ARAMAS tohto kin kamehlele me mie mehkot me aramas sohte kak kilang oh me sohte kak mehla kin mihmi nan loalatail. Irail kin medemedewe me ahnsou me aramas kin mehla, me soh sansal wet kin pedoisang nan paliwar en aramas melahro oh uhd wie momourseli. Pwehki aramas tohto kin kamehlele padahk wet, re kin pwuriamwei ni ar kin diarada me met weksang douluhl dahme Paipel kin padahngki. Eri, dahme Paipel kin padahngki duwen ire wet?

Ele ke tamataman me pali laud en Paipel tepin ntingda ni lokaiahn Ipru oh Krihk. Lepin lokaiahn Ipru neʹphesh oh lokaiahn Krihk psy·kheʹ pwarada pak tohtohsang 800 nan Paipel. Ni omw pahn tehk kanahieng ia duwen lepin lokaia pwukat ar kin kadoadoahk nan Paipel en lokaiahn Ipru oh lokaiahn Krihk, e pahn sansalda me lepin lokaia pwukat kin pidada (1) aramas, (2) mahn, de (3) mour me aramas emen de mahn emen kin ahneki. Lepin lokaia pwukat sohte kin kadoadoahk pwehn kasalehda mehkot me kin momour mwurin emen mehla. Ia duwen atail ese met? Nna, kitail  tehkpene ekei iren Paipel kan me kin kasalehda iren madamadau siluh pwukat.

Aramas. Paipel mahsanih me ni mwehin Noha “me welimen [lokaiahn Krihk psy·kheʹ] . . . pitla.” (1 Piter 3:20) Wasaht lepin lokaia psy·kheʹ kin wehwehki aramas, Noha, eh pwoud, nah pwutak silimen, oh arail pwoud akan. Eksodus 16:16 mahsanih duwen kehkehlik me kohwong mehn Israel akan me pid duwen arail pahn rik manna. Kaweid kohwong irail mahsanih: “Emenemen kumwail en kihpene uwen me e anahne tungoale . . . ong emen aramas [lokaiahn Ipru, neʹphesh].” Kahrehda uwen manna me kin rikirikda kin pahrekiong uwen tohtohn aramas akan nan ehuehu peneinei.

Mahn akan. Duwen koasoiepen kepikipikda, Paipel mahsanih: “Koht pil ketin mahsanih, ‘Soahng koaros me kin mie ar mour en audehla pihl akan, oh menpihr kan en audehla pahnlahng.’ Koht pil ketin mahsanih, ‘Pwelen sampah en kapwarehda soangen mahn mahnd oh lawalo koaros oh soangen mahn laud oh tikitik koaros’​—eri, e ahpw pweida.” (Senesis 1:20, 24) Nan iren Paipel wet, mwahmw, mahn mahnd oh mahn lawalo kan, irail koaros kin kohsang lepin lokaia tehieu, neʹphesh.

Mour me aramas emen kin ahneki. Ekei pak lepin lokaiahn Ipru neʹphesh oh lokaiahn Krihk psy·kheʹ kin wehwehki ahn aramas emen mour. Elaisa kapakapohng Siohwa: “Komw ketin kapwuredohng mouren [lokaiahn Ipru neʹphesh] pwutaket.” (1 Nanmwarki 17:21) Pil medewehla duwen mahsen en Sises: “Ngehi me Silepen sihpw mwahu. Silepen sihpw mwahu kin tounmeteikihla eh mour [lokaiahn Krihk psy·kheʹ] pwehki nah sihpw akan.” (Sohn 10:11) Nan iren Paipel pwukat, lepin lokaiahn Ipru neʹphesh oh lokaiahn Krihk psy·kheʹ kin wehwehki mour en aramas.

Ni omw pahn pousehla onop Mahsen en Koht, ke pahn diarada me sohte wasakis nan Paipel me lepin lokaiahn Ipru neʹphesh de lokaiahn Krihk psy·kheʹ kin pid mehkot me pahn pedoisang nan paliwar mwurin mehla.

