OITYI ove usoka konthele Yonthiki Yekoyeso? Ovanthu vamue vasoka okuti monthiki oyo, ovanthu aveho mavakakala momutete, avatualwa wike wike pu Huku. Iya kese munthu akoyeswa. Vamue mavakapewa ondyambi ongwa keulu. Ovakuavo mavakahitiswa motupia tuahapu. Mahi, etyi Ombimbiliya ilongesa konthele yonthiki oyo, tyelikalela. Ondaka ya Huku kaipopi okuti onthiki oyo, maikakala omuvo weetesa owoma. Anthi, maukakala omuvo wekevelelo nepiluluko.

Mu Revelação [Apocalipse] 20:11, 12, apostolu João wapopia konthele Yonthiki Yekoyeso okuti: ‘Namona otyipundi otyinene otyingonga, nomunthu wapumphamako. Eulu noohi viaya nkholo, ankho vitupu apa vikala. Andyimono vokuankhia, ovanene novatutu, vetai kolupala luotyipundi, iya akuikulwa omikanda. Tupu, akuikulwa, omukanda omukuawo womuenyo. Iya vokuankhia avakoyeswa mokonda yovipuka viahonekwa momikanda ovio, konthele yovilinga viavo.’ Olie Omukoyesi wapopiua motestu oyo?

Jeova Huku oe Omukoyesi Omunanene wovanthu aveho. Mahi, Huku waava ovilinga ovio komukoyesi umue aholovona. Mu Atos 17:31, apostolu Paulu wati, Huku ‘waholovona onthiki makoyesa ovanthu aveho nouviuki, menyina liomulume umue anaka opo evekoyese.’ Omukoyesi waholovonua na Huku o Jesus Kristu. (João 5:22) Mahi, onalupi Onthiki Yekoyeso maihimbika? Maikakala ononthiki onoñgapi?

Omukanda wa Revelação, ulekesa okuti Onthiki Yekoyeso maihimbika konyima yovita vio Armagedon. Putyina ouye  auho wovivi wa Satanasi, wamanyimuako kombanda yo ohi. a (Revelação [Apocalipse] 16:14, 16; 19:19–20:3) Konyima yo Armagedon, Satanasi novilulu viae ine ovindemoniu, mavakapakwa mokaleya, avakakalamo ovityita ekwi viomanima. Mokueenda kuomanima atyo oo, o 144.000 mavakakala ovakoyesi, ‘avakatumina na Kristu keulu omanima ovityita ekwi.’ (Revelação [Apocalipse] 14:1-3; 20:1-4; Romanos 8:17) Onthiki Yekoyeso, hamuvo wo noola vala 24. Onthiki oyo maikakala omanima ovityita ekwi.

Mokueenda kuomanima ovityita ekwi, Jesus Kristu ‘makakoyesa ovanthu vokuna omuenyo no vokuankhia.’ (2 Timóteo 4:1) ‘Vokuna omuenyo’ ‘otyinyingi otyinene tyovanthu’ mavakahupa ko Armagedon. (Revelação [Apocalipse] 7:9-17) Tupu, apostolu João wamona ‘vokuankhia . . . vetai kolupala luotyipundi tyekoyeso. Jesus walaa okuti: ‘Aveho vekahi momalangalo vokuli mehinangelo lia Huku, mavekeiva ondaka yae avatundumo’, mavakatutila. (João 5:28, 29; Atos 24:15) Mahi, ovanthu ovo mavakakoyeswa mokonda yovilinga patyi?

Apostolu João wamona ‘omikanda viaikulwa’ iya ‘vokuankhia vakoyeswa mokonda yovipuka viahonekwa momikanda ovio, konthele yovilinga viavo.’ Okuti momikanda ovio muahonekwa ovilinga ovanthu valingile kohale? Au. Vokuankhia kamavakakoyeswa mokonda yovipuka valingaile puetyi nkhele vehenenkhie. Oñgeni otyo tuetyinoñgonoka? Ombimbiliya yati: ‘Una wankhia wayovoka mononkhali mbae.’ (Romanos 6:7) Ngotyo, vana vankhia tyina vatutiliswa, ononkhali mbavo kambuhinangelwa vali. Moluotyo, momikanda ovio, muna ovitumino ovikuavo Huku makaava. Vana mavakahupa ko Armagedon na vana mavakatutiliswa, vena yokutavela ovitumino via Jeova Huku opo vakapewe omuenyo wahapu. Movitumino ovio, muakutikinya ovitumino ovipe Jeova Huku makaava mokueenda kuomanima ovityita ekwi. Ngotyo, ovanthu mavakakoyeswa mokonda yovipuka mavakalinga mokueenda Kuonthiki Yekoyeso.

 Monthiki Yekoyeso ovanthu ovanyingi mavakakala nomuvo wokulilongesa ehando lia Huku nokulinga etyi Huku ahanda. Otyo, tyilekesa okuti makukakala ovilinga ovinene viokulongesa. Moluotyo, ‘ovanthu kombanda yoohi, mavekelilongesa ouviuki.’ (Isaías 26:9) Mahi, vamue kamaveketavela okulinga ehando lia Huku. Isaías 26:10 yati: ‘Ondingavivi namphila weilinga nawa, kamaililongesa okulinga ouviuki. Maikalinga ovivi alo umue mofika youviuki, kamaiimbuka ounene wa Jeova.’ Iya onondingavivi mbatyo ombo, mambukanyimuako apeho mokueenda Kuonthiki Yekoyeso.—Isaías 65:20.

Konthyulilo Yonthiki Yekoyeso, ovanthu aveho vahupapo mavakakala ‘nomuenyo’ wafuapo, ovanthu vokuhena onkhali. (Revelação [Apocalipse] 20:5) Ngotyo, mokueenda Kuonthiki Yekoyeso, ovanthu mavakakala ngetyi ankho Huku ahandele ponthyimbi. (1 Coríntios 15:24-28) Konyima, ovanthu mavakalolwa otyikando tyahulilila. Satanasi makaikulwa mokaleya, opo ayondye ovanthu otyikando tyahulililako. (Revelação [Apocalipse] 20:3, 7-10) Vana vehetavelele okuyondyua na Satanasi, mavakapewa etyi Ombimbiliya yalaa okuti: ‘Ovaviuki mavapiñgana o ohi, avakakalamo apeho.’ (Salmo 37:29) Enga, Onthiki Yekoyeso, maikakala onthiki yononkhano onongwa pala ovanthu aveho vokutavela!