¿IMAYNATAQ Juicio Pʼunchay kananta niwaq? Achkha runas ninku: “Chay pʼunchaypi tukuy almas Diospa ñawpaqinpi sayanqanku Dios juzgananpaq”, nispa. Chantá wakinkunata janaqpachapi kʼacha kawsaywan Dios tʼinkananta, wakinkunatataq, wiñaypaq ñakʼarichinanta nillankutaq. Mana chaymanjinataq Bibliaqa, chay Pʼunchay mana manchachikunapaqchu kasqanta, manaqa kusiywan suyanapaq Pʼunchay, tukuy ima allinchakunanpaq Pʼunchay ima kasqanta niwanchik.

Apocalipsis 20:11, 12, pʼitipi Juan jinata Juicio Pʼunchay kananta nirqa: “Chay qhepata rikorqani uj jatun yuraj kamachina tiyanata, chaypi tiyasqa kashajtawan. Paypa ñawpaqenmantataj kay pacha, cielospis ayqerqanku, manañataj may lugarpis paykunapaj karqachu. Rikullarqanitaj wañusqasta juchʼuyta, jatunta Diospa ñawpaqempi sayashajta. Chantá libros kicharisqa karqanku, jinallataj waj libropis kicharikorqa. Chayqa kawsay libro karqa. Chay wañusqastaj juzgasqa karqanku, imamantachus librospi qhelqasqa kasqanmanta, ruwasqankuman jina”, nispa. ¿Pitaq chay kamachina tiyanapi tiyachkarqa?

Jehovaqa, tukuy runaspa Juezninku kaspapis, runasta juzgananpaq, wak runata akllarqa. Hechos 17:31, pʼitipi Pablo nirqa: “Diosqa uj pʼunchayta wakichinña, mayqempichus cheqa  kayninman jina tukuy kay pachapi runasta juzganqa chay kachamusqan runanejta”. Chay jueztaq; Jesús (Juan 5:22, 23). ¿Maykʼaqtaq Juicio Pʼunchay qallarinqa, maykʼaqtaq tukukunqa?

Apocalipsis libroqa, Juicio Pʼunchay Armagedón maqanakuy tukukusqantawan, qallarinanta nin (Apocalipsis 16:14, 16; 19:19–20:3). * Armagedón tukukusqantawan, Supay, supaykuna ima waranqa watasta wisqʼasqas kanqanku. Chantá 144.000 janaqpachapaq akllasqakunaqa, runasta juzganqanku, chantapis ‘Cristowan khuska waranqa watata kamachinqanku’ (Apocalipsis 14:1-3; 20:1-4; Romanos 8:17). Rikunchikjina Juicio Pʼunchaypi mana usqhayllatachu 24 horasllapichu runata juzgakunqa, manaqa, waranqa wataspi.

Chay tiempopiqa, Jesús “kawsajkunata, wañusqastapis” juzganqa (2 Timoteo 4:1). Kay ‘kawsaqkunaqa’ “may chhika runas[wan]” ninakun, paykunaqa Armagedón maqanakuymanta kawsachkaq lluqsinqanku (Apocalipsis 7:9-17). Chantá, apóstol Juan rikullarqataq “wañusqasta [...] Diospa ñawpaqempi” kachkaqta. Jesús nisqanmanjina chaykunaqa “Runaj Churimpa [Jesuspa] parlasqanta uyarenqanku [...] kawsarimponqanku[taq]” (Juan 5:28, 29; Hechos 24:15). ¿Imaynatá chay runasta chay Pʼunchaypi juzgakunqa?

Juanqa, musuq “libros[ta] kicharisqa[ta]” rikurqa, “wañusqastaj juzgasqa karqanku imamantachus librospi qellqasqa kasqanmanta, ruwasqankuman jina”. Chay “librospi”, ¿ñawpa ruwasqasninkumantachu qillqasqa kachkarqa? Mana. Chay runasta mana juzgakunqachu, manaraq wañuspa ruwasqasninkumanta. ¿Imaynatá chayta yachanchik? Biblia nin: “Pichus juchapaj wañojqa juchamanta kacharisqaña”, nispa (Romanos 6:7). Kawsarimuqkuna, mana juchayuq kawsarimunqanku. Chayrayku, chay musuq libros Diospa musuq kamachiykunasnin kasqanta nisunman. Arí, Armagedonpi mana wañuqkuna, chantá paraisopi kawsarimuqkuna, wiñaypaq  kawsanankupaq, chay waranqa watapi Diospa kamachiykunasninta kasukunanku tiyan. Sapa juk chay Juicio Pʼunchaypi ruwasqanmanta juzgasqas kanqanku.

Juicio Pʼunchaypi, may chhika runas Diospa munayninmanta yachakunqanku, chaymanjinataq kawsayta atinqanku. Chayta ruwanankupaq tukuyman yachachina kanqa. Arí, “kay pachapi kaj runas yachanqanku imachus cheqan kasqanta” (Isaías 26:9). Chaywanpis, mana tukuychu Diosninchikta kasukuyta munanqanku. Isaías 26:10 nin: “Sajra runasta khuyanki chaypis, paykunaqa mana yachaqakunkuchu imachus cheqan kajtaqa; allinta ruwaj runaspa jallpʼankupi kashaspapis, paykunaqa sajra imasllatapuni ruwanku”, nispa. Diosqa, kay saqra runasta, Juicio Pʼunchaypi, wiñaypaq chinkachinqa (Isaías 65:20).

Juicio Pʼunchaynin tukukuptin, runasqa mana juchayuq, juntʼa runas kanqanku, jinamanta tukuypis Dios munasqanmanjina kawsanqanku (Apocalipsis 20:5). Chay Juicio Pʼunchaypi tukuy runasqa, juntʼa runaman tukunqanku, qallariypi Dios munasqanmanjina (1 Corintios 15:24-28). Chaymanta Diosman chiqa sunqu kasqankutachus manachus rikuchinanku kanqa. Chaypaqtaq Supayta kacharikunqa, chay kutitawan runasta pantayman tanqananpaq (Apocalipsis 20:3, 7-10). Bibliaqa nin: “Cheqan runasqa kay pachata herenciankupaj japʼenqanku, chaypitaj wiñaypaj kawsanqanku”, nispa. Arí, Kuraq Supayman churanakuqkunaqa, chayta juntʼakuqta rikunqanku (Salmo 37:29). Chayrayku Juicio Pʼunchayqa, Diosman chiqa sunqu runaspaq juk bendición kasqanta nisunman.