TSOBOL te machʼatik ya skuyik te bayalaj ta mil miyon ta tul ants winiketik ta jujuntul yalaj stejkʼan sbaik ta stojol te mukʼul juktajibal yuʼun te Dios swenta ya yichʼik ichʼel ta kʼop yuʼun. Ay yantik te ya skuyik te yalaj yichʼik kuxlejalil ta chʼulchan o yalaj staik woklajel ta kʼajkʼel ta sbajtʼel kʼinal. Yan stukel te Bibliae ma jichuk ya scholbey skʼoplal ta swenta te Skʼajkʼalel ichʼel ta kʼope, ma jaʼuk skʼajkʼalel xiwel, jaʼ skʼajkʼalel yuʼun te ay bin lek ya jmaliytik sok te ya xlekub spisil te bintik aye.

Ta Apocalipsis 20:11, 12, jich ya yalbey skʼoplal ta swenta te Skʼajkʼalel ichʼel ta kʼope: «La jquil mucʼul saquil huctajibal soc te machʼa hucul tey a; ahn bahel te chʼulchan soc bahlumilal ta stojol, ma ba weht banti ya xʼayinic. Soc la jquil te machʼatic chamenic, mucʼ biqʼuitetic, tecʼajtic ta stojol te mucʼul-huctajibal. La yichʼ jamel te librohetic, soc ay yan libro la yichʼ jamel, ha te libro scuenta cuxlejal. La yichʼic ichʼel  ta cʼop te machʼatic chamenic, ha chican te bintic tsʼihbalambil ta hunetic, ha chican bin la spasic». ¿Machʼa-a te Jchajpanwanej-abi?

Te Jehová jaʼ te Mukʼul Jchajpanwanej yuʼun te ants winiketike. Jaʼukmeto ay machʼa yan yakʼojbey ta skʼab te aʼtelil-abi. Jich bitʼil ya yal ta Hechos 17:31, te jpuk-kʼop Pablo jich la yal ta swenta te Dios te «schapoj jun cʼahcʼal te stojil ya yichʼ ta cʼop te bahlumilal ta scuenta te winic te tsahbil yuʼune». Te Jchajpanwanej-abi, jaʼ te Jesucristo te chaʼkuxajemixe (Juan 5:22). Jaʼukmeto, ¿bin-ora ya xjajch te Skʼajkʼalel ichʼel ta kʼope sok jayeb tiempo ya xjalaj?

Ta Apocalipsis ya yalbey skʼoplal te ya xjajch te Skʼajkʼalel ichʼel ta kʼop te kʼalal kʼaxemix-a te Armagedone, jaʼ te yorail ya yichʼ lajinbeyel skʼoplal te balumilal yuʼun te Satanase (Apocalipsis 16:14, 16; 19:19–20:3). * Te kʼalal kʼaxemix-a te Armagedone yame yichʼ makel ta xaab te Satanás sok te chopol espirituetik yuʼune, tey ya x-ayinik jmil jaʼbil-a. Te jayeb jaʼbil ya xkʼaxe, te 144,000 ta tule yame xmantalajik ta chʼulchan swenta ya yichʼik ta kʼop te ants winiketik sok yame «sjoquinic Cristo ta cuentahinwanej lajunwinic yoxbahcʼ (1,000) haʼbil» (Apocalipsis 14:1-3; 20:1-4; Romanos 8:17). Jich bitʼil te la kiltikixe, te aʼtelil ta swenta te Skʼajkʼalel ichʼel ta kʼope, mame junuknax kʼajkʼal ya xjalaj, melel yame xjalaj jmil jaʼbil.

Te Jesucristo «ya me yichʼ ta cʼop te machʼatic cuxajtic soc machʼatic chamenic» te kʼalal yak ta kʼaxel-a te jmil jaʼbile (2 Timoteo 4:1). Te kʼopil «te machʼatic cuxajtic» te xchie, jaʼ ya yalbey skʼoplal te ipal ants winiketik te kuxul ya xjilik te kʼalal kʼaxemix-a te guerra yuʼun Armagedón (Apocalipsis 7:9-17). Te jpuk-kʼop Juan jaʼnix jich la yil «te machʼatic chamenic, [...] tecʼajtic ta stojol te mucʼul-huctajibal» ta swenta ichʼel ta kʼop. Jich bitʼil jamal la yal te Jesuse, «spisil machʼatic ayic ta muquenal ya me yaʼiybeyic scʼop [te Cristo] soc ya me xloqʼuic  talel» te kʼalal ya yichʼik chaʼkuxajtesele (Juan 5:28, 29; Hechos 24:15). Jich yuʼun, ¿bin-a te ya yichʼ ichʼel ta wenta te kʼalal ya xjajch ta ichʼel ta kʼop ta spisil te ants winiketike?

