ЧА ТӦ дьшьрмиш дьби, чь йә Рʹожа Ахрәте? Гәләк дьшьрмиш дьбьн ԝәки ве рʹоже һәр нәфс, йәк-йәк бәр Хԝәде ԝе бьсәкьньн, сәва кӧ бенә диԝанкьрьне. Һьнәк бь кʹәрәма Хԝәде ԝе һәрʹьнә ль әʹзмана, йeд дьн жи бькʹәвьнә ль щәʹньме у һʹәта-һʹәтайе ԝе бьчәрчьрьн. Ле бь рʹастийе, дәрһәԛа Рʹожа Ахрәте, Кʹьтеба Пироз щурʹәки майин һин дькә. Дь Кʹьтеба Пирозда те шьровәкьрьне, ԝәки Рʹожа Ахрәте әв нә кӧ рʹожа чәрчьрандьне у тьрсе йә, ле әв рʹожа гӧмане у сахкьрьне йә.

Дәрһәԛа Рʹожа Ахрәте, Йуһʹәннайе шанди дь кʹьтеба Әʹйанти 20:11, 12-да ӧса ледькә: «Һьнге мьн тʹәхтәки мәзьни чили-ԛәрԛаш дит у Йәк ль сәр рʹуньштьбу. Әʹрд у әʹзман жь бәр ԝи бәтавәбун у дәԝса ԝан кʹьфш нәбу. Ԝе һьнге мьн мьрийeд бьчʹук у мәзьн дитьн кӧ ль бәр тʹәхт сәкьни бун. Кʹьтеб вәбун у кʹьтебәкә дьн жи вәбу, аԝа готи кʹьтеба жийине. Диԝана мьрийа анәгори ԝан кьред ԝанә кʹьтебада ньвисар һатә кьрьне». Ле гәло кʹи йә әв Һʹакьм, йе кӧ диԝана мәрийа ԝе бькә?

Рʹаст ә Йаһоԝа йә Һʹакьме Һьмзор, ле әԝи әв шьхӧл да дәсте кәсәки дьн. Ле әв кәс кʹи йә? Жь гьлийeд Паԝлосе шанди, йeд  кӧ дь Кʹарeд Шандийа 17:31-да ньвисар ә, әм педьһʹәсьн, ԝәки Хԝәде «рʹожәк кʹьфш кьрийә, кʹижанеда ԝе диԝана дьне рʹаст бь дәсте мәрьвәки бькә, йе кӧ әԝи кʹьфш кьрийә». Демәк әв кәс йе кӧ кʹьфш бу ча Һʹакьм, Иса Мәсиһ йә, кӧ һатә сахкьрьне (Йуһʹәнна 5:22). Ле Рʹожа Ахрәте ԝе кʹәнге дәстпебә у чьԛас ԝәʹдә ԝе бькʹьшинә?

Жь кʹьтеба Әʹйанти те кʹьфше, ԝәки Рʹожа Ахрәте ԝе паши шәрʹе Һармәгәдоне дәстпебә, чахе һʹӧкӧмәта Мире-щьна бе кʹӧтакьрьне * (Әʹйанти 16:14, 16; 19:19-20:3). Паши Һармәгәдоне, Мире-щьна у щьнед ԝи, ԝе бенә авитьне ль гәлийе бебьн, сәр һʹәзар сала. Ле 144 000 мәри йед кӧ тʹәви Иса ль әʹзмана бьн, ԝе «тʹәви Мәсиһ һʹәзар сали» пʹадшатийе бькьн (Әʹйанти 14:1-3; 20:1-4; Рʹомайи 8:17). Ча те кʹьфше гава әм дьбежьн Рʹожа Ахрәте, хәбәрдан начә дәрһәԛа рʹожәке, йа кӧ 24 сьһʹәт дькʹьшинә. Бь рʹастийе Рʹожа Ахрәте ԝе һʹәзар сал бькʹьшинә.

Нава ван һʹәзар сала, Иса Мәсиһ ԝе «диԝана мьри у зендийа бькә» (2 Тимотʹейо 4:1). «Мәрьвед зенди», әв һәйә «әʹлаләтәкә ӧса мәзьн», йед кӧ дь шәрʹе Һармәгәдонеда ԝе сах бьминьн у хьлаз бьн (Әʹйанти 7:9-17). Паԝлосе шанди ӧса жи дит кӧ мьри «ль бәр тʹәхте» һʹакьмтийе сәкьнинә. Ча жи Иса соз дабу, «һʹәмуйед тʹьрбада ԝе дәнге ԝи [Иса] бьбьһен» у «ԝе . . . рʹабьн», демәк бенә сахкьрьне (Йуһʹәнна 5:28, 29; Кʹаред Шандийа 24:15). Ле гәло әв мәри ԝе ль сәр чь һʹими бенә диԝанкьрьне?