Lepin lokaiahn Ipru ruʹach oh lokaiahn Krihk pneuʹma kin kalapw kawehwehdi ong “ngehn” nan Paipel en mahsen en Pohnpei. Dahme Paipel mahsanihki duwen ia wehwehn lepin lokaiahn Ipru oh Krihk pwukat? Sohp 34:14, 15 mahsanih: “Ma Koht pahn pwurehng ketikihsang engin mour [ruʹach], eri, me mour koaros pahn mehla oh pwurehng wiepwella.” Seims 2:26 (NW) kasalehda me “paliwar ehu me sohte engin mour [pneuʹma] eh uhdahn mehla.” Nan iretikitik pwukat, ruʹach de pneuʹma kin wehwehki mehkot me kin kihong mour nan paliwar ehu. Ma sohte kehl wet, paliwar pahn mehla. Kahrehda nan Paipel, lepin lokaia ruʹach de pneuʹma pil kak kawehwehdi ong kehl de kehl en mour. Karasepe, me pid duwen Nohlik Lapalapo ni mwehin Noha, Koht ketin mahsanih: “I pahn kadaridiong sampah nohlik ehu pwe en kamwomwala mehkoaros me momour [ruʹach] nin sampah.” (Senesis 6:17) Ruʹach nan wasaht kin koasoakoasoia duwen kehl en mour me soh sansal nan mour koaros pohn sampah.

Paliwar kin anahne kehl en mour duwehte redio ehu kin anahne lioal pwe en kak doadoahk. Ma ke pahn kihong padiri loale oh kamourada, lioal nan padirio kin kahrehiong redio en momour. Ma sohte padirio, eri redio pahn mehla. Met pil duwehte redio me kin usuhs sang ni lioal. Ni ahlohte, ruʹach de pneuʹma iei kehl me kin kahrehiong paliwar en kin wie momour. Pil duwehte lioal, kehl en mour sohte eh pepehm, oh sohte kak madamadau. Ma sohte kehl-en-mour wet, paliwaratail akan pahn “mehla oh pwurehng wiepwella” nin duwen me pwuhken Sohp mahsanih.

 Me pid duwen mehlahn aramas, Eklesiasdes 12:7 mahsanih: “Paliwaratail kan pahn pwurehng wiepwella, oh engin atail esingek [ruʹach] pahn pwuralahng rehn Koht me ketikihong kitail.” Ni ahnsou me kehl en mour pedoisang nan paliwar, paliwar kin mehla oh pwuralahng wasa me e kohsang ie, iei nan pwehl. Ni ahlohte, kehl en mour kin pwuralahng wasa e kohdohsang ie, iei rehn Koht. (Sohp 34:14, 15; Melkahka 36:9) Met sohte wehwehki me kehl en mour uhdahn kin seiseiloak kohwei oh leldawohng nanleng. Ahpw, e kin wehwehki me aramas mehla men, eh koapworopwor en pwurehng ale mour mihier nin limen Siohwa Koht ni lokaiahn karasaras. Koht kelehpw me sapwellimanki manaman en kapwurehiong ih kehl en mour pwe aramaso en kak pwurehng mourda sapahl.

Ia uwen kansenamwahu en ese me iei met me Koht pahn ketin wiahiong aramas melahr akan koaros me e kin ketin tamataman! (Sohn 5:28, 29) Ni ahnsoun kaiasada, Siohwa pahn ketin kapikada ehu paliwar kapw ong aramas emen me melahr oh pahn pwurehng kasapahldohng eh mour ni eh pahn ketikihong kehl en mour nan paliwaro. Ia uwen rahno eh pahn kaperen!

Ma ke men kalaudehla omw sukuhlki me pid duwen ma mie mehkot loalatail me kin wie momour mwurin paliwar eh mehla, ke pahn diarada ire kesempwal kan nan kisin pwuhk Ngenen me Melahr akan​—Irail Kak Seweseiuk de Kauweiukala? Irail Uhdahn Mie? me Sounkadehdehn Siohwa kan wiahda.