TES ta ‘ou a‘häe se terȧn a‘lele? Famör ma‘oi a‘häe ne piliön his ‘e iris kạinag famori la fu ‘e le‘et ‘e muạ ne päeag faksạu ‘on ‘Ạitu. Te‘ ne iris ‘atakoa la a‘lel ‘e le‘et. Iris he his la la‘ se parataisi te hevạni, ma iris ‘e ‘on rerege la noh mamauạ se ao se ‘es a‘ofiga. Puk Ha‘a foram tēet ne kat tatạu ra ma ‘oris a‘häe, ‘e reko laloag ne av heta‘ag. Fäeag ‘on ‘Ạitu kel‘ȧk a‘taf pạu ne iạ ‘eake av ne noh fea, ka iạ av ne ‘ạiröt‘ạkiga ma mạuri.

‘E Kel‘ȧk Tē 20:11, 12, ‘is hat ‘e te ne ‘apostol ta Jone ‘ea ‘e reko Terȧn A‘lele: “Ma tä gou räea ta päeag faksau, päeag ti‘ut, ka fis, ma ia ne päepäe e; ma rȧn te‘ ma lạgi maoaria ‘e ‘on mua, ma kat räe ra ta ut la ‘on‘oria. Ma gou räe se iris ne atia, lelea‘ titi‘u ma lelea‘ riri‘i, fūfūeris ‘e muạ ne päeag faksau ta. Ma puk ‘ie säe se‘; ma ta puk hoi‘ȧk säe se‘, puk ne mȧür ta. Ma Gagaja puer a‘lelea iris ne atia ‘e tē tūtū ne fȧ‘ sio ‘e puku la ta‘ma se ‘oris gargarue.” Sei ta Gagaj Puer A‘lelet ne fäeag‘ȧk ‘e te‘?

Jihova ‘Ạitu, iạ ta Puer Purer se famori. Ka iạ ta na‘ia pure se garue a‘lel te te‘. Fakse te ne fȧ‘ ‘e Garue 17:31, ‘apostol ta Paula ‘ea ne ‘Ạitu “fại vạhia terạnit ne ia täla a‘lele e rȧn te‘ ‘e puer nonojo, ‘e Famorit ne ia väe vạhia.” Iạ ne hil vạhia la Gagaj Puer A‘lele ta Jisu Karisto ne al ma fu‘ȧk hoi‘ạki. (Jone 5:22) Terȧn A‘lele kamat ‘e av hes ta? Tapen ‘on roa?

Puk ne Kel‘ȧk Tē kel‘ạkim ne Terȧn A‘lele kamat ‘e vạhiạg ne pel ne Har Maketo ‘e av het ne Satan ta ma te ne mou se iạ la a‘öf pạu.* (Kel‘ȧk Tē 16:14, 16; 19:19-20:3) ‘E vạhiạg ne Har Maketo, Satan ta ma ‘on timonio la ‘o‘or ‘e telua se ‘es jio ta la hele‘ la fạu äfe. ‘E laloag ne av heta‘ag, iris 144,000 ne nini la gagaj puer, ma la puer faksau ‘e hevạni, ma “la sauag ‘esea ma Karisto ta la fau äfet.” (Kel‘ȧk Tē 14:1-3; 20:1-4; Roma 8:17) Terȧn A‘lele iạ ‘eake terạnit ne la re mij pạu, ‘e laloag ne aoa‘ 24. Iạ la fạu äfet ‘on roa.

‘E laloag ne fạu äf ta, Jisu Karisto täla “a‘lelea iris ne mạuri ma iris ne ala.” (2 Timoti 4:1) “Iris ne mạuri” ta “lelea‘ ma‘oi pau, ne tā kat pōra la hat,” ne sạim ‘e Har Maketo. (Kel‘ȧk Tē 7:9-17) ‘Apostol ta Jone räe tape‘ma “se iris ne atia…fūfūeris ‘e muạ ne päeag faksau” ne a‘lele. Jisu fäeag porȧk vạhia ne, “iris ‘atakoa ne täe ‘e fạmuạg ne a‘häe‘ạkiga täla a‘fạiarisa se ‘on lio; [Karisto ta] ma iris täla hotomea” ‘e fū hoi‘ạkiạg ta. (Jone 5:28, 29, NW; Garue 24:15) Hün teset ta iris la a‘lele e?

