Ekiro ky’Okucwa Orubanja—Nikyo Ki?

NOOTEEKATEEKA ki aha Kiro ky’okucwa Orubanja? Baingi nibateekateeka ngu omwe-omwe, obuhumbi n’obuhumbi bw’abantu baryareetwa omu maisho ga Ruhanga. Bari omu maisho ge, ngu buri omwe aryacwerwa orubanja rwe. Ngu abamwe baryaheebwa ekiconco ky’okushemererwa omu iguru, ngu kandi abandi baryacwerwa orw’okubonabonesibwa ebiro n’ebiro. Kwonka, Baibuli yo terikugira ngu obunaku obwo buryaba butyo. Ekigambo kya Ruhanga tikirikworeka ekiro ky’okucwa orubanja nk’obwire burikutiinisa, kureka nk’obwire bw’amatsiko n’okugarura busya.

Omu Okushuuruurwa 20:11, 12, nitushoma ebi entumwa Yohaana arikushoborora aha Kiro ky’Okucwa Orubanja: “Naareeba ekitebe ky’obukama kihango ekirikwera n’[o]gwo owaabaire akishutamiho; ensi n’eiguru byahunga nibiruga omu maisho ge; byabura obuhamizo. Naareeba abafu, abakuru n’abato, beemereire omu maisho g’ekitebe ky’obukama, ebitabo byashuuruurwa. N’ekitabo ekindi kyashuuruurwa, nikyo eky’amagara. Abafu bacwerwa emanja z’ebyahandikiirwe omu bitabo nk’ebi baakozire oku biri.” Omucwi w’Emanja orikushobororwaho aha n’oha?

Yehova Ruhanga niwe Mucwi w’Emanja z’abantu omukuru. Kwonka, omurimo gwenyine ogw’okucwa emanja naaguha abandi. Okurugiirira aha Ebyakozirwe 17:31, entumwa Paulo akagira ngu Ruhanga “akataho ekiro eki aricweraho emanja z’ensi yoona omu kuhikiirira, naazicwisa [o]muntu ou yaatooraine.” Omucwi  w’Emanja ogu otoorainwe ni Yesu Kristo owaazookire. (Yohaana 5:22) Kwonka shi, ni ryari obu Ekiro ky’Okucwa Orubanja kirikutandika? Kandi nikimara bwire ki?

Ekitabo kya Okushuuruurwa nikyoreka ngu Ekiro ky’Okucwa Orubanja nikitandika bwanyima y’orutaro rw’ahari Haramagedoni, obu obusingye bwa Sitaane obw’omu nsi buricwekyerezibwa. * (Okushuuruurwa 16:14, 16; 19:19–20:3) Bwanyima ya Haramagedoni, Sitaane na baadaimoni be nibaija kukomerwa omu kiina ekitaine bugarukiro okumara emyaka rukumi. Omu bwire obwo, abantu 144,000 abahunguzi nibaija kuba abaramuzi haza bategyeke hamwe na Kristo omu iguru ‘nk’abagabe okumara emyaka rukumi.’ (Okushuuruurwa 14:1-3; 20:1-4; Abarooma 8:17) N’ahabw’ekyo, Ekiro ky’Okucwa Orubanja ti kiro ky’eshaaha 24 ekirihwaho jubajuba. Ekiro ekyo nikimara emyaka rukumi.

Omu bwire bw’emyaka rukumi obwo, Yesu Kristo naija ‘kucwera abahuriire n’abafiire orubanja.’ (2 Timoseo 4:1) “Abahuriire” nibaija kuba “omutwe muhango gw’abantu” abarihonokaho ahari Haramagedoni. (Okushuuruurwa 7:9-17) Entumwa Yohaana kandi akareeba “abafu . . . beemereire omumaisho g’ekitebe” ky’orubanja. Nk’oku Yesu yaaraganiise, “abo boona abari omu bituuro abarikwijukwa baryahurira eiraka [rya Kristo] barugemu” kurabira omu kuzooka. (Yohaana 5:28, 29, NW; Ebyakozirwe 24:15) Kwonka shi okucwerwa orubanja kuryarugiirira ahari ki?

Okurugiirira aha kworekwa kw’entumwa Yohaana, ‘ebitabo bikashuuruurwa’ reero “abafu bacwerwa emanja z’ebyahandiikirwe omu bitabo nk’ebi baakozire oku biri.” Ebihandikirwe omu bitabo ebi shi n’ebikorwa ebi baakozire ira batakafiire? Ngaaha, okucwerwa orubanja okwo tikurikwija kurugiirira aha bi abantu baakozire batakafiire. Ekyo nitukimanya tuta? Baibuli neegira eti: “Ofiire aba atakitegyekwa kibi.” (Abarooma 6:7) N’ahabw’ekyo, abo abarizooka baryazooka batakiine bibi byabo. Ebitabo n’ahabw’ekyo biine kuba nibikiikirira ebindi ebi Ruhanga ariba naabenza. Okubaasa kugumaho ebiro byona, abarikira Haramagedoni hamwe n’abo abarizooka kiryabetengyesa okworobera ebiragiro bya Ruhanga otwariiremu n’ebindi ebisya ebi Yehova aribaasa kubashuuruurira  omu myaka rukumi. N’ahabw’ekyo, buri muntu aryacwerwa orubanja kurugiirira aha bi arikora omu Kiro ky’Okucwa Orubanja.

Ekiro ky’Okucwa Orubanja kiryaha obuhumbi n’obuhumbi bw’abantu omugisha gwabo gw’okubanza ogw’okwega ebi Ruhanga akunda n’okubyorobera. Eki nikimanyisa ngu haryabaho omurimo muhango ogw’okwegyesa. Buzima, ‘abarituura omu nsi egyo enungi baryayega eby’okuhikiirira.’ (Isaaya 26:9) Kwonka ti boona ngu baryaba nibenda kworobera ebi Ruhanga akunda. Isaaya 26:10 nirugira ruti: “Omubi n’obu akorerwa eby’embabazi tayega by’okuhikiirira; n’omu nsi y’okuhikiirira akoreramu kubi, kandi tareeba bukuru bwa MUKAMA.” Ababi aba nibaija kumarirwaho kimwe omu Kiro ky’Okucwa Orubanja.—Isaaya 65:20.

Aha muheru gw’Ekiro ky’Okucwa Orubanja, abantu abariba bariho ‘baryaba baatungire amagara marungi’ agahikiriire. (Okushuuruurwa 20:5) N’ahabw’ekyo omu Kiro ky’Okucwa Orubanja, abantu baryagarurwa omu mituurire ehikiriire ey’omukubanza. (1 Abakorinso 15:24-28) Bwanyima haryabaho okugyezibwa okw’aha muheru. Sitaane aryarekurwa kuruga omu kihome atyo aikirizibwe omurundi ogw’aha muheru okugobeza abantu. (Okushuuruurwa 20:3, 7-10) Abo abarimwangira baryashemerererwa okuhikiiririra kimwe kw’ekiraganiso kya Baibuli eki: “Abahikiriire baryahungura ensi, bagituuremu ebiro byona.” (Zaaburi 37:29) Buzima, Ekiro ky’Okucwa Orubanja kiryareetera abantu boona abeesigwa emigisha!

[Obugambo obw’Ahansi]