TE BETOK a oumerang el kmo ngngar er ngii a kmung ngerang el diak el meues me a diak el mad el ngar er a chelsed. Te omdasu el kmo sel demad e ngtuobed er a bedenged e melemolem el ngar. Me tia el klaumerang el mla oberk a uchul, me te betok a mechas a rengrir sel lsuubii el kmo tia el osisechakl a diak el ngar er a Biblia. Me ngngera ngolisechakl a Biblia?

Ke locha dirk medengei el kmo a Biblia er a lekot el melluches e ngmle tekoi er a Hebru me a Grik. A tekoi er a Hebru el neʹphesh me a tekoi er a Grik el psy·kheʹ a debetik er a chelsel a Biblia el betok er a 800 el taem. Sel bo mkerekikl el merriter er a rolel a Biblia a lousbech er a tekoi er a Hebru el neʹphesh me a tekoi er a Grik el psy·kheʹ e ngmo sebechem el mesa el kmo, aika el tekoi a melutk el kirir a (1) rechad, me a (2) charm, me a lechub e (3) ngklengar er a chad me a lechub e ngcharm. Me bo domes a bebil er a bades el ousbech aika el tekoi el neʹphesh me a psy·kheʹ el ngar er aika el edei el rolel.

Rechad. Sera taem er a ‘Noah ra irechar, e te di mlosobel ra ralm ar di mle teai [psy·kheʹ] el mlo ngmasech er ngiil arhe.’ (1 Petrus 3:20, BT) Ngsebeched el mesa el kmo, tia el tekoi er a Grik el psy·kheʹ a melutk el kirir a rechad, el ngii a Noah me a bechil me tirke el tedei el ngelekel el sechal me a rebecherir. A Exodus 16:16 a mesaod el kirel a ulekrael el lengilai a rechad er a Israel el kirel a omengudel el manna. Ngmelekoi el kmo: “Dertal chad [neʹphesh] a ngmai a ildisel a ikel lousbech a rokui el chad el ngar a tento er ngii.”  Me a ildisel a manna el lullai a mle otirakl er a ulecherengelir a derta el chad er a telungalek.

Charm. A Biblia a mesaod el kirel sel taem el Dios a ulemeob a rokui el tekoi el kmo: “Dios a dilu el kmo, ‘Le bor ngii er a daob ma ralm a bek el bedengel outeliil el bleob, ma suebek el charm bo lesebek er a melidiul,’ me ng mlo ua isei. Ma Dios a dilu el kmo, ‘Le bor ngii er a chutem a rokui el bedengel a turturk el charm ma rokui el bedengel a meklou ma mekekerel tebelik el charm,’ me ng mlo ua isei.” (Genesis 1:20, 24) Ngar aika el bades e a ngikel, me a rokui el bedengel a turturk el charm, me a rokui el bedengel a meklou me a mekekerei el tebelik el charm a melutk el kirel a osisiu el tekoi er a Hebru el neʹphesh.

Klengar er a chad. A lebebil er a taem e a tekoi er a Hebru el neʹphesh me a tekoi er a Grik el psy·kheʹ a melutk el kirel a klengar er a chad. A Elias a milluluuch el mo er a Jehovah el kmo: “Moltii a klengar [neʹphesh] er ngikal ngalek.” (1 King 17:21) Ngdirrek el sebechem el melatk a tekingel a Jesus. Ngmillekoi el kmo: “Ngak a ungil klekar. A ungil klekar a mengkengkii a klengar [psy·kheʹ] er ngii el kirel a sib.” (Johanes 10:11, BT) Ngar aika el bades e a tekoi er a Hebru el neʹphesh me a tekoi er a Grik el psy·kheʹ a bleketakl el melutk el kirel a klengar er a chad.

