N’Ekya Buzima ngu Abantu Baine Ekintu Ekitareebwa Ekibatuuramu Kandi Ekitafa?

KU ORIKUHURIRA ekigambo “omwoyo,” n’enki eki orikuteekateekaho? Baingi nibaikiriza ngu ekigambo eki nikimanyisa ekintu ekitareebwa kandi ekitafa ekituura omuriitwe. Nibateekateeka ngu aha kufa, ekintu eki ekitareebwa ekituura omu bantu nikiruga omu mubiri ngu kandi kigumizamu kubaho. Obu enyikiriza egi enjanjaire munonga, baingi nibatangaara ku barikwega ngu ekyo buzima tikyo Baibuli erikwegyesa. Mbwenu shi obwo okurugiirira aha Kigambo kya Ruhanga, omwoyo nikimanyisa ki?

Abahandiiki ba Baibuli bakakoresa ekigambo ky’Oruheburaayo ruʹach n’eky’Orugriika pneuʹma barikuhandiika aha “mwoyo.” Ebyahandiikirwe byo byonka nibyoreka amakuru g’ebigambo ebyo. Nk’eky’okureeberaho, Yakobo  2:26 ‘omubiri ogutaine mwoyo [pneuʹma] niguba gufiire.’ Omu runyiriri oru, “omwoyo” nikimanyisa ekyo ekirikureetera omubiri kuba oguhuriire. Omubiri gwaba gutaine mwoyo niguba gufiire. Omu Baibuli, ekigambo ruʹach nikivunuurwa ti kumanyisa “omwoyo” kyonka beitu kandi nka “omwitsyo gw’amagara” nari amaani g’amagara. Nk’eky’okureeberaho, ebirikukwata aha Mwegyemure gw’omu bunaku bwa Noa, Ruhanga akagira ati: “Ndyareeta omwegyemure gw’amaizi gushwekye ensi okucwekyereza byona ebiine omubiri n’omwitsyo [ruʹach] gw’amagara, mbimareho ahansi y’eiguru.” (Okutandika 6:17; 7:15, 22) “Omwoyo” n’ahabw’ekyo nikimanyisa amaani agatareebwa (ekyo ekitandikaho amagara) agari omu biine omubiri ebihuriire.

Omubiri nigwetenga omwoyo nk’oku radiyo erikwetenga amashanyarazi okubaasa kukora. Okukyetegyereza gye, teekateeka ahari kaaradiyo. Ku orikuta amanda omuri kaaradiyo, reero okataho swici, amashanyarazi agari omu manda nigakareetera kugamba. Kwonka haaba hatarimu manda, kaaradiyo nikaba katarikukora. Nikyo kimwe na radiyo ei orikukuura omu mashanyarazi. Omu muringo nigwo gumwe, omwoyo nigo maani agarikureetera emibiri yaitu kuba ehuriire. Kandi nk’amashanyarazi, omwoyo tigwine nyehurira kandi tigurikubaasa kuteekateeka. Ti kintu ekiine emitwarize y’obuntu. Kwonka omwoyo nari shi amaani g’amagara gaaba gatariho,  emibiri yaitu ‘neefa, egaruka omu mucuucu ei yaarugire,’ nk’oku omuhandiiki wa Zaaburi yaagizire.

Arikugamba aha kufa kw’omuntu, Omuburiizi 12:7, (NW) nirugira ruti: “Omucucu [gw’omubiri gwe] nigugaruka omu itaka, nk’oku gwabaire guri, n’omwoyo gugaruka ahari Ruhanga owaguhaire.” Omwoyo, nari shi amaani g’amagara ku gurikuruga omu mubiri, omubiri nigufa reero gugaruka ei gwarugire—omu itaka. Nikyo kimwe, amaani g’amagara nigagaruka ei gaarugire—ahari Ruhanga. (Yobu 34:14, 15; Zaaburi 36:9) Eki tikirikumanyisa ngu buzima amaani g’amagara nigagyenda gaza omu iguru. Kureka, nikimanyisa ngu aha muntu owaafa, amatsiko g’okugaruka kugira amagara gegami ahari Yehova Ruhanga. Amagara ge nigaba gari omu mikono ya Ruhanga. Omuntu ogwo kugaruka kuba ohurire Ruhanga wenka niwe arikubaasa kumuha amagara.

Ka nikihuumuriza okumanya ngu eki buzima nikyo Ruhanga arikorera abo boona abarikwijukwa abagwejegyereire omu “bituuro!” (Yohaana 5:28, 29) Aha bunaku bw’okuzooka, Yehova naija kuheereza abo abagwejegyereire omu kufa omubiri musya kandi abahindure abahuriire arikubaha omwoyo nari shi amaani g’amagara. Obunaku obwo ka nibwija kureetera abantu baingi okushemererwa!

Ku oraabe nooyenda kwega ebiriku kiraho ebirikukwata aha kigambo “omwoyo” nk’oku  kirikukoresibwa omu Baibuli, noija kushangwa ebiraakuhwere omu katabo Oruguuto rw’Amagara Agatahwaho-Waruzoire? aha rupapura 12-14 hamwe n’aha rupapura 380-84 ez’ekitabo Reasoning From the Scriptures, byombi ebyahandiikirwe Abajurizi ba Yehova.