EWE Paipelin Chuuk a afféúni ewe fósun Ipru sheʼohlʹ me ewe fósun Krik haiʹdes ngeni ‘leenien sotup.’ Ekkeei ruu kapas ra mak lap seni fán 70 lón ekkewe popun fós. Iir me ruu ekkeei kapas ra riri ngeni máló. Lón ekkóch fósun fénúfan, ekkóch Paipel ra afféúni ekkena kapas ngeni “peias,” “hell,” are “pwang.” Iwe nge, lón lape ngeni fósun fénúfan, ese wor kapas mi weneiti wesewesen weween ekkena kapasen Ipru me Krik. Ina minne, met wesewesen weween “ewe lenien sotup”? Sipwe ppii ifa usun ekkóch wokisin lón Paipel ra néúnéú ei itiitin kapas “ewe lenien sotup.”

Iei alon Än Salomon Afalafal 9:10: “Esap wor och angang, ekiek, silelap ika tipachem lon lenien sotup [Sheol] ewe ia kopwe feila ie.” A itá wewe ngeni pwe ewe leenien sotup wesewesen eú peias sia ireeló emén attongeach lón? Aapw. Lupwen Paipel a kapas usun wesewesen eú peias, a néúnéú pwal ekkóch kapasen Ipru me Krik nge esap sheʼohlʹ me haiʹdes. (Keneses 23:7-9; Mateus 28:1) Ewe Paipel ese pwal néúnéú “lenien sotup” ren eú leenien peias ekkóch aramas ra ireir ie, áwewe chék, ikewe eú famili a áeá le peiaseni aramaser  kewe ie are eú peias chómmóng aramas ra ireir lón.​—Keneses 49:30, 31.

Nge “ewe lenien sotup” a wewe ngeni met sókkun leeni? Án Kot Kapas a affata pwe “ewe lenien sotup” a pwal wor watteen weween me lúkún ewe peias. Áwewe chék, a mak lón Aisea 5:14 pwe “ewe lenien sotup a fokun sukula pwe epwe oromala meinisin.” Lón kapas áwewe, inaamwo ika “ewe lenien sotup” a fen oromaaló chómmóng aramas mi máló nge a chék mochen oromaaló pwal ekkóch. (Än Salomon Fos 30:15, 16) A sókko seni wesewesen leenien peias mi kaúk úkúkún fitemén repwe tongeni ireir lón, pún ‘ewe lenien sotup . . . esap fokun menemenöch.’ (Än Salomon Fos 27:20) Weween, “ewe lenien sotup” ese tongeni ur. Ese kaúk. Iwe, inaamwo ika esap wesewesen eú leeni, nge atun ewe Paipel a apasa pwe emén a feiló lón Seol are Eitis are leenien sotup a chék wewe ngeni pwe a annut lón máló.

Áitien Paipel usun manawsefál a álisikich le alapaaló ach weweiti weween “ewe lenien sotup.” Lón ewe Kapasen Kot, ewe leenien sotup a riri ngeni ewe sókkun máló epwe wor manawsefál. * (Hiop 14:13; Föför 2:31, TF; Pwärätä 20:13) Paipel a pwal affata pwe chókkewe mi fen angang ngeni Jiowa me pwal chómmóng rese angang ngeni i ra nónnóm lón ewe leenien sotup. (Keneses 37:35; Kölfel 55:15) Ina minne, ewe Paipel a áiti ngenikich pwe epwe wor “manausefal ren ekkewe mi pung pwal ekkewe rese pung.”—Föför 24:15, TF.