¿IGI Bab dulemarga Igar Nabogoye be binsamoga? Abar dulemar binsadamalad millónba mergu dulemar Bab asabin buggudoye ega igar nabogega. Anba binsadamarbalid dulemar nuegandi nibneggi gudi gudoye geb isganagandi wileged negse naoye. Degi inigwale Bibliadi deyob sognasulid. Gwayed dummad naguoye sogsulid, bur sognaid we iba nagudele gannar dulemarga neg nugudoye.

Apocalipsis 20:11, 12 gine apóstol Juan soged, Bab dulemarga igar nabogoed iba wegi guoeye: “Geb degi, ologana sibbugwad dummad an daggalid. Dule a ologangi sii an dagsad. A asabin, nabnega, degine, nibnega, berguus naded. Aamar bar gwen daglessulid. Geb degi, dule[mar] dummagan burgwismalad, dule[mar] binsarmalad burgwismalad, ologana sibbugwad asabin gwissi an daggalid. Degine, gardamar argad an dagsabalid. Deginbali, garda baid argadbalid. We garda baiddi, dule dula gudimaloed e nug narmaggaled gardad. Dulemar burgwismaladga, gardamargi ibmar narmaggar naidba, na e ibmar imagsamaladba ega igar iddolesad”. ¿Be dagsa doa olo gangi dulemarga igar nabosii?

Jehová dulemarga Igar Nabogedid. Auggi, dule baidga sogsad bee be dulemarga igar nabogoedye. Gusmalad 17:31 gine  apóstol Pablo sogsad: “Ar Bab Dummad dule wargwenbali baddo iba nasigsad. Aa ibagi bela dulemarga nabbiragwadba igar iddogoed. We dule wargwen baddo idu na nug imagsad”. We duleye soglenaidi we Jesucristod (Juan 5:22). Auggi, ¿san we ibadega onodoe geb bule undar sugu nagubaloe?

Apocalipsisgi sognaid, Armagedóngi neg isgunaid obelolegoed sorbali, Bab dulemarga Igar Nabogoed Iba nagudoye (Apocalipsis 16:14, 16; 19:19–20:3). * Armagedón sorbali Nia e ángelmar isganamarbo barmeddeledoed yaa dummadse, aagi birga miligwen mellesii gumaloed. Aa ibagi 144.000 mergumaladi dulemarga igar nabomalaga “Cristoba birga miligwen neg dagmai gunonima[loed]” (Apocalipsis 14:1-3; 20:1-4; Romanos 8:17). Degsoggu Bab dulemarga Igar Nabogoed Iba, ibagwen dummad guosulid, birga miligwen we iba naguoed.

Jesucristo birga miligwengi “dule[mar] burgwismaladga, degi, dula gudidimaladga igar iddog[oed]” (2 Timoteo 4:1). “Dula gudidimalad[ye]” soglenaidi “dulemar buggidar” Armagedóngi dula obagmaloed obared (Apocalipsis 7:9-17). Apóstol Juan dagsabalid dulemar “burgwismalad, ologana sibbugwad asabin gwissi[mala]” ega igar nabolegega. Jesús sogsad, “dulemar neg uangi mamaidi, ebinsalemalagala e gaya burba iddomalo[ye] geb nodamalo[ye]” odurgulesmalar (Juan 5:28, 29, TNM; Gusmalad 24:15). Degidde, ¿ibugi daglegoe dule bendaglegodibe, bendaglegosurdibe?

Apóstol Juan dagsagua “gardamar argad” dagsad, geb “dulemar burgwismaladga, gardamargi ibmar narmaggar naidba, na e ibmar imagsamaladba ega igar iddolesad”. ¿We gardamargi narmaggar nanasunde igi ebbenne dulemar ibmar imagdii gusmala? Suli. Dulemar ebbenne burgwed idu ibmar imasadbali ega igar nabolegosulid. ¿Igi anmar wissunna deyob guosuli? Ar Bibliagi soglenaid, ‘dule burgwisar bar dule isganasurye’ (Romanos 6:7). Degsoggu dulemar gannar durgualir bar ebbenne e ibmar imasaddi ega ebinsalegosulid. We gardamar  daglesadi Jehová igar gwabbid mesoed obared. Dulemar gannar durgumaloedi geb Armagedóngi dula obagmaloedi, mer burgwemalaga Bab igarmarba gudi gumalar gebed. We birga miligwengi Jehová igarmar gwabbid onodabaloed. Birga miligwenadgi ibmar imaggoedbali dulemarga igar nabolegoed.

Birga miligwenadgi millónba mergu dulemar Bab igar durdagnonimaloed geb eba igar imadmarbaloed. Dulemar Bab igar durdaggega bela neg dirbimaggar bin odurdaglemar gweler gebed. Nabiri, “bela dule[mar] nabnegginmalad durdagdedama[loed] ibi igar inniggigwadi” (Isaías 26:9). Degi inigwale bela dulemar Bab sogedba igar imaggosurmarbalid. Isaías 26:10 (TNM) gine sognaid: “Anba dule isgana igar nuedgi odurdaglemogo inigwale, igar nued durdaggosur guoed. Neg nued naguoedgi edi ibmar isgana imadoed, Jehová e gangued daggosulid”. Bab Igar Nabogoed Ibagi, bela dulemar isganagan obelolemaloed, bar odulolegosurmalad (Isaías 65:20).

Bab Igar Nabogoed Iba bergusale soglegodo emidi dulemar nue gudimarye ar bonisuli geb isguedsuli gudi gudmaloed (Apocalipsis 20:5). Degsoggu Bab Igar Nabogoed Ibagi, gebbe Bab dulemar obinyisayobi gannar dulemar nueganbii gudi gudmaloed (1 Corintios 15:24-28). Geb aa sorba nabbi dulemar wilubdaglegoed. Aaga Nia gannar onolegoed nabbi dulemar yardaggega (Apocalipsis 20:3, 7-10). Degsoggu dulemar Niase yardaglessurmaladi dagdamaloed nabir Bibliagi soglesa: “Dule[mar] nuegan damaladdi, Bab Dummad ega yar uggoye sogsadgi degi sadegu mai gumaloed” (Salmo 37:29). Degsoggu Bab Igar Nabogoed Ibagi, dulemar nue Babba nanamaladga ibmar nuegan imaglegoed.