Pirdda Gallassay Aybee?

PIRDDA GALLASSAA aybidan qoppay? Daroti, biilooniyan qoodettiya asay maaran eqqidi Xoossaa sintti araataakko shiiqiyaabadan qoppoosona. Hegaappe pirdday aawussi huuphiyan huuphiyan imettees. Issoti issoti saluwan gannatiyaa laattoosona; harati qassi merinau waayettanaadan pirddettoosona. Gidikkokka, Geeshsha Maxaafay he wodiyaabaa hegaappe keehi dumma ogiyan qonccissees. Pirdda gallassay yashshiya gallassa gidennan, hidoota gallassanne ubbabay ooraxxiyo gallassa gidiyoogaa Xoossaa Qaalay qonccissees.

Yoohaannisi Pirdda Gallassaabaa qonccissidoogaa, Ajjuutaa 20:11, 12n: “Taani gita bootta araataanne he araatan uttidaagaa be7aas. Sa7ainne saloi a sinttappe baqatidosona; naa77antto beettibookkona. Haiqqidaageeti, gitatinne guuttati araataa sinttan eqqidaageeta taani be7aas. Maxaafati dooyettidosona; hara maxaafai, de7o maxaafaikka dooyettiis. Haiqqidaageeti bantta oosuwaadan, maxaafatun xaafetti uttidaagaadankka pirddettidosona” yaagiyaagaa nabbaboos. Hagan Pirddiyaagaa geetettiday oonee?

Xoossaa Yihooway asaa naata Pirddiya ubbaappe xoqqaa. Gidikkokka, i pirddiyo oosuwaa kalˈˈatiya urau immiis. Oosuwaa 17:31n deˈiyaagaadan, kiitettida PHauloosi, “Xoossai gallassaa keeri wottiis; he gallassan ba doorido uran sa7an de7iya asa ubbaa  bolli xillo pirddaa i pirddana” yaagiis. Pirddanau doorettidaagee, hayquwaappe denddida Yesuus Kiristtoosa. (Yohaannisa 5:22) SHin Pirdda Gallassay doomiyoy awudee? Woqqu wodiyau takkii?

Pirdda Gallassay doommiyoy, saˈan deˈiya moorettida, Seexaanaa siraatay kumettay, Armmageedoona olan xayi simmiina gidiyoogaa Ajjuutaa maxaafay qonccissees. * (Ajjuutaa 16:14, 16; 19:19–20:3) Armmageedoonappe simmin, Seexaanaynne a daydanttati ciimma ollan issi shaˈu layttau qashettana. He wode, saluwaa laattiya 144,000ti “Kiristtoosaara issippe kawotudan sha7u laittau” haaroosona. (Ajjuutaa 14:1-3; 20:1-4; Roome 8:17) Yaatiyo gishshau, Pirdda Gallassay 24u saatiyan ellellidi wuriya hanota gidenna. Pirdda Gallassay issi shaˈu layttaa takkees.

He shaˈu laytta wodiyan, Yesuus Kiristtoosi “paxa de7iya asaanne haiqqida asaa pirddanau” deˈees. (2 Ximootiyoosa 4:1) ‘Paxa deˈiya asay’ Armmageedoonappe attiya “daro asaa” gidana. (Ajjuutaa 7:9-17) Kiitettida Yohaannisi ‘hayqqidaageeti pirddaa immiyo araataa sinttan eqqidaageeta’ beˈiis. Yesuusi qaalaa gelidoogaadan, ‘duufuwan deˈiyaageeti a [Kiristtoosa] qaalaa siyidi gaxi kiyana’ woykko denddana. (Yohaannisa 5:28, 29; Oosuwaa 24:15) SHin ha ubbatu pirddau baaso gidanabay aybee?

Kiitettida Yohaannisi beˈido ajjuutay qonccissiyoogaadan, “maxaafati dooyettidosona” qassi “haiqqidaageeti bantta oosuwaadan, maxaafatun xaafetti uttidaagaadankka pirddettidosona.” Ha maxaafati asay kase oottidobata xaafidobatee? CHii; Pirdday asay hayqqanaappe kase oottidoban baasettenna. Hegaa nuuni waati erana danddayiyoo? Geeshsha Maxaafay: “Issi urai haiqqiyo wode nagaraa wolqqai a haarenna” yaagees. (Roome 6:7) Hayquwaappe denddidi deˈuwau simmidi yiyaageeti, kase eti oottido nagaraappe geeyidosona. Yaatiyo gishshau, maxaafati Xoossay koyiyo harabata malaatoosona. Armmageedoonappe paxa attiyaageetinne hayquwaappe denddiyaageeti ubbaykka merinau deˈanau, shaˈu layttaa wode Yihooway geella immiyo hara ooratta azazota gujjidi, Xoossaa azazotussi azazettana bessees. Hegaa gishshau, asay huuphiyan  huuphiyan pirddettanau baaso gidiyaabay, Pirdda Gallassaa wodiyan eti oottiyoobaa.

Pirdda Gallassay, biilooniyan qoodettiya asaassi Xoossaa sheniyaa eridi, hegaara moggidi deˈanau koyro injjiyaa medhdhees. Hegaa giyoogee, keehi daro tamaarissiyo oosoy deˈana giyoogaa. Ee, tumuppekka “sa7an de7iya asai xillotettaa tamaarees.” (Isiyaasa 26:9) Gidikkokka, Xoossaa sheniyaara moggidi deˈnau koyiyaageeti ubbata gidokkona. Isiyaasa 26:10y: “Iita asayyo kehatettaa ottikkokka, i xillotettaa tamaarenna. Suure asatu biittan iitabaa oottees; GODAA gitatettaakka erenna” yaagees. He iitati, Pirdda Gallassaa wodiyan hayqqidi merinau xayana.—Isiyaasa 65:20.

Pirdda Gallassaa wurssettan paxa attiyaageeti, kumetta hanotan polo asa gididi Addaameppenne Hewaanippe halida deˈuwaa malaa deˈana. Hegaa gishshau, Pirdda Gallassaa wodiyan asa zaree doomettan halchchettida polo deˈuwaa demmana. (1 Qoronttoosa 15:24-28) Hegaappe wurssetta paacee doommees. Seexaanay asa zariyaa issitoo zaaretti balettanaadan wurssettau qashuwaappe birshshettees. (Ajjuutaa 20:3, 7-10) A eqettiyaageeti: “Xilloti biittaa laattananne yan merinau de7ana” yaagidi Geeshsha Maxaafay gelido qaalay kumetta hanotan polettiyo wodiyan deˈana. (Mazamure 37:29) Ee, Pirdda Gallassay ammanettida asa zeretta ubbau anjjo gidana!

[Tohossa qofaa]