EKIRO eky’okucweramu omusango okitekerezaho ota? Baingi batekereza ngu abantu omu n’omu nibaija kwemerezebwa omu maiso g’entebe y’Obukama eya Ruhanga. Obwo nu, Ruhanga acwere buli omu omusango. Abamu nibaija kuhebwa ekisembo ky’okugenda omuiguru kandi abandi nibaija kutwarwa omu kubonabonesebwa okw’ebiro n’ebiro. Kyonka yo Baibuli etuha kisisani kindi ha kiro kinu. Ekigambo kya Ruhanga kitusoborra ngu akasumi ako tikali k’okutiinisa, kyonka k’okunihira n’okufoora ebintu bihyaka.

Omu kitabu ky’Okusuku’rwa 20:11, 12, tusoma omukwenda Yohana nasoborra ekiro ky’okucweraho omusango: “Narora ekitebe ky’obukama ekikoto ekirukwera, nogu ayaikalireho ensi niguru byairuka amaisoge, kunu ekikaro kyabu kitazoke. Narora abafu, abakuru nabato bemerire omumaiso gekitebe ky’obukama, nebitabu byasukurwa. N’ekitabu ekindi kyasukurwa, nikyo ky’obwomezi. Abafu bacwerwa omusango obwebi ebyahandikirwe omubitabu nkengeso zabu okuzikaba ziri.” Noha Mucwi w’emisango arukubazibwaho hanu?

Yahwe Ruhanga nuwe Mucwi w’emisango arukuki’rayo kimu. Kyonka omulimo gw’okucwa emisango akaguha omuntu ondi. Okusigikira ha Engeso 17:31, omukwenda Paulo akagamba ngu Ruhanga “akataho ekiro ekyalicweramu omusango ogw’obulyo ogw’ensi zona, omu omuntu ou yakomeremu.” Omucwi w’emisango ay’akomerwe nuwe Yesu  Kristo ayahumbwirwe. (Yohana 5:22) Baitu ekiro ky’Okucweraho Omusango kiritandika ddi? Kandi kirimara kasumi ki?

Ekitabu ky’Okusuku’rwa kyoleka ngu Ekiro ky’okucweraho omusango kitandika hanyuma y’obulemu bwa Hara-magedoni, entekaniza ya Setani ha nsi emazire kuhwerekerezebwa. * (Okusuku’rwa 16:14, 16; 19:19–20:3) Hanyuma ya Hara-magedoni, Setani n’abadaimoni be baliboherwa omu kiina ekitaina ha kigarukira kumara emyaka rukumi. Omu kasumi ako, 144,000 abakugenda omuiguru baliba bacwi b’emisango kandi balirema “nkabakama hamu na Kristo kumara emyaka rukumi.” (Okusuku’rwa 14:1-3; 20:1-4; Abarumi 8:17) Ekiro ky’okucweraho omusango tikikwija kutwara akasumi k’esaha 24 zonka. Nikija kumara emyaka rukumi.

Omu kasumi k’emyaka egyo rukumi, Yesu Kristo “alicwera omusango abomezi nabafiire.” (2 Timoseo 4:1) “Abomezi” baliba “abekitebe kingi” abaliba barabire ha bulemu bwa Hara-magedoni. (Okusuku’rwa 7:9-17) Kandi omukwenda Yohana akarora “abafu . . . bemerire omu maiso g’ekitebe ky’obukama” ky’okucweraho emisango. Nk’oku Yesu yaraganize, “abo abali omu bituro balihuli’ra irakalye [lya Kristo] kandi balirugamu” kuraba omu kuhumbuka. (Yohana 5:28, 29; Engeso 24:15) Baitu balicwerwa omusango kusigiki’ra haki?

Okusigikira ha kwolekwa kw’omukwenda Yohana, “ebitabu bikasukurwa,” “nabafu bacwerwa omusango obwebi ebyahandikirwe omu bitabu nkengeso zabu okuzikaba ziri.” Ebitabu ebyo, nibyo bihandiiko by’ebintu abantu ebi baakozere enyuma? Nangwa, okucwa omusango tikwija kusigikira ha bikorwa abantu bakozere batakafiire. Ekyo nitukimanya tuta? Baibuli egamba: “Anyakufa buli aihirweho omusango gwekibi.” (Abarumi 6:7) Abantu abarahumburwa tibaija kujunwa ebibi ebi baakozere. Ebitabu ebirasuku’rwa nibitekwa kuba nibyeme’raho habw’ebintu ebindi, Ruhanga eby’alitwetagisa. Kusobora kwomera ebiro n’ebiro abo abararaba omu bulemu bwa Hara-magedoni naabo abarahumburwa nibatekwa kworobera  ebiragiro bya Ruhanga oteranizeho n’ebyo Yahwe eby’aliba natwetagisa omu kasumi k’emyaka orukumi. Nahabwekyo, abantu baija kucwerwa omusango kusigikira hali ebyo ebi barakora omu kasumi k’ekiro ky’okucweraho omusango.

Ekiro ky’okucweraho omusango nikija kuha abantu obukaikuru n’obukaikuru omugisa ogukubandinza kimu kwega ha Ruhanga eby’agonza n’okubiko’raho. Kinu nikimanyisa ngu nihaija kubaho omulimo mukoto ogw’okwegesa. Mananu, “ebyobulyo byawe obubiri omu nsi, abaikara hansi nibega okuhiki’ra.” (Isaya 26:9) Kyonka, tibali boona abaraikiriza kukora Ruhanga eby’agonza. Isaya 26:10 rugamba: “Embabazi n’obuziriko’rwa omubi, talyega eby’okuhiki’ra, nomu nsi eyokuhiki’ra naho alikora eby’okusisa, kunu talirora obukuru bwa Yahwe.” Ababi banu balihwerekerezebwa kimu omu kiro ky’okucweramu omusango.—Isaya 65:20.

Ekiro ky’okucweraho omusango hali kirihikira hampero yakyo, abantu ‘baliba bafookere bomezi’ nk’abantu abahikirire. (Okusuku’rwa 20:5) Ekiro ky’okucweramu omusango kirigarra abantu kuba abahikirire nkoku bakaba bali omu kubanza. (1 Abakolinso 15:24-28) Hanyuma halibaho okulengesebwa okurukusembayo. Setani alitaisurwa kuruga omu nkomo alengeho kulengesa abantu omurundi ogurukusembayo. (Okusuku’rwa 20:3, 7-10) Abantu abalyanga kumuhondera baliseme’rwa okunihiza kwa Baibuli okuhikirire: “Abahikirire baligwetwa ensi, kandi baragikaramuga ebiro n’ebiro.” (Zabuli 37:29) Ego, ekiro ky’okucweramu omusango kiriba ky’omugisa hali abantu boona abesigwa!