BIBLIAPIN qanchis chunka kutita rikhurin hebreopi sche’óhl simi, griegopitaq háides simi, chay simikunan wañuywan tupan. Wakin Bibliakunapitaq t’ikrakun, “wañuy-pacha”, “aya p’ampana” “sepultura”, “ukhu-pacha”, “wañuy”, “hallp’a sonqo”, nispa. Sheol, hades simikunaqa yaqa llapa rimaykunapi manan k’apak t’ikrayta atikunchu. Chhaynaqa, ¿ima ninanmi chay simikuna? Qhawarisun imata Biblia yachachin huk textokunapi chay simikunamanta.

Eclesiastés 9:10 texton nin: “Maymanchus rishanki chay Wañuy-pachapiqa [Sheol] manan ima llank’anapas yuyanapas reqsinapas yachanapas kanchu”, nispa. Chhaynaqa, ¿sapanka ayaq p’anpakusqan cheqastachu Sheol nispa nikun? Manan. Sapanka ayaq p’anpakunan cheqasmanta rimaspaqa manan scheʼóhl, háides nispachu Bibliapi qelqakun, aswanmi hebreopi, griegopi hukniray simikunawan (Génesis 23:7-9; Mateo 28:1). Manataqmi askha ayakuna p’anpana cheqastachu nitaq familiapaq aya p’anpana cheqastachu nikun “Sheol”, nispa (Génesis 49:30, 31).

Bibliapi, ¿ima ninantaq “Sheol”, “Hades” simikuna? Chayqa aya p’anpana cheqasmanta aswan hatunkaraymi. Isaías 5:14 textopin nin: Sheolqa “huk phiña animal hinan siminta kicharin mana hayk’aq saksaq hina”, nispa. Sheol nisqan mana yupay atina wañupuqkunata oqoykushan, chaywanpas astawanmi munashallan (Proverbios 30:15, 16). Cementeriopiqa hunt’anan kamalla wañuqkunata p’anpanku, ‘Wañuy-pachataq [Sheol] [...] mana hayk’aqpas saksanchu’ (Proverbios 27:20). Arí, Sheol otaq Hadesqa manan hayk’aqpas wañupuqkunawan hunt’akunmanchu. Sheol, Hades nisqaqa manan hanaq pachapichu, kay pachapichu nitaq ukhupachapipaschu kashan, nitaq huk cheqaschu. Aswanmi huk rikch’anachiy cheqaslla, chaymanmi wañupuqkuna rinku, chaypitaq yaqa llapanku wañuypi puñushanku.

Wañupuqkuna kawsarinanmanta Bibliaq yachachisqanwanmi astawan entiendenchis Sheol otaq Hades ima kasqanta. Bibliaq nisqan hina, Sheolpi otaq Hadespi kaqkunaqa kawsarimunqakun  (Job 14:13; Hechos 2:31; Apocalipsis 20:13). * Chayllapitaqmi tarikunku Jehová Diospa munayninta ruwaqkuna mana ruwaqkunapas (Génesis 37:35; Salmo 55:15). Chaymi Biblia nin, “chaninkunatapas mana chaninkunatapas wañusqankumanta Diospa kawsarichimpunanta”, nispa (Hechos 24:15).