalelwa muupika.’ Mpaka osha yela wo kutya Jeremia oye a li a lili. Iiholelwa yimwe yomOmbiimbeli mbyoka ya popya iitya nefesh nenge pyihe yu ukithwa komuntu nenge kaantu otayi adhika mOmbiimbeli yOshikwanyama muGenesis 2:7, Josua 11:11 nomIilonga 3:23.

Iinamwenyo. Mehokololo lyOmbiimbeli li na ko nasha neshito, otatu lesha mo taku tiwa: “Kalunga okwa popi a ti: ‘Momeya namu wiwime iinamwenyo [nefesh] yomaludhi gi ili nogi ili, noondhila nadhi tuke keyalelo lyegulu. Osho nosha ningwa.’” (Genesis 1:20, 24) Menyolo ndyoka, oshitya “iinamwenyo” shoka sha kwatela mo oohi, iinamwenyo yomegumbo nosho wo iinamwenyo yomokuti, otashi toloka oshitya shOshihebeli nefesh pauwindji, shoka tashi ti “oomwenyo.” Oshitya shoka nefesh osha tolokwa wo ‘iinamwenyo’ muGenesis 9:10 nomuLevitikus 11:46.

Okukala nomwenyo u li omuntu. Omathimbo gamwe oshitya “omwenyo” otashi ulike kokukala nomwenyo u li omuntu. Jehova okwa li a lombwele Moses a ti: “Ayehe, ya li ya hala omwenyo gwoye [nefesh], oya sa po.” (Eksodus 4:19, OB-1954) Aatondi yaMoses oya li ya hala shike? Oya li ya hala okudhipaga Moses opo kaa kale we nomwenyo. Nale, manga Rakel a li ta mono okanona ke kokamati Benjamin, ‘omwenyo gwe [nefesh] ogwe mu thigi po, oshoka ye kwa li ta si.’ (Genesis 35:16-19, OB-1954) Pethimbo mpoka, Rakel ka li we e na omwenyo, shoka tashi ti kutya okwa sa. Konakona wo oohapu dhaJesus tadhi ti: “Ongame omusita ngo omwaanawa. Omusita omwaanawa ota gandjele oonzi omwenyo gwe [pyihe].” (Johannes 10:11) Jesus okwa gandjele aantu omwenyo gwe (pyihe) nenge noohapu dhilwe, okwa sile aantu.  Momanyolo ngoka gOmbiimbeli, oshitya “omwenyo” osha yela kutya otashi ulike kokukala nomwenyo kwomuntu. Oto ka mona iiholelwa yimwe yi na ko nasha neityo ndika lyoshitya “omwenyo” (nefesh nenge pyihe) mAakwaniilwa yotango 17:17-23, Mateus 10:39, Johannes 15:13 nomIilonga 20:10.

Ngele to konakona Oohapu dhaKalunga, oto ka mona kutya kapu na mpoka Ombiimbeli ya popya kutya omwenyo (nefesh nenge pyihe) ihagu si. Pehala lyaashono, Omanyolo otaga ti kutya omwenyo (nefesh nenge pyihe) ohagu si.—Hesekiel 18:4, 20, OB-1954.

“OMBEPO” OSHIKE?

Ngashingeyi natu konakoneni nkene Ombiimbeli ya longitha oshitya “ombepo.” Aantu yamwe ohaya dhiladhila kutya oshitya “ombepo” noshitya “omwenyo” oyi na eityo lya faathana. Ihe shoka hasho shi li ngawo. Ombiimbeli otayi yelitha nawa kutya “ombepo” nosho wo “omwenyo” otayi ulike kiinima iyali ya yoolokathana. Oya yoolokathana ngiini?

