LIDAN iñeñei le idanbei tabürüdǘwa Bíbülia furumiñe, yusuwati dimurei ebüréu scheʼóhl luma güriegu háides, lóugiñe 70 wéiyaasu, biángubei dimurei le yarafaguati luma óunweni. Sügügüda tumuti Bíbülia garifuna Sandu Bürütu libe-agei dan kei “umúahaü” ani anihein dan yusu tumuti dimurei “habara hilaaña” luma “máfiougati”. Gama lumoun, libe-agei iñeñei, úati dimurei hama le afuranguagüdüti le mini lubéi dimurei burí le lidan ebüréu luma güriegu. Ligía tayusurunbalin Traducción del Nuevo Mundo dimurei “Seol” luma “Hades” lidan burí abürüdǘni le tídanbei. Ka mini lubéi dimurei burí le? Ariha waméi ida liña lan layusurún lidan fiú bérusu

Afuranguagüdati Apurichihati 9:10: “Lidan umúahaü [Seol], le lunbei ñéinhinba lan badagara, madügǘnti ni kata ñein maritawagún ni kata, úati subudi ni lichú aau ñein”. Mini lan san le kada lan aban huyu le ñein lubéi wábunaña waduheñu Seolbei? Uá. Dan le tadimurehan Bíbülia luagu lumúaha kada gürigia, mayusu tumuti dimurei burí scheʼóhl ni háides, amu burí dimurei lídangiñe ebüréu luma güriegu tayusurubei (Agumesehani 23:7-9; Matéu 28:1). Mayusurunwati giñe “Seol” lun ladimurehóun luagu aban huyu le ñein lubéi habunúa bandi gürigia lidan aban, kei burí aban gabusándu hani familia (Agumesehani 49: 30, 31).

Ligíati dan le tadimurehan Lererun Bungiu luagu “Seol” o “Hades”, ka tabusenrubei tariñagun? Tadimurehaña luagu aban fulasu wéiritimati luéi aban óunwenbu huyu ñein lubéi habunúa saragu gürigia. Kéiburi lidan Isaíasi 5:14, ariñagatu wagagua lan umúahaü o Seol “lun láhuluchuniña lílana fulasu”. Gayaraati wariñagun huluhali lan Seol saragu hilaaña darí lun siñá lan habahüdǘn ani busenmémegili hanwoun (Ariñawagúni 30:15, 16). Chülüti oura lun mabara hamá hilaaña gabusándu, ánheinti “umúahaü magufurumadaditi” (Ariñawagúni 27:20). Le linarün katei, mabuinchaditi Seol o Hades ani mébehati. Ladimurehaña dimurei burí le luagu aban fulasu sínboliku le ñein lubéi habunúa sun hilaaña o fulasu le ñein habéi hibe-agei gürigia arumuga lidan óunweni.

Dan le wafurendeiruni le tarufudahabei Bíbülia luagu águyuguni, gunfuranda tima wamuti katei lan Seol luma Hades. Adimurehatu Lererun Bungiu luagu fulasu le, dan le tadimurehan luagu  óunweni le ñéingiñe lubéi gayara lan háguyugun hilaaña (Hobu 14:13; Adügaü 2:31; Arufudúni 20:13). * Arufudati giñe ñeinñanu lan dandu ha eseriwidubaña lun Heowá kei ha meseriwidunbaña lun (Sálumu 55:15). Ligía tachoururubalin lásaaragüdübaña lan hilaaña, dandu ha buídubaña [richaguabaña] kei ha wuribabaña [maricharaguntiña]” (Adügaü 24:15).