HE TAU vagahau fakamua, ne fakaaoga he Tohi Tapu e kupu Heperu sheʼohlʹ mo e kupu tatai he vagahau Heleni haiʹdes ke molea e laga 70. Kua matutaki ua e tau kupu ia ke he mate. Ne fakaliliu he falu Tohi Tapu e tau kupu ia ko e “tukuaga,” po ke “luo.” Pete ia, ke he laulahi he tau vagahau kua nakai fai kupu ne fakamaama fakatonu e tau kupu Heperu mo e Heleni nei. Ati fakaaoga ai he New World Translation e tau kupu “Seoli” mo e “Hate” he tau matahui tala. Ko e heigoa e kakano mooli he tau kupu nei? Kia mailoga e tautolu e puhala ne fakaaoga ai e tau kupu ia he tau kupu Tohi Tapu kehekehe.

Ne talahau he Fakamatalaaga 9:10: “Ha kua nakai fai gahua, po ke manamanatu, po ke mena kua iloa, po ke iloilo ke he tukuaga [Seoli], kua fina atu ki ai a koe.” Kua pehē kia e mena nei kua hagaao a Seoli ke he tukuaga pauaki ne tanu ai e fakahele ha tautolu? Nakai. He hagaao e Tohi Tapu ke he tanuaga pauaki, po ke tukuaga, kua fakaaoga ai falu a kupu kehekehe he vagahau Heperu mo e Heleni, nakai ko e sheʼohlʹ mo e haiʹdes. (Kenese 23:7-9; Mataio 28:1) Mo e nakai fakaaoga foki he Tohi Tapu e kupu “Seoli” ma e tukuaga ne tanu auloa ai e tau tagata, tuga e tukuaga fakamagafaoa po ke tukuaga he tau tagata tokologa.—Kenese 49:30, 31.

Ko e heigoa mogoia e matakavi ne hagaao e “Seoli” ki ai? Ne fakakite he Kupu he Atua ko “Seoli,” po ko “Hate,” kua hagaao ke he taha mena ne mua atu ke he tukuaga he tau tagata tokologa. Ke tuga anei, ne talahau he Isaia 5:14 “kua fakalaulahi ai e [S]eoli a ia, kua fakamaga e ia hana gutu.” Pete kua fitā e folofua e Seoli e tau tagata tokologa, tuga kua manako lahi agaia. (Tau Fakatai 30:15, 16) Kua nakai tatai mo e tau tanuaga mooli, ne fakakaupā ni e numera he tau tagata ne tanu i ai, ‘ko Seoli kua nakai makona.’ (Tau Fakatai 27:20) Kua nakai fakaai a Seoli ke puke. Kua nakai fai kaupāaga. Ti ko Seoli, po ko Hate, kua nakai ko e matakavi pauaki mooli. Ka ko e tukuaga mahani mau he tau tagata mamate, ko e matakavi fakatai ne mamate ai e tau tagata tokologa.

Ko e fakaakoaga he Tohi Tapu ke he liu tu mai ka lagomatai  a tautolu ke iloa atu foki e kakano he “Seoli” mo e “Hate.” Ne fakahagaao he Kupu he Atua a Seoli mo Hate ke he mate ne fai liu tu mai. * (Iopu 14:13; Gahua 2:31; Fakakiteaga 20:13) Kua fakakite he Kupu he Atua ko lautolu i Seoli, po ko Hate, kua nakai putoia hokoia a lautolu ne fekafekau ki a Iehova ka e tokologa foki ne nakai fekafekau ki a ia. (Kenese 37:35; Salamo 55:15) Ko e mena ia, ne fakaako he Tohi Tapu to “tutu mai a lautolu kua mamate, ko lautolu ne tututonu katoa mo lautolu ne hepehepe.”—Gahua 24:15.