PA GEꞌI, ¿te gi kamfri ge ma dä thogi ha näꞌä rä Pa de gä Juisio? Ndunthi yä jäꞌi kamfri ge yä miyontho nuꞌu̱ yä alma ma dä mꞌai rꞌa mä nꞌa ha rä thandi Äjuä pa dä ungä ngue̱nda de yä tsꞌoki. ꞌNehe, huyämu̱i ge rꞌa de geꞌu̱, ma dä tꞌumbi nꞌa rä mꞌu̱i xa mähotho ha mähetsꞌi, ꞌne ge märꞌaa ma dä ꞌme̱hni ha rä nidu pa dä sufri pa nzäntho. Pe, ¿xa mäjuäni ge geꞌä udi rä Mäkä Tꞌofo? Hinä, rä Mäkä Tꞌofo udi ge näꞌä rä Pa de gä Juisio, näꞌä nꞌa rä pa de gä humu̱i habu̱ gatꞌho rä Xiꞌmhai ma dä mengi dä uädri, pa njabu̱ yä jäꞌi dä mꞌu̱i ja ngu mi ne Äjuä dende ri mu̱di.

Ha Apocalipsis (o Revelación) 20:11, 12, rä apostol Juan bi mää te ma dä thogi ha näꞌä Pa de gä Juisio nuꞌmu̱ bi ꞌñenä: «ꞌNepu̱ dä handä nꞌa mi hudi ha nꞌa rä dängä hudi xmä ntꞌaxi. ꞌNe ngu bi nhekiꞌä, ꞌmestho bi mꞌe̱tho mähetsꞌi ꞌne rä xiꞌmhai, ꞌne nixi bi fädi habu̱ bi ma. ꞌNehe dä handi nuꞌu̱ xki du, ge notsi ndängi mi ꞌmahni ha rä thandi Äjuä. ꞌNepu̱ bi soꞌtsä yä libro, ha ꞌnehe bi soꞌtsä nuꞌä rä libro habu̱ huxä yä thuhu nuꞌu̱ toꞌo ma dä nte pa nzäntho. ꞌNe nuꞌu̱ to xki du bi thämpä ngue̱nda de nu yä tꞌo̱tꞌe xki yꞌo̱tꞌä ha rä xiꞌmhai, ꞌne nu yä tꞌo̱tꞌeꞌu̱ xki tꞌofo ha nuꞌu̱ yä libroꞌu̱».

Rä Zi Dada Jeoba geꞌä rä Däta Nzaya de gatꞌho rä Xiꞌmhai. Pe xä hñutsꞌi mä nꞌa toꞌo dä yꞌapä ngue̱nda yä jäꞌi. Ha Hechos 17:31 rä apostol Pablo bi ꞌñenä: «Äjuä xä hñuxä nꞌa rä pa, ꞌne nuꞌä rä paꞌä ma dä hñämpä ngue̱nda gatꞌho yä jäꞌi de rä xiꞌmhai ko nꞌa rä hogä tsꞌu̱tꞌhui. ꞌNe nuꞌä toꞌo bi hñutsꞌi pa dä hñängä ngue̱nda go geꞌä [...] Ñhesukristo». Hää, ja ngu di handihu̱, Äjuä xä hñutsꞌi de gä Nzaya rä Hesu, ꞌne go geꞌä ma dä hñämpä ngue̱nda yä jäꞌi (Juan 5:22). Pe, ¿hämꞌu̱ ma dä mu̱di näꞌä rä Pa de gä Juisio ꞌne hängu ma dä dura?

 Rä mfistꞌofo Apocalipsis udi ge näꞌä rä Pa de gä Juisio, ma dä mu̱di nuꞌmu̱ xti uadi Armäjedon, näꞌä rä däta tuhni ma dä huati nuꞌu̱ yä tsꞌo tꞌo̱tꞌe rä Zithu ja ha rä Xiꞌmhai (Apocalipsis 16:14, 16; 19:19–20:3). * Mꞌe̱fa de rä tuhni Armäjedon, rä Zithu ꞌne yä u̱xjua ma dä njotꞌi po nꞌa mꞌo yä je̱ya. Durante näꞌä rä tiempoꞌä, nuꞌu̱ 144.000 ya dri ꞌmu̱ mähetsꞌi, ma dä hñämpä ngue̱nda yä jäꞌi ꞌne ma dä mända ko rä Hesu po «nꞌa mꞌo nje̱ya» (Apocalipsis 14:1-3; 20:1-4; Romanos 8:17). Ja ngu di hanthu̱, näꞌä rä Pa de gä Juisio hingä ma dä dura nꞌatho rä pa, ma dä dura nꞌa mꞌo yä je̱ya.

Durante nuꞌu̱ nꞌa mꞌo yä je̱ya, Ñhesukristo go geꞌä ma dä «hñämpä ngue̱nda gatꞌho yä jäꞌi, nuꞌu̱ di te ꞌne nuꞌu̱ ya hindi te» (2 Timoteo 4:1). ¿Toꞌo «nuꞌu̱ te»? Go geꞌu̱ nuꞌu̱ yä jäꞌi de näꞌä «rä dängä mhuntsꞌä jäꞌi» ma dä bongi de rä Armäjedon (Apocalipsis 7:9-17). Rä apostol Juan ꞌnehe bi hyandi «nuꞌu̱ xki du [...] mi ꞌmahni ha rä thandi Äjuä» pa dä ungä ngue̱nda. Ja ngu bi mää rä Hesu, «nuꞌu̱ toꞌo gatꞌho xä du ma dä yꞌo̱de» xti ñäꞌä ꞌne ma dä nangi de rä du (Juan 5:28, 29; Hechos 24:15). Pe, ¿de te mä tꞌo̱tꞌe ma dä tꞌapä ngue̱nda yä jäꞌi?