Te jpuk-kʼop Juan jich akʼbot yil yuʼun te Diose «la yichʼ jamel te librohetic» sok «la yichʼic ichʼel ta cʼop te machʼatic chamenic, ha chican te bintic tsʼihbalambil ta hunetic, ha chican bin la spasic» (Apocalipsis 20:12). Te bintik yichʼoj tsʼibayel ta libro-abi, ¿teybal tsʼibaybil-a te bintik la spasik ta skuxlejalik te ants winiketik te kʼalal mato lajemukik-ae? Maʼuk. Te ichʼel ta kʼope maba jaʼ ya yichʼ ta wenta te bin la spas te ants winiketik te kʼalal mato lajemukik-ae. ¿Bin-utʼil ya jnaʼtik? Melel te Bibliae jich ya yal ta swenta «te machʼa chamene, colemix ta libre yuʼun te mulile» (Romanos 6:7). Ta swenta te machʼatik ya xchaʼkuxajik tale, tupʼbilme ya xkʼot te smulik te la spasik tal ta nailale. Jich yuʼun te libroetik-abi jaʼ ya yalbey skʼoplal yachʼil mantaliletik yuʼun te Diose. Swenta ya xkuxinik ta sbajtʼel kʼinal te ants winiketik te ya xchaʼkuxajike soknix te machʼatik kuxulik jilel te kʼalal kʼaxemix-a te Armagedone yame skʼan ya schʼuunik te mantaliletik yuʼun te Diose. Ta spisil ini teyme ochem-a te mantaliletik te ya xbajtʼ yichʼ akʼel te kʼalal yakix ta kʼaxel-a te jmil jaʼbile. Jich yuʼun, jaʼme ta swenta te kaʼteltik ta jujuntul te ya kichʼtik ichʼel ta kʼop te kʼalal yak ta kʼaxel-a te jmil jaʼbile.

Ta Skʼajkʼalel ichʼel ta kʼop, bayalme ta mil miyon ta tul ants winiketik te sbabialtonax buelta ya xbajtʼ snopik te skʼanojel yoʼtan te Diose soknix yame spas ta skuxlejalik. Jaʼ yuʼun yame yichʼ akʼel nojptesel ta swenta Dios ta swolol Balumilal. Jich yuʼun «te machʼatic nahinemic ta bahlumilal ya[me] snopic te bin stojil ta pasele» (Isaías 26:9). Jaʼnax yuʼun te mame spisiluk ya xbajtʼ spasbeyik skʼanojel yoʼtan te Diose. Ta Isaías 26:10 jich ya yal: «Aunque ya xnaʼbot yoʼbolil sba te machʼa chopol, ma ba ya snop te bin stojil ta pasele; ha ya spas te bin chopol ta banti toj bin ya yichʼ pasel, soc ma ba ya yil te smucʼul yutsilal te Jehová». Te machʼatik jich ya spas-abi yame yichʼik lajinel ta jkʼaxel ta Skʼajkʼalel ichʼel ta kʼop (Isaías 65:20).

 Te kʼalal nopol ya xlajix-a te Skʼajkʼalel ichʼel ta kʼope, ta spisilik kʼatpʼujemikixme ta tojil ants winiketik-a jich bitʼil ayin skuxlejalik ta sjajchibal te Adán sok te Evae (1 Corintios 15:24-28). Ta patil yame xtal te slajibal tsajele. Jaʼ yuʼun yame yichʼ koltayel te Satanás swenta yuʼun ya schaʼloʼlay te ants winiketike (Apocalipsis 20:3, 7-10). Te ants winiketik te maba ya schʼuunbeyik skʼop te Pukuje yame yilik te bin-utʼil ya xkʼot ta pasel te bin jamal albil jilel skʼoplal ta Bibliae: «Te machʼatic toj yoʼtanic ya me yichʼic hilel te qʼuinale, sbahtel qʼuinal ya xnahinic tey a» (Salmo 37:29). Jich yuʼun te Skʼajkʼalel ichʼel ta kʼope, yame yichʼ tal bayal utsilal ta swenta spisil te ants winiketik te jun yoʼtan ya yakʼ sbaik ta stojol te Diose.