La fakse te ne ‘apostol ta Jone kele e, “puku säe se‘,” ma “iris ne atia a‘lelea ‘e tē tūtū ne fȧ sio ‘e puku la ta‘ma se ‘oris gargarue.” Tei ka puk ‘og ta fạ‘ia te ne iris a‘sok ‘e ‘on mumuạ? ‘Igke, a‘lele kat re ra se te ne famori rē, mumuạ la iris la al. Ka ‘is ‘inea tapen? Puk Ha‘a ‘ea: “Ne le‘et ne al vạhia, ia a‘nonoj‘ȧk se‘ea ‘e ag raksa‘a.” (Roma 6:7) Iris ne fu‘ȧk hoi‘ạki mȧür ka ‘oris ag raksa‘a fạu‘ȧk ma öf pạu. Puk ‘i ta kel‘ạkia te‘ ne te ne ‘Ạitu pa ‘ese. Mȧür se ‘es a‘ofiga se iris ne sại ‘e Har Maketo, ma iris ne fu‘ȧk hoi‘ạki, kop la noh a‘fại se fäeag fas‘ȧk ‘on ‘Ạitu, ma te‘ ne te ne ‘Ạitu ‘amnȧk sin ‘e laloag ne fạu äfe. Te‘ ne famör ‘atakoa la a‘lel se te ne iris re ‘e laloag ne ao ne Terȧn A‘lele.

Terȧn A‘lel ta iris famör piliön his la po a‘vaohian la rakoa ‘amnȧk ‘on ‘Ạitu ma für la tạupir sin. ‘On fuạga, garue rak‘ȧk tēet la re ofrạu. Te aire la fakma ne “kakại ne rȧn te‘ rakoa ag nonojo.” (Aisea 26:9) Ka ‘eake te‘ ne famör ‘atakoa la noh a‘fại se ‘amnȧk ‘on ‘Ạitu. Aisea 26:10 ‘eag: “Ag figalelei la rē se famör raksa‘a ma iạ kal rakoa ra ag nonojo. ‘E hanuet ne tē nonojo a‘mou rē e, ia la a‘mou rē ke tē nonojo, ma iạ kal kel ra se ag faksau ‘on Jihova.” Iris famör mam‘asa la a‘öf pạu ‘e av ne Terȧn A‘lele.—Aisea 65:20.

‘E vạhiag ne Terȧn A‘lele, iris ne sạim täla “mạurieris” la famör ‘atakoa. (Kel‘ȧk Tē 20:5) Ma ‘e av ne Terȧn A‘lele, mȧür ‘on famori la hö‘ la ‘atakoa pạu la fak se ‘on mumua. (1 Korinita 15:24-28) Ma kota ȧsȧs fakmür ta sok. Satan ta la sại‘ȧk ‘e ‘on noh ‘o‘oro ma la fue‘ la faksar fakmür pạu famori. (Kel‘ȧk Tē 20:3, 7-10) Te‘ ne iris ne kal a‘fại ra se ia, la po la ‘oaf‘oaf ‘e ‘oris poag ne ‘atakoa ne fäeag parofesại ne Puk Ha‘a; “Famör ag nonojo iris täla a‘moua hanue ta ma noho e se av se ‘es tohiget ne tore.” (Salamo 37:29) ‘I, ma Terȧn ne A‘lele la hele‘ la terȧn ne ạlạlum‘ạkiga se iris lelea‘ ne aire!

*  ‘E reko te ne mou se Har Maketo, figalelei ma ‘io se Insight on the Scriptures, Volume 1, rạupeap 594-5, 1037-8, ma väe 20 ne Titi‘ȧk se ‘Ạit Aier ‘Esea Ta, ne Jihova Uetnes ta fạ‘i.

← Kel se ‘on väe ta