¿TARIPÄW Uruxa jan ukax Juicio Urux kunjamaniw sasmasa? Millón millón almanakaw Diosan nayraqatapanxa sapa mayni taripatäpxani sasaw yaqhipanakax sapxi. Taripatäsinxa, mayninakaxa alaxpach qhapaq marka katuqapxani, ukat yaqhanakasti infiernon wiñay wiñay tʼaqhisiyatäpxaniw sapxarakiwa. Ukampisa, uka Taripañ Uruxa janiw ukhamäkanit siw Biblianxa, janiw khatatiñ urunakäkaniti jan ukasti kusisiñ urunakäniwa, taqi kunas machaqaptayatäniwa.

Apocalipsis 20:11, 12 jiskʼa tʼaqanakanwa uka Taripañ Urutxa apóstol Juanax akham sasa qhanañchi: “Ukatsti mä jachʼa janqʼu trono uñjarakta, ukhamarak ukan quntʼatäkäna uksa. Jupa nayraqatansti alaxpachas akapachas tukusxänwa, janirakiw kuna chiqas jupanakataki utjkxänti. Jiwatanakarusti jiskʼarus jachʼarus jupan nayraqatapan saytʼata uñjta. Libronakasti jistʼaratänwa, ukhamarak yaqha librosa. Uka librosti jakañ libro satawa. Jiwatanakasti luräwinakaparjam uñjatäpxänwa, kunjämtï uka libronakan qillqatäkänsa ukhamaru”. ¿Khitis uka trononkiri Taripirixa?

Jehová Diosaw jaqinakan jachʼa Taripiripaxa. Ukampis yaqhampiw taripayani siwa. Hechos 17:31 qillqatanxa Pablox siwa: “Diosasti mä uru wakichi, uküruw chiqa kankañampi akapacharux taripani kawkïr jaqtix jupax ajlliski uka tuqi”  sasa. Uka Taripirix jaktanit Jesusawa (Juan 5:22). Ukampisa, ¿kunapachas Taripäw Urux qalltani, qhawqha tiempünisa?

Satanasan ñanqhapachapar tukjir Armagedón sata chʼaxwäwi pasatatwa Taripañ Urux qalltani siw Apocalipsis libroxa (Apocalipsis 16:14, 16; 19:19–20:3). a Armagedón pasatatsti, Supayas saxranakapasa manqhapach chʼamakaru jan ukax mikʼayaru waranqa maranak jistʼantatäniwa. Ukañkamasti, 144.000 alaxpachar saririnakawa jaqinakaru taripapxani ukatsti “Cristompiw waranqa mara” apnaqapxani (Apocalipsis 14:1-3; 20:1-4; Romanos 8:17). Kunjamtï yatiqktanxa, Taripañ Uruxa janiw mä urukïkiti, jan ukasti waranqa maranakäniwa, janiw mä urunaki jankʼaki taripaskaniti.

Uka waranqa maranakanxa, Jesucristow ‘jiwatanakarusa jakirinakarusa taripani’ (2 Timoteo 4:1). ‘Jakirinaka’ siski uka arux Armagedón pasakipir “walja jaqinaka” sañ muni (Apocalipsis 7:9-17). Apóstol Juanax “jiwatanakarusti [...] jupan nayraqatapan saytʼata uñjta” sarakïnwa. Kunjamtï Jesusax siskänxa, jiwatanakax jaktayatäpxaniwa (Juan 5:28, 29; Hechos 24:15). ¿Kuna luratanakapxarus uka jaqinakax taripatäpxani?

Apóstol Juanan uñjäwipanxa “libronakasti jistʼaratänwa” ukat “jiwatanakasti luräwinakaparjam uñjatäpxänwa, kunjamti uka libronakan qillqatäkänsa ukhamaru”. ¿Uka libronakanxa jaqinakan nayra luräwinakapati qillqatäpacha? Janiwa. Janiw nayra juchanakaparjama, mä arunxa, jan jiwkasin juchanakarjam taripatäpkaniti. ¿Kunats ukhamaniw sistanxa? “Khititix jiwki ukax juchatxa jithiqtatäxiwa” siw Bibliaxa (Romanos 6:7). Jaktanirinakan juchanakapaxa chhaqtayatäxaniwa. Ukhamasti, uka libronakanxa Diosan machaq yatichäwinakapanïniwa. Wiñay jakañatakixa, jaktanirinakasa, Armagedón pasirinakasa Diosan uka kamachinakarjama sarnaqapxañapawa. Uka waranqa maranakanwa Jehová Diosax yaqha machaq kamachinakamp uñstayani. Ukhamatwa, sapa maynix uka Taripañ Urun sarnaqataparjam uñjatäni.

 Taripañ Urunxa, millón millón jaqinakawa ukhaki Diosan munañapatxa yatiqañ qalltasipkani, ukat ukhamarjamaw sarnaqapxarakini. Ukatakixa, waljaniruw taqi chiqan yatichasini. Ukhamasti, “jaqinakax yatiqapxaniwa kunatix chiqapäki ukxa” (Isaías 26:9). Ukampisa, janiw taqinixa Diosan munañapxa lurañ munapkaniti. Isaías 26:10 siwa: “Ñanqha jaqinakat khuyapayaskäta ukasa, jupanakax janipuniw chiqapäñxa yatiqapkaniti; aski jaqinakan uraqinakapansti sinti qhurunakarakiw tukupxi, janirakiw [Jehová] Tatitun jachʼa kankañapsa yäqapkiti” sasa. Uka ñanqha jaqinakaxa jan mayampitakiw tukjatäpxani uka Taripäw Urunxa (Isaías 65:20).

Kunapachatï Taripañ Urux tukusxani ukhaxa, jakaskir jaqinakax kunatix chiqa jakäwïki ukan jakasxapxani, jan juchan chiqa jaqinakjama. Ukhamasti, Taripañ Urunwa chiqap jaqinakäxañäni, kunjamäpkäntix Adanasa Evasa janir juchachasisax ukhama (1 Corintios 15:24-28). Ukatsti mä qhip qhipa yantʼaw utjani. Ukatakisti, Supayaw antutatäni jaqinakaru mä kutimpi yantʼañapataki (Apocalipsis 20:3, 7-10). Supayar jan istʼirinakaxa aka profecian suma phuqasïwipwa uñjapxani: “Aski jaqinakax uraq katuqapxani, wiñayatakiw ukan jakapxarakini” (Salmo 37:29). Jïsa, ¡Taripañ Uruxa chiqa chuyman jaqinakatakixa mä suma jachʼa bendicionapunïniwa!