MOMARAKA gazo gokuhova, Bibeli kwa ruganesa yikando yokupitakana po 70 nkango zoRuhebeli seyoli ntani nezi zoRugereka za hetakana nazo hadesi. Nadinye da likwatakana nonomfa. Matoroko gamwe goBibeli kuditumbura asi “ntoko” ndi “heli” ndi “ekero.” Nampili ngoso, momaraka gomanzi kwato nonkango edi da horora ntanto zene-zene zononkango edi doRuhebeli noRugereka. Bibeli zoRukwangali kuruganesa nonkango edi asi “sirongo sovafe.” Yinke adi tanta nonkango edi sili? Tu zeni tu koneke omu va di ruganesa momatjangwa gokulisiga goBibeli.

Muudisi 9:10 kutanta asi: “Mosirongo sovafe omu ngo za, mutupu magazaro ndi unongo ndi ediwo.” Eyi ngesi kutanta asi sirongo sovafe kuna tamba sirongo sene-sene ndi? Hawe. Bibeli kulikida asi vafe kutengwira kevango oku va tunda. Muudisi 3:19, 20 kutanta asi vantu noyikorama “nayinye kuvyuka kevega limwe tupu—mbundu. Nayinye yimo ya tunda, nayinye yimo ngayi tengwira.” Bibeli kulikida nawa-nawa asi vafe kapi ava zi kosirongo simwe sokoure, nye awo kutengwira kombundu zevhu.—Genesis 3:19.

Kevango musinke sa tamba “sirongo sovafe”? Nonkango daKarunga kulikida asi “sirongo sovafe” aso sifanekeso. Pasihonena, Jesaya 5:14 kutanta asi sirongo sovafe ‘kuna fu nzara’ ntani ‘sina zahameke kana kaso.’ Apa ga kere mezimo lyemumfi Jona, ga tente asi kuna kara ‘mosirongo sovafe.’ (Jona 2:2) Jona kapi ga tembe asi age kwa zire kosirongo sapeke, nye ezimo lyemumfi yilyo ngano lya kere ntoko zendi. Yipo nye sirongo sovafe kapisi evango lyene-lyene. Nye aso nontoko dovantu navenye, sifanekeso sevango oko sinzi sovantu ava rara monomfa.

Erongo lyoBibeli lyevhumbuko kutuvatera tu gwana ediwo lyenzi lyontanto ‘zosirongo sovafe.’ Nonkango daKarunga kulikida asi owo ava zi “mosirongo sovafe” ngava ka va vhumbura. *  (Joba 14:13; Yirugana 2:31; Ehororo 20:13) Ado kulikida hena asi owo va kara “mosirongo sovafe” kapi va kwatera mo tupu ava va kererere Jehova, nye nava hena wovanzi va dilire kumukerera. (Episarome 55:15) Yipo nye, Bibeli kuronga asi “va kare vawa ndi vadona, ngava va pindura koufe.”—Yirugana 24:15.