Жь дитьнока Йуһʹәннайе шанди әм педьһʹәсьн, ԝәки «кʹьтеб вәбун» у «диԝана мьрийа анәгори ԝан кьред ԝанә кʹьтебада ньвисар һатә кьрьне» (Әʹйанти 20:12). Һьнәк дьбәк дьшьрмиш бьн, кӧ дь ван кʹьтебада дәрһәԛа шьхӧлeд мәрийа ньвисар ә, йeд кӧ ԝана пешда кьрийә. Ле бь рʹастийе, мәри ԝе нәйенә диԝанкьрьне жь бо кьрeд хԝә, йeд кӧ ԝана пешийа мьрьна хԝә кьрьбу. Ле әве йәке әм жь кʹӧ заньн? Кʹьтеба Пироз дьбежә: «Әԝе кӧ мьрийә, әԝ жь гӧнә азабуйи йә» (Рʹомайи 6:7). Демәк гава мьри ԝе бенә сакьрьне, әԝ ԝе тʹәмьз у бе гӧнә бьн, у ԝе дәстпекьн бь әʹмьрәки тʹәзә бьжин. Ле әв кʹьтеба дәрһәԛа кʹижани  әм пеһʹәсийан, әв фәрманeд Хԝәденә, йeд кӧ ль ахьрийе ԝе бенә дайине. Сәва кӧ әԝ мәрийeд кӧ бенә сахкьрьне бькарьбьн һʹәта-һʹәтайе бьжин, әԝана гәрәке пәй нет-фькьрeд Хԝәде һәрʹьн у ԝан фәрмана бьԛәдиньн, йeд кӧ Йаһоԝа нава һʹәзар сала ԝе бьдә. Демәк, мәри ԝе бенә диԝанкьрьне бь шьхӧлeд хԝә, йeд кӧ әԝана ԝе Рʹожа Ахрәте бькьн, демәк нава һʹәзар салида.

Ԝәʹде Рʹожа Ахрәте бь милйона мәрьв, тʹәзә ԝе дәстпекьн пебьһʹәсьн дәрһәԛа ԛьрара Хԝәде, ԝәки бь ԛьрара ԝи бьжин. Ләма жи шьхӧле һинкьрьне диса жи ԝе гәләк һәбә. Бәле, һʹәму мәрьвeд һәԛ, йeд кӧ ль дьне бьжин ԝе һини рʹастийе бьн (Ишайа 26:9). Ле жь ԝан мәрийа ԝе һәбьн йeд ӧса жи, йeд кӧ ԝе ԛайил нәбьн бь ԛьрара Хԝәде бьжин. Әв йәк рʹьнд те кʹьфше жь кʹьтеба Ишайа 26:10. Ләма жи, мәрьвeд ӧса ԝәʹде Рʹожа Ахрәте, кӧ һʹәзар сали дькʹьшинә, ԝе һʹәта-һʹәтайе бенә кʹӧтакьрьне (Ишайа 65:20).

Хьлазийа Рʹожа Ахрәте, әԝ мәрьв йeд кӧ сах бьминьн, ԝе ида бь тʹәмами «сах» бьн, демәк ԝе бьбьнә ԛәданди. Әԝана ԝе нава Рʹожа Ахрәте, бькарьбьн вәгәрʹиньн әԝ әʹмьре ԛәданди, кʹижан кӧ Адәм у Һеԝайе ӧнда кьрьн (1 Корьнтʹи 15:24-28). Паше әԝана щара пашьн ԝе бенә щерʹьбандьне. Мире-щьна ԝе жь кәле бе бәрʹдане у изьне бьстинә, ԝәки диса щарәке мәрийа бьдә шашкьрьне (Әʹйанти 20:3, 7-10). Әԝ мәрьв йeд кӧ бькарьбьн әве щерʹьбандьне тәйах кьн, пе чʹәʹве хԝә ԝе бьбиньн ԛәдандьна созе ӧса: «Әз жийина һʹәта-һʹәтайе дьдьмә ԝан у әԝ тʹӧ щар ӧнда набьн у тʹӧ кәсе ԝан жь дәсте мьн дәрнәхә» (Йуһʹәнна 10:28).