Aanyoli yOmbiimbeli oya longitha oshitya shOshihebeli ruah noshitya shOshigreka nema sho ya nyola kombinga yoshitya “ombepo.” Omanyolo otaga yelitha eityo lyiitya mbyoka. Pashiholelwa, Episalomi 104:29 (OB-1954) otali ti: ‘Jehova to yi kutha ombepo [ruah], oyo notayi shituka ontsi yevi.’ Jakob 2:26 (KB) ota ti wo: ‘Olutu kaalu na ombepo [nema] olwa sa.’ Ano moovelise ndhoka, “ombepo” otayi ulike kwaashoka hashi mwenyopaleke olutu, sha hala okutya, oonkondo dhomwenyo ndhoka dhi li momuntu. Ngele olutu kalu na ombepo, nenge oonkondo dhomwenyo, olwa sa. Onkee ano, otatu lesha muJob 34:14, 15 taku ti: “Kalunga ngele ta kutha po ombepo [ruah] nomufudho, nena kehe omuntu ota si nota shuna montsi yevi.” Kungeyi, “ombepo” otayi ulike koonkondo ihaadhi monika ndhoka hadhi inyengitha iishitwa ayihe yi na omwenyo.

Omwenyo nombepo inayi faathana. Olutu olwa pumbwa ombepo ngaashi owala oradio ya pumbwa oonkondo dholusheno opo yi longe. Oku shi thaneka natango, dhiladhila koradio. Ngele owa tula omamanya moradio e to yi patulula, oonkondo dholusheno ndhoka dhi li momamanya ohadhi mwenyopaleke oradio, oku shi popya pathaneko. Ihe ngele oradio kayi na omamanya, ihayi vulu okulonga. Ooradio oonkwawo nadho ngele odha kuthwa ko kolusheno, itadhi ka kala tadhi longo. Sha faathana,  ombepo oyo oonkondo ndhoka hadhi mwenyopaleke omalutu getu. Niishewe, ngaashi olusheno, ombepo kayi na omaiyuvo noihayi vulu okudhiladhila. Oyo oonkondo kaadhi na omaukwatya gopantu. Ihe nopwaahe na ombepo nenge oonkondo dhomwenyo ndhoka, omalutu getu ‘otaga si notaga shuna montsi yevi,’ ngaashi Job e shi popya.

Mokupopya shi na ko nasha nokusa kwomuntu, Omuuvithi 12:7 ota ti: “Ontsi otayi shuna mevi, ngaashika ya li nale, nombepo otayi galukile kuKalunga, ngoka e yi gandjele.” Ngele ombepo nenge oonkondo dhomwenyo odha thigi po olutu, olutu ohalu si e talu shuna moka lwa zile, mevi. Sha faathana, oonkondo dhomwenyo ohadhi shuna hoka dha zile, kuKalunga. (Job 34:14, 15; Episalomi 36:9) Shoka inashi hala okutya kutya oonkondo dhomwenyo ohadhi yi lelalela megulu. Pehala lyaashono, otashi ti kutya etegameno kehe lyomuntu ngoka a sa lyokukala ishewe nomwenyo monakuyiwa olyi ikolelela kuJehova Kalunga. Omwenyo gwe ogu li miikaha yaKalunga, oku shi popya pathaneko. Okoonkondo owala dhaKalunga omuntu ta vulu okupeululwa ombepo nenge oonkondo dhomwenyo, opo a vule okukala ishewe nomwenyo.

Itashi hekeleke tuu okutseya kutya shoka osho naanaa Kalunga ta ka ningila aasi mboka e na momadhiladhilo ge! (Johannes 5:28, 29) Pethimbo lyeyumuko, Jehova ota ka gandja omalutu omape kaantu mboka ya sa e te ya mwenyopaleke moku ya tula ombepo nenge oonkondo dhomwenyo. Itali ka kala tuu ethimbo lyenyanyu!

Ngele owa hala okwiilonga oshindji shi na ko nasha niitya “omwenyo” nosho wo “ombepo” ngaashi ya longithwa mOmbiimbeli, oto ka mona omauyelele ga simana moshileshomwa Ondjila ndjoka tayi fala komwenyo gwaaluhe mbela owe yi mona?, epandja 12-14 nosho wo epandja 375-384 lyembo Reasoning From the Scriptures, lya nyanyangidhwa kOonzapo dhaJehova.