ANA papikene liloŵe lyakuti “msimu” akusaganisyaga kuti cili cici? Ŵandu ŵajinji akusakulupilila kuti cili cindu cangawoneka, soni cangawa cacikusasimanikwa m’cilu mwetu. Akusakulupilila kuti mundu pawile, cindu celeci cikusatyoka m’cilu ni kuja kutama ni umi kwine kwakwe. Ligongo lyakuti cikulupi celeci cili cakuwanda, ŵandu ŵajinji akusasimonga palijigenye kuti Baibulo jangajiganya yeleyi. Sano mwakamulana ni maloŵe ga Mlungu, ana “msimu” uli cici?

Ŵakulemba Baibulo ŵakamulicisyaga masengo liloŵe lya Cihebeli lyakuti ru′ach kapena liloŵe lya Cigiliki lyakuti pneu′ma pakusala ya “msimu.” Malemba gakusalosya kugopolela kwa maloŵe gelega. Mwambone, lilemba lya Salimo 104:29 likusati: “Patyosisye [Yehofa] msimu [ru′ach] wakwe yikusawaga, ni kuwujila kuluwundu.” Soni lilemba lya Yakobo 2:26 likusati: “Cilu . . . cangali msimu [pneu′ma] cili cewe.” Malemba gelega gakulosya kuti Msimu uli cindu cacikusatendekasya kuti cilu cikole umi. Naga pangali msimu cilu cikusaŵa cewe. M’yoyo, m’Baibulo  liloŵe lyakuti ru′ach lyangagopolelape kuti “msimu,” nambo likusagopolelasoni kuti “macili” kapena kuti macili ga umi. Mwambone, pakwamba ya cikumba ca m’moŵa ga Nowa, Mlungu ŵatite: “Tindumisye ula ja cikumba pacilambo capasi kuti njonanje ya umi yosope. Yaumi (“yayikwete macili [ru′ach] ga umi,” NW) yosope ya pacilambo tiyiciwa.” (Genesis 6:17; 7:15, 22) Pelepa “Msimu” ukwimila macili gangawoneka gagakusatendekasya kuti cindu ciŵe cijumi.

Cilu cikusasosekwa msimu kuti ciŵe ni umi mpela mwayikusaŵela kuti wailesi jikusasosekwa magesi kuti jikamuleje masengo. Kuti tupikanicisye yeleyi kwende tuwanicisye ni wailesi jakamulicisya masengo mabatile. Naga aŵisile mabatile mu wailesi ni kujipamba, jikusatanda kulila. Macili ga mabatile gakusatendesya wailesijo kuŵa ja umi. Naga pali pangali mabatile wailesijo jikusaŵa jewe. Yeleyi yikusatendekwasoni ni wailesi jakamulicisya masengo magesi. Naga ajityosisye kumagesi jikusaleka kulila, kapena kuti jikusaŵa jewe. Mwakulandana ni yeleyi, msimu uli macili gagakusatendekasya kuti cilu cetu ciŵe ca umi. Mpela magesi, msimu nombe nawo pajika wangapikana cilicose, atamose kuganisya. Gali macili basi. Nambo pali pangali msimu, kapena kuti macili ga umi, yilu yetu “yikusawaga, ni kuwujila kuluwundu,” mpela mujwaŵecetele jwamalumbo.

Pakusala ya ciwa ca mundu, lilemba lya Mlaliki 12:7 likusati: “Luwundu [kwambaga cilu cakwe] likusawujila ku litaka kulyatyocele, soni msimu ukusawujila kwa Mlungu jwakuwona juŵawupelece.” Naga msimu kapena kuti macili ga umi gatyosile m’cilu, ciluco cikusawa ni kuwujila kucatyocele kwakuli kwitaka. Mwakulandana ni yeleyi, macili ga umi gakusawujila kwa Mlungu juŵagapelece. (Yobu 34:14, 15; Salimo 36:9) Yeleyi ngayikugopolela kuti macili ga umiga gakusajenda ulendo kwawulaga kwinani. Nambo, yikugopolela kuti, mundujo kuti cakolesoni umi  yikwegamila kwa Yehofa Mlungu, kapena kuti umi wakwe uli m’miyala mwa Mlungu. Mlungu kupitila m’macili gakwe mpaka awucisyesoni msimu, kapena kuti macili ga umi kwa mundu juŵawilejo.

Yili Yakutondoya mnope kumanyilila kuti Mlungu cacatendela yeleyi ŵandu wosope ŵali “m’malembe [gacikumbucilo, NW].” (Yohane 5:28, 29) Pandaŵi jacacijimusyaga ŵandu, Yehofa cacajimusya ŵandu ni cilu casambano mwakwapasoni msimu kapena kuti macili ga umi. Ndaŵi jeleji jiciŵa jakusangalasya kwabasi!

Naga akusaka kumanyilila yejinji yajikusajiganya Baibulo pakwamba ya “msimu,” aŵalanje kabuku kakuti, Litala lya ku Umi Wangamala Ana Mlipatile? pa mapeji 12 mpaka 14, ni buku ja Ciceŵa jakuti Kukambitsirana za m’Malemba pa mapeji 319 mpaka 323, yakuwandisya ŵa Mboni sya Yehofa.