BIBULU kɔnna ka sɛbɛ heburukan ni gɛrɛkikan na. Sheol ye heburukan kumaden ye. A bɔɲɔgɔnko ye Hadɛsi ye gɛrɛkikan na. O kumaden fila be sɔrɔ siɲɛ 70 ni kɔ Bibulu kɔnɔ. U ɲɛsinna saya koo ma. Bibulu dɔw kɔnɔ o kumadenw bayɛlɛma ko “lahara,” “sudonyɔrɔ” wala “kaburu.” An ka Bibulu yɔrɔ dɔw lajɛ k’a filɛ kɔrɔ min be di u ma.

Waajulikɛla 9:10 b’a fɔ ko: “Lahara [Sheol ] min ye i taayɔrɔ ye, baarako, ni jatiminɛ, ni lɔnniya, ani hakilitigiya te o yɔrɔ la.” Yala o kɔrɔ ko Sheol ye kaburu tigitigi dɔ ye min kɔnɔ an ye an diyanye mɔgɔ dɔ suu don wa? Ayi. Yɔrɔ minw na Bibulu be kuma kaburu tigitigi dɔ koo la, heburukan ni gɛrɛkikan kumaden wɛrɛw lo be sɔrɔ yen minw tɛ Sheol ni Hadɛsi ye (Zɛnɛzi 23:7-9; Matiyo 28:1). Bibulu fana t’a fɔ Sheol, n’a be kumana denbaya kelen ka kaburu koo la wala kaburu min kɔnɔ mɔgɔ caaman suu donna.—Zɛnɛzi 49:30, 31.

Sheol do ye yɔrɔ sifa juman ye sa? Ala ka Kuma b’a yira ko Sheol wala Hadɛsi ɲɛsinna fɛɛn wɛrɛ ma min ka bon ni kaburuba ye mɔgɔ caaman suu donna min kɔnɔ. Ɲɛyirali fɛ Ezayi 5:14 b’a fɔ ko: “Lahara [Sheol ] daa yɛlɛnin lo belebeleba! A kɔnɔ wagara!” Hali k’a sɔrɔ Sheol ye suu caaman-caaman kunu ka ban, a be komi a bele be dɔw fɛ hali bi (Talenw 30:15, 16). Kaburu yɛrɛyɛrɛ mana bonya cogo o cogo, suuw hakɛ tigitigi dɔ lo be se ka don a kɔnɔ. Nka, “Lahara [Sheol ] ye fabali ye.” (Talenw 27:20). O kɔrɔ ko Sheol tɛ fa ka ye. Daan tɛ a la. Sheol wala Hadɛsi tɛ yɔrɔ tigitigi yɛrɛyɛrɛ ye. Nka, tagamasiɲɛ yɔrɔ lo min kɔnɔ suuw bɛɛ be yen ani mɔgɔ salen caamanba be sinɔgɔra yen saya kɔnɔ.

Bibulu be min fɔ sukununi koo la, o b’an dɛmɛ ka  Sheol ni Hadɛsi kɔrɔ faamu ka ɲɛ. Ala ka Kuma b’a fɔ Sheol ni Hadɛsi ka ɲɛsin saya ma sukununi be min na. * (Zɔbu 14:13; Kɛwaliw 2:31; Yirali 20:13). Ala ka Kuma b’a yira fana ko mɔgɔ minw be Sheol ni Hadɛsi kɔnɔ, Jehova sagokɛlaw dɔrɔn tɛ, nka mɔgɔ caaman wɛrɛw be yen minw tun tɛ baara kɛ Jehova ye (Zɛnɛzi 37:35; Zaburuw 55:16). O kama, Bibulu b’a fɔ ko: “Mɔgɔw bɛɛ suw na kunun, mɔgɔ tilennenw ni mɔgɔ tilenbaliw bɛɛ.”—Kɛwaliw 24:15, ABM.