Rä apostol Juan bi hyandi ge «bi soꞌtsä yä libro» ꞌne gatꞌho nuꞌu̱ xki du, «bi thämpä ngue̱nda de nu yä tꞌo̱tꞌe [...] xki tꞌofo ha nuꞌu̱ yä libroꞌu̱» (Apocalipsis 20:12). ¿Di signifika ge ha nuya yä libro hutsꞌi gatꞌho näꞌä bi me̱fi nuꞌu̱ yä jäꞌi änte de xä du? Hinä, näꞌä rä Pa de gä Juisio, hingä pa dä thämpä ngue̱nda yä jäꞌi po näꞌä bi me̱fi änte de xä du. ¿Hanja di pädihu̱? Ngeꞌä rä Mäkä Tꞌofo enä ge nuꞌu̱ «ya xä du, ya hingi o ha rä yꞌe̱ rä tsꞌoki» (Romanos 6:7). Nuꞌu̱ yä jäꞌi dä nangi de rä du, ya hindä fembäbi nuꞌu̱ yä tsꞌoki bi yꞌo̱tꞌe. Hänge nuꞌmu̱ Apocalipsis enä ge «bi soꞌtsä yä libro», pe̱ꞌtsi te di signifika rꞌa yä rꞌayꞌo mhända ma dä uni Äjuä. Pa dä za dä mꞌu̱i pa nzäntho tanto nuꞌu̱ yä jäꞌi ma dä bongi de rä Armäjedon, ngu nuꞌu̱ ma dä nangi de rä du, pe̱ꞌtsi te dä yꞌo̱de gatꞌho nuꞌu̱ yä rꞌayꞌo mhända  ma dä uni Jeoba durante nuꞌu̱ nꞌa mꞌo yä je̱ya. Kada nꞌa rä jäꞌi, ma dä tꞌapäbi ngue̱nda de näꞌä ma dä me̱fi durante nuꞌu̱ nꞌa mꞌo yä je̱ya o Pa de gä Juisio.

Ha näꞌä rä Pa de gä Juisio, nuꞌu̱ yä miyontho yä jäꞌi bi du ꞌne nunka bi bädi de Jeoba, ma dä tꞌuti de geꞌä pa njabu̱ dä za dä me̱päbi rä bolunta. Hää, «yä jäꞌi de rä xiꞌmhai ma dä bädi dä yꞌo̱tꞌe rä justisia» (Isaías 26:9). Pe hingä gatꞌho yä jäꞌi ma dä ne dä me̱päbi rä bolunta Äjuä. Ha Isaías 26:10 enä: «Mäske dä tꞌumbä rä nhuekäte yä tsꞌomꞌu̱i jäꞌi, nuꞌu̱ hingä ma dä bädi dä yꞌo̱tꞌe rä justisia. Ha näꞌä hogä xiꞌmhai, nuꞌu̱ ma dä ntsꞌomꞌu̱i ꞌne nuꞌu̱ hingä ma dä hyandi näꞌä rä däta nsu pe̱ꞌtsi Jeoba». Nuꞌu̱ yä tsꞌomꞌu̱i jäꞌi hindä ne dä me̱päbi rä bolunta Äjuä durante näꞌä rä Pa de gä Juisio, ma dä du pa nzäntho (Isaías 65:20).

Nuꞌu̱ yä jäꞌi di tetho nuꞌmu̱ xti uadi näꞌä rä Pa de gä Juisio, nubye̱ hää ma dä za dä me̱ꞌtsi näꞌä xa mäjuäni rä te, ngeꞌä ya hingä ma dä me̱ꞌtsi rä tsꞌoki (Apocalipsis 20:5). Xti uadi näꞌä rä Pa de gä Juisio, gatꞌho yä jäꞌi ma dä mꞌu̱i nsinke rä tsꞌoki ja ngu mi ne Jeoba dende ri mu̱di (1 Corintios 15:24-28). Pa ri uadi, ma dä ꞌñepu̱ nꞌa rä gäxä prueba. Ma dä the̱gi dä bo̱ni rä Zithu pa dä trata dä hyatꞌi yä jäꞌi (Apocalipsis 20:3, 7-10). Nuꞌu̱ yä jäꞌi hindä de̱ni rä Zithu, ma dä hyandi hanja dä kumpli nunä promesa: «Nuꞌu̱ yä jäꞌi o̱tꞌe rä justisia ma dä mꞌu̱i ha rä xiꞌmhai, ꞌne ja ma dä mꞌu̱hni pa nzäntho» (Salmo 37:29). Ja ngu di handihu̱, näꞌä rä Pa de gä Juisio, nꞌa rä jäpi pa gatꞌho nuꞌu̱ yä jäꞌi dä yꞌo̱te Äjuä.