A omolemolem el mesuub er a Tekingel a Dios e ngmo ochotii er kau el kmo, a tekoi er a Hebru el neʹphesh me a tekoi er a Grik el psy·kheʹ a kmal diak lolutk el kirel a kmung ngerang el tuobed er a bedenged e melemolem el ngar er a uriul er a kodall.

A tekoi er a Hebru el ruʹach me a tekoi er a Grik el pneuʹma a blechoel el moiuid el “reng” el tekoi er a Belau. Engdi ngera mera el belkul a tekoi er a Hebru el ruʹach me a tekoi er a Grik el pneuʹma el ngar er a Biblia? A Job 34:14, 15 a melekoi el kmo: “Chomko Dios a liluut el nguu a telil a klengar [ruʹach], e a rokui el chad a mo mad e lmuut el mo chebechab.”  E a Jakobus 2:26, BT, a melekoi el kmo: “Chelechad el diak a reng [pneuʹma] er ngii a ulekoad.” Ngar aika el bades e a tekoi el ruʹach me a pneuʹma a melekoi el kirel a klisiich el omekngar er a bedengel a chad. A lak tia el klisiich e ngdiak a klengar er a chad. Me a leuaisei, ngngar er a Biblia e a tekoi el ruʹach me a lechub e ng pneuʹma a sebechel el moiuid el klisiich me a lechub e ngklisichel a klengar. El uai tiang, sera lebo er ngii a Ieleb er a taem er a Noah e a Dios a dilu el kmo: “Ak mo odureklii a eeleb el mor a chutem el mo olekngemed a rokui el outeliil [ruʹach].” (Genesis 6:17) Me a ruʹach a melutk el kirel a diak lemeues el klisichel a klengar el ngar er a chelsir a rokui el chad me a charm.

A bedengel a chad a ousbech er tia el klisichel a klengar el di uai a razio el lousbech er a klisichel a dengki. Ka di momtab er a razio. Sel motuu a battery er ngii e a klisiich el ngar er a chelsel a battery a ua lebsa klengar er tia el razio. A lak a battery e tia el razio a ulekoad. Me aike el razio el dongetiut a diak el sebechel el merael a lak el cheltiut el mo er a dengki. Me ngdi osisiu, a ruʹach me a pneuʹma a melutk el kirel a klisiich el msa bedengel a chad a klengar. Ngdi uai a klisiich el mengai er a dengki me a lechub e ng battery, a klisichel a klengar a diak lomdasu el ka lolechesuar a tekoi. A lak tia el klisichel a klengar, e a bedengel a chad a ulekoad e “lmuut el mo chebechab,” el ua lolekoi a babier er a Job.

Me a Olisechakl 12:7 a mesaod el kirel sel lemad a chad el kmo: “A bedenged a mo moluut el mor a chebechab er a chutem, ma telil a klengar [ruʹach] a lmuut el mor a Dios, el ngikel milskid.” Me sel bo lak a klisichel a klengar er a bedengel a chad, e a chad a mad e lmuut el mo  chebechab el lemlengai er ngii. Me nguaisei, e a klisichel a klengar a lmuut el mo er a Dios el ngii a milskid tia el klisiich. (Job 34:15; Psalm 36:9) Tia diak el belkul a kmo, tia el klisichel a klengar er a chad a mo er a eanged. Ngbai belkul a kmo, a lsekum a chad a mad e a omeltkel el lmuut el mo nguu a klengar er a ngar medad a ngar er a Jehovah el mei. Ngdi oeak a klisichel a Dios e ngmo sebechel a chad el lmuut el mo ngar.

Ngkmal mengelaod a rengud e le tia el tekoi a bo loruul er ngii a Jehovah el kirir tirke el rokui el mla mad e ngar er a omeltkel. (Johanes 5:28, 29) Sel taem er a okiis e a Jehovah a mo meob a beches el bedengir e mo mesterir a klisichel a klengar me te lmuut el mo ngar. Tia ulterekokl el kmal mo klou el sils er a